ސަރުކާރުން އާއިލާތައް ގެތަކަށް ބަދަލުވާން ބުނެފައިވާ އިރު އެސަރަހައްދުގެ ހާލަތު އަދިވެސް ވަރަށް ގޯސް!

މިމަހުގެ 20 ވަނަ ދުވަހު މާލޭގައި ހިނގި އަލިފާނުގެ ހާދިސާގައި ހާލުގައި ޖެހިފައިވާ ބައެއް އާއިލާތަކަށް ބޯހިޔާވަހިކަން ފޯރުކޮށްނުދޭ މައްސަލަ ފެންމަތިވެފައިވަނިކޮށް އިތުރު މައްސަލަތަކެއް ފެންމަތިވެއްޖެއެވެ.

އެގޮތުން "ވޮއިސް" އަށް ވަނީ އަލިފާނުގެ ހާދިސާގައި ހާލުގައި ޖެހިފައިވާ އާއިލާއަކުން ގުޅައި މައްސަލަ ހިއްސާކޮށްފައެވެ.

"އަޅުގަނޑުމެނަށް ރޭ 7 ޖެހި އިރު ބޯހިޔާވަހިކަމެއް ދޭނެކަމަށް ޑިޒާސްޓަރ މެނޭޖްމަންޓްއިން ބުނެފައިވަނީ. 7 ޖެހި އިރުވެސް ހަބަރެއްނުވެގެން ދިޔައިމަ ބުނީ ބައި ގަޑި އިރުތެރޭ ގުޅާނެކަމަށް. ދެން ބުނަންނީ އަޅުގަނޑު ގެއަށް ބަދަލުވުމަށް. ކެމިކަލްގެ އަސަރު ނެތްކަމަށް އެޗްޕީއޭއިން އަންގާފައިވާކަމަށް" ހާލުގައި ޖެހިފައިވާ އާއިލައިން ކިޔާދިނެވެ.

ހާލުގައި ޖެހިފައިވާ އާއިލާ ދިރިއުޅެމުން ގެންދިޔަގެއަކީ އަލިފާނުގެ ހާދިސާ ހިނގާދިޔަ ގުނދަނާއި ޖެހިގެން އެއްގެ ދޫކޮށްފައި ހުންނަ ގެއެއްކަމުން އެގެއަށް ދުމުގެ އަސަރު މިހާރުވެސް ކުރަމުންދާކަމަށް ބުނެފައެވެ. އަދި އެ ސަރަހައްދުގައިވެސް ކެމިކަލް ވަސް ދުވާކަމަށާއި އެ ސަރަހައްދުގައި އަދިވެސް ސަލާމަތީ ބާރުތަކުން ހަރަކާތްތެރިވަނީ މާސްކުއަޅައިގެންކަން އޭނާ ފާހަގަކޮށްފައިވެއެވެ.

"ކުޑަ ދޮޅު ހުޅުވާލިއަށް ލޮލުންނާއި އެއްކޮށް ދިލަނަގާ" ނުވަމަހުގެ ތުއްތު ކުއްޖެއްގެ ބައްފަ ވޮއިސްއަށް ކިޔައިދިނެެވެ.

މި މައްސަލަ ޑިޒާސްޓަރ މެނޭޖްމަންޓާއި ހިއްސާކުރުމުން ބުނެފައިވަނީ އެ ސަރަހައްދުގެ ވައިގެ ވަނީ ޓެސްޓުކުރެވިފައިކަމަށާއި، ޑަބްލިއު އެޗެއޯގެ މިންގަނޑަށް އެ ސަރަހައްދުގެ ވައި ސާފުވެފައިވާކަމަށް އެޗްޕީއޭއިން ބުނެފައިވާކަމަށެވެ. ނަމަވެސް އެކަމާ ބެހޭ އެއްވެސް ލިޔުމެއް ހިއްސާކުރުމަށް ބުނުމުން އެ ލިޔުން ދައްކާފައި ނުވާކަމަށް ގޭގެ ވެރިފަރާތުން ބުނެފައިވެއެވެ.

މިއީ އެ ސަރަހައްދުގެ ދިރިއުޅޭ ގިނަ ފަރާތްތަކެއްގެ ކަންބޮޑުވުންކަމަށާއި މިކަމަށް ޑިޒާސްޓާއިން އެދެވޭ އެއްބާރުލުމެއް ދީފައިނުވާކަމަށް އޭނާ ބުނެފައިވެއެވެ.

މި މައްސަލާގައި "ވޮއިސް" އިން މިނިސްޓްރީ އޮފް ހެލްތްގެ ބަހެއް ހޯދުމަށް ތަކުރާރުކޮށް ގުޅުމުންވެސް ވަނީ ފޯނަށް ޖަވާބު ދީފައިނުވެއެވެ. ޑިޒާސްޓާރ މެނޭޖްމަންޓްއަށް މިމައްސަލާގައި ގުޅާލުމުން ވަނީ ތަނުގެ އިސްވެރިއެއް ފަހުން ގުޅާނެކަމަށް ބުނެފައެވެ.

އަލިފާން ރޯވި ހިސާބުގައި އަދިވެސް ފުލުހުންނާއި ސިފައިން ހަރަކާތްތެރިވަމުން އަންނަނީ މާސްކް އަޅައިގެންނެވެ.

9 މަހުގެ ތުއްތު ކުއްޖަކާއެކު ގެއަށް ބަދަލުވާން ނުކެރި އަދިވެސް އެ އާއިލާ ދިރިއުޅެމުންދަނީ އަމިއްލަ ހަރަދުގައި ގެސްޓުހައުސްއެއް ހިފައިގެންނެވެ. އަދި މިނޫން އެތައް އާއިލާއެއް ސަރުކާރުން ވަގުތީ ހިޔާވަހިކަން ދިނުމަށް ދެކޮޅު ހަދަމުންދާތީ ގެސްޓްހައުސްތަކުގައި އަދި ތިމާގެ މީހުންގެ ގޭގައި ދިރިއުޅެމުންއަންކަމަށް އެފަރާތުން މައުލޫމާތު ދެއްވާފައިވެއެވެ.