ހީނާ، ޝާހިދަށް: މިސްރާބު ހުރީ ހަމަމަގަކަށް ނޫން، އަދަވަޅަކަށް

އެމްޑިޕީގެ މިސްރާބު ހުރީ ހަމަމަގަކަށް ނޫންކަމަށާއި، މިސްރާބު ހުރީ އަނދަވަޅަކަށް ކަމަށް ވިދާޅުވެ ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) ގެ މެނޭޖިންގ ޑިރެކްޓާ ހީނާ ވަލީދު، އެމްޑީޕީގެ ރައީސް ޢަބްދުﷲ ޝާހިދުއަށް ހޫނުގަދަ ރައްދެއް ދެއްވައިފިއެވެ.

ހީނާ މިފަދައިން ރައްދުދެއްވާފައިވަނީ، ޝާހިދު މިއަދު ދ. ކުޑަހުވަދޫ ދެމަފިރިންނާއެކު އެކްސްގައި ވީޑިއޯއެއް ހިއްސާކުރައްވާ ދެއްކެވީ ވާހަކައާ ގުޅިގެންނެވެ. ޝާހިދު ވިދާޅުވެފައިވަނީ އެ ދެމަފިރިންގެ ދަރިފުޅަކީ ހިތުގެ ބަލި ތަހައްމަލު ކުރަމުންދާ ކުއްޖެއް ކަމަށެވެ.

އަދި  އާސަންދަ މެދުވެރިކޮށް އެ ދެމަފިރިންގެ ދަރިފުޅަށް ބޭނުންވާ ބޭސް ކުރީ ސަރުކާރުން ފޯރުކޮށްދީފައިވާ ކަމަށާއި ނަމަވެސް މި ސަރުކާރުން އެ ކުއްޖާއަށް ބޭނުންވާ ބޭސް ހޯދައިދިނުމުގައި ލަސްތަކެއްވާ ކަމަށް ޝާހިދު އެ ވީޑިއޯގައި ވިދާޅުވެފައިވެއެވެ.

މިކަމަށް ރައްދުދެއްވައި، ހީނާ މިއަދު އެކްސްގައި ކުރި ޕޯސްޓެއްގައި ވިދާޅުވީ، ބިލްތައް ރިފަންޑް ކުރަނީ އާސަންދައިން ނޫންކަމަށެވެ.

އަދި ދ. ކުޑަހުވަދޫ ޢަބްދުލްޙަކީމްގެ ހިތުގެ ބަލި ހުންނަ ދަރިފުޅަށް ބޭސް ގަތުމަށްފަހު ހުށައަޅާފައިިވާ ބިލަށް އެންމެ ފަހުން ފައިސާ ހަމަޖައްސާފައިވަނީވެސް މިދިޔަ އަހަރުގެ ޑިސެމްބަރުމަހުގައި މި ސަރުކާރުންކަމަށް އެ ޕޯސްޓުގައިވެއެވެ.

ރާއްޖެއިން ނުލިބޭ ބޭސް ގަތުމަށްފަހު އެ އޮންނަ އުސޫލުގެ ތެރެއިން ބިލް ހުށައެޅުމުން ކޮންމެ ރައްޔިތަކަށްވެސް އެންސްޕާއިން އެފައިސާ ރިފަންޑްކޮށްދޭނެ. އަދި އެއީ ވަކި ސަރުކާރެއް އޮވެގެން ނުވަތަ ނެތިގެން ވާކަމެއްނޫން. ކުރިއަށްއޮތްތަނުގައިވެސް ޢަބްދުލްވާޙިދުގެ ދަރިފުޅުގެ ބޭސްގަތުމަށް އެންސްޕާއިން ދޭންޖެހޭ އެހީ ލިބޭނެ. އަދި މިސަރުކާރުން މިހާތަނަށް އެތައް ފަރާތަކަށް މިގޮތަށް ރިފަންޑްކޮށްދީފައިވާނެ.

ހީނާ ވަލީދު ވިދާޅުވިއެވެ

ޝާހިދުއަށް ފާޑުވިދާޅުވަމުން ހީނާ ވިދާޅުވީ، ޤައުމުގެ ބޮޑެތި މަޤާމުތައް އަދާކުރައްވާ "ދުނިޔޭގެރައީސް" ކަން ކުރައްވާފައިވާ ބޭފުޅަކު ރައްޔިތުން ގާތަށްގޮސް އެބޭފުޅުންގެ އިޙްސާސްތަކާކުޅެފައިވާ ކަމަށެވެ.

މަޖިލިސް އިންތިޚާބާ ދިމާކޮށް ޑްރާމާކުޅުމުން ތިބޭފުޅުން ވެއްޓިފައިވާ ދަށު ދަރަޖަ ވަރަށް ބޮޑަށް ސާފުވެއްޖެ. މިދިޔަ ސަރުކާރުގައި ބައި އިލެކްޝަންތަކާއި ދިމާކޮށް، އާސަންދަ އެންސްޕާގެ މޭޒު އެ ދާއިރާތަކުގައި ބަހައްޓައިގެން ތިބޭފުޅުން ބޭނުންވާ ބަޔަކަށް އުސޫލާ ޚިލާފަށް ކަންކަންކޮށްދިންކަން ވަރަށް ސާފު.

ހީނާ ވަލީދު ވިދާޅުވިއެވެ

އެމްޑީޕީގެ މި އަހަރުގެ ކެމްޕެއިން ޝިޢާރުކަމަށްވާ މިސްރާބު ހަމަމަގަށް އިޝާރާތްކުރައްވާ ހީނާ ވިދާޅުވީ، ތިބޭފުޅުންގެ މިސްރާބު ހުރީ ހަމަ މަގަކަށްނޫން ކަމަށާއި މިސްރާބު ހުރީ އަނދަވަޅަކަށް ކަމަށެވެ.