ފަތިސް ނަމާދަށްފަހު ރައީސް ވަޑައިގެންނެވީ އަމީނީމަގުގެ ތާރު އެޅުމުގެ މަސައްކަތް ބެއްލެވުމަށް!

ރައީސުލްޖުމްހޫރިއްޔާ ޑރ މުހައްމަދު މުޢިއްޒު، އަމީނީ މަގުގެ ތާރު އެޅުމުގެ މަސައްކަތް ކުރިއަށްދާ ގޮތް ގާތުން ބެއްލެވުމަށް މަސައްކަތް ކުރަމުންދާ ސަރަހައްދަށް ޒިޔާރަތް ކުރައްވައިފިއެވެ. އެމަނިކުފާނު އެތަނަށް ވަޑައިގެންނެވީ މިއަދުގެ ފަތިސް ނަމާދަށް ފަހު ފަތިސް ވަގުތުގައެވެ.

ސަރުކާރުން ކުރިއަށް ގެންދާ މަޝްރޫޢުތައް ގާތުން ބައްލަވައި ރައްޔިތުންނާއި ވޭހާވެސް ގާތުން މަސައްކަތް ކުރެއްވުމަކީ ރައީސް މުޢިއްޒުގެ އެއް ވަޢުދެވެ.

ތާރު އަޅައި ޒަމާނީ ފެންވަރަށް އަމީނީ މަގު ތަރައްގީ ކުރުމުގެ މަސައްކަތަކީ ރައީސް މުޢިއްޒު މާލޭގެ މޭޔަރ ކަމުގައި ހުންނެވި އިރު މާލެ ސިޓީ ކައުންސިލުން އާރްޑީސީ އާއި ހަވާލު ކޮށްގެން ކުރިއަށް ގެންދަން ނިންމާފައި އޮތް މަސައްކަތެކެވެ.

ނަމަވެސް، އެކަމަށް ބޭނުންވާ ބަޖެޓް ކުރީ ސަރުކާރުން ދީފައި ނުވާތީ މާލެ ސިޓީ ކައުންސިލަށް މަސައްކަތް ކުރިއަށް ނުގެންދެވި ވަނިކޮށް، އެ މަޝްރޫޢު މާލެ ސިޓީ ކައުންސިލް އަތުން އަތުލައި ޕްލޭނިންގ މިނިސްޓްރީން އަލުން ވަނީ މަސައްކަތް ކުރިން ހަވާލުކުރެވުނު އަގުގެ ދެ ގުނަ އަގެއްގައި އަލުން އެ މަސައްކަތް އާރްޑީސީ އާ ހަވާލު ކޮށްފައެވެ.

މަސައްކަތް އަވަހަށް ނިންމުމަށް ކަމަށް ބުނެ އަލުން އާރްޑީސީއާއި، އެ މަޝްރޫއު ހަވާލުކުރި ނަމަވެސް، ހަވާލު ކުރެވުނު މުއްދަތުގައި އެ މަސައްކަތް ނުނިމި އެ ސަރުކާރު ނިމިގެން ދިޔަ އިރުވެސް މަގު ހަދައި ނިމިފައެއް ނުވެއެވެ.

އެހެންކަމުން، ރައީސް މުޢިއްޒު ވަނީ އެމާނިކުފާނުގެ ވެރިކަމެއްގައި އެ މަސައްކަތް ވީ އެންމެ އަވަހަށް ނިންމަވާނެ ކަމަށް ވިދާޅުވެފައެވެ. އަދި މިސަރުކާރުގެ މަސައްކަތް ފެށުމާއި އެކު، ކޮންސްޓްރަކްޝަން މިނިސްޓްރީން ވަނީ އެ މަޝްރޫއު އާއި ގުޅޭގޮތުން އާރްޑީސީ އާއި ބައްދަލު ކޮށް މަސައްކަތް އަވަހަށް ނިންމުމަށް މަޝްވަރާ ކޮށްފައެވެ.

އެއާއެކު މި މަސައްކަތުން ނުނިމިވާ ދެ ސެގުމެންޓުގެ މަސައްކަތް މި ދިޔަ ޑިސެމްބަރު ބަހުގެ 9 ވަނަ ދުވަހު ވަނީ ފަށާފައެވެ. އާރުޑީސީ ގެފަރާތުން މައުލޫމާތުދޭ ގޮތުގައި މޫސުން ރަނގަވެ، ތާވަލާއި އެއްގޮތަށް މަސައްކަތްކުރިއަށް ދާނަމަ ކުރިއަށް އޮތް މަހެއްހާ ދުވަސް ތެރޭގައި އަމީނީ މަގުގެ މަސައްކަތް އެއްކޮށް ނިންމާ އާއްމުނަށް މަގު ހުޅުވާލެވޭނެއެވެ.