އަހަރުގެ މިހާތަނަށް 684،908 ފަތުރުވެރިން ޒިޔާރަތްކޮށްފި

މިއަހަރުގެ މިހާތަނަށް ރާއްޖެއަށް 684،908 ފަތުރުވެރިން ޒިޔާރަތް ކޮށްފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.

އެ މިނިސްޓްރީން މިއަދު އާއްމުކުރި ތަފާސްހިސާބުތަކަށް ބަލާއިރު، މިދިޔަ އަހަރާ އަޅާބަލާއިރު، މިއަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ ނިސްބަތް ވަނީ 0.7 އިންސައްތަ ދަށަށް ގޮސްފައެވެ. އެގޮތުން މިދިޔަ އަހަރުގެ މި މުއްދަތުގެ ތެރޭގައި ރާއްޖެއަށް ވަނީ، 689،634 ފަތުރުވެރިން ޒިިޔާރަތްކޮށްފައެވެ.

ޓޫރިސްޓުން ޒިޔާރަތްކުރި ނިސްބަތް މިއަހަރުގެ ތެރޭގައި އެންމެ ދަށަށް ގޮސްފައިވަނީ މިދިޔަ މާޗްމަހުގެ ތެރޭގައެވެ. މީގެ މައިގަނޑު ސަބަބަކީ މެދުއިރުމަތީގެ ހަނގުރާމައިގެ ސަބަބުން އެ ސަރަހައްދުން އަންނަ ފްލައިޓްތައް ހުއްޓި ދަތުރުތަކަށް ބުރޫއެރުމެވެ. މާޗްމަސް ފެށުނުއިރު މެދުއިރުމަތިން ރާއްޖެއަށް އުދުހުންތައް ބައްވަމުން އައި ބޮޑެތި ހުރިހާ ފްލައިޓްތަކެއްގެ ދަތުރުތައް ހުއްޓާލިއިރު، މެދުއިރުމަތިން ރާއްޖެއަށް އުދުހުންތައް ބާއްވަމުން އައިސްފައިވަނީ ވަރަށް މަދު ފްލައިޓްތަކެކެވެ. ނަމަވެސް މިހާރު އިއްތިހާދު، ޤަތަރު އަދި އެމިރޭޓްސްއިން ރާއްޖެއަށް ކޮންމެވެސް ވަރަކަށް ދަތުރުތައް ވަނީ ފަށާފައެވެ.

އަހަރުގެ މިހާތަނަށް ރާއްޖެއައި ފަތުރުވެރިން

- ޖެނުއަރީ: 227،403 ފަތުރުވެރިން

- ފެބުރުއަރީ: 254،556

- މާޗް: 166،616

މިއަހަރުގެ މިހާތަނަށް ރާއްޖެއަށް އެންމެ ގިނައަދަދަކަށް ފަތުރުވެރިން ޒިޔާރަތްކުރި މަންޒިލް ތެރޭގައި ހިމެނެނީ މިހާރުވެސް އާއްމުކޮށް އެންމެގިނައިން ފަތުރުވެރިން އަންނަ ޤައުމުތަކެވެ. އެގޮތުން އަހަރުގެ މިހާތަނަށް އެންމެގިނައިން ފަތުރުވެރިން ޒިޔާރަތްކުރި ޗައިނާއިން 100،185 ފަތުރުވެރިން ޒިޔާރަތްކުރިއިރު ރަޝިއާއިން ވަނީ، 84،739 ފަތުރުވެރިން ޒިޔާރަތްކޮށްފައެވެ. އިނގިރޭސިވިލާތުން 65،105 ފަތުރުވެރިން ޒިޔާރަތްކުރިއިރު، މި މުއްދަތުގެ ތެރޭގައި އިޓަލީން 59،396 އަދި ޖަރުމަނުވިލާތުން 46،245 ފަތުރުވެރިން ޒިޔާރަތްކުރިއެވެ.

ވެލާނާ އިންޓަރނޭޝަނަލް އެއާޕޯޓް ފިޔަވައި އަހަރުގެ މިހާތަނަށް އެންމެގިނަ ފަތުރުވެރިން ރާއްޖެ އެތެރެވެފައިވަނީ އައްޑޫސިޓީ ގަން އެއާޕޯޓުންނާއި މާފަރު އެއާޕޯޓުންނެވެ.

- ވެލާނާ އިންޓަރނޭޝަނަލް އެއާޕޯޓް: 665،691 ފަތުރުވެރިން

- ގަން އިންޓަރނޭޝަނަލް އެއާޕޯޓް: 2،813

- މާފަރު އިންޓަރނޭޝަނަލް އެއާޕޯޓް: 2،620

- ހަނިމާދޫ އިންޓަރނޭޝަނަލް އެއާޕޯޓް: 1،630

- ވިލާ އިންޓަރނޭޝަނަލް އެއާޕޯޓް: 1،234 ފަތުރުވެރިން

- ދާލު އެއާޕޯޓް: 568 ފަތުރުވެރިން

މިއަހަރުގެ މިހާތަނަށް ވައިގެ މަގުން 670،102 ފަތުރުވެރިން ރާއްޖެއަށް ޒިޔާރަތްކުރިއިރު ބިޒްނަސް އެރައިވަލް އުޅެނީ، 4،455 ގައެވެ. އަދި ކުރޫޒް ލައިނާއިން ރާއްޖެއަށް ޒިޔާަރތްކުރި ފަތުރުވެރިންގެ އަދަދު އުޅެނީ، 10،351 ގައެވެ.