5.1 ބިލިޔަން ރުފިޔާގެ ސަޕްލިމަންޓްރީ ބަޖެޓު ފާސްކޮށްފި

ދައުލަތުގެ ޚަރަދުތައް ފޫބެއްދުމަށް ރައްޔިތުންގެ މަޖިލީހަށް ހުށައެޅި 5.1 ބިލިޔަން ރުފިޔާގެ ސަޕްލިމެންޓަރީ ބަޖެޓު ރައްޔިތުންގެ މަޖިލީހުން ފާސްކޮށްފިއެވެ.

ސަޕްލިމަންޓްރީ ބަޖެޓު ފާސްވީ ވޯޓުގައި ބައިވެރިވެވަޑައިގެންނެވި 75 މެންބަރުންގެ ވޯޓުންނެވެ. ދެކޮޅަށް ވޯޓު ދެއްވީ 11 މެންބަރުންނެވެ.

ބަޖެޓާ ގުޅޭގޮތުން އޮޑިޓަރ ޖެނެރަލް ދެއްވި ރަޢުޔުގައި ވިދާޅުވެފައިވަނީ، ބަޖެޓްގެ 40 އިންސައްތައަކީ ދަރަނިން ފައިނޭންސްކުރަން ޖެހޭ އަދަދު ކަމަށްވާތީވެ، އަހަރު ނިމޭއިރު ދައުލަތުގެ ހުރި ޖުމްލަ ދަރަންޏަށް 22 ބިލިއަން ރުފިޔާ އިތުރުވެގެން ދާނޭކަމަށް ލަފާކުރެވޭ ކަމަށެވެ.

އޮޑިޓަރ ޖެނެރަލްގެ ފަރާތުން އެންމެބޮޑަށް ފާހަގަކުރި ކަންކަމުގެ ތެރޭގައި ހިމެނެނީ ދައުލަތަށް އެކިގޮތްގޮތުން ލިބޭނޭ ކަމަށް އަންދާޒާކުރި އާމްދަނީ އާ އެއްވަރަށް މިހާހިސާބަށް އާއިރުވެސް އާމްދަނީ ލިބިފައި ނުވުމެވެ. އެހެންކަމުން ސަޕްލިމަންޓަރީ ބަޖެޓްގައި ލިބޭނޭކަމަށް ފާހަގަކޮށްފައިވާ އަދަދުތައް ލިބޭނޭކަމުގެ ޔަގީންކަން ނެތްކަމަށް އޮޑިޓަރ ޖެނެރަލް ވަނީ ފާހަގަކުރައްވާފައެވެ.

ސަޕްލިމަންޓަރީ ބަޖެޓްގައި ހަރަދުކުރުމަށް އެކަށައަޅާފައިވާ ދާއިރާތައް

• ޕީއެސްއައިޕީ އަށް އިތުރު 2.0 ބިލިއަން ރުފިޔާ

• ސަރުކާރު ހިއްސާވާ ކުންފުނިތަކަށް އިތުރު 441.4 މިލިއަން ރުފިޔާ

• ކޮންޓިންޖެންސީ ބަޖެޓަށް އިތުރު 650 މިލިއަން ރުފިޔާ

• ސްޓޫޑަންޓު ލޯނު ދޫކުރުމަށް 458.4 މިލިއަން ރުފިޔާ

• މެޑިކަލް ކޮންޒިމަބަލްސް އަށް 200 މިލިއަން ރުފިޔާ

• ބޭސްފަރުވާގެ އެހީއަށް 262.6 މިލިއަން ރުފިޔާ

• ސަބްސިޑީއަށް 1.02 ބިލިއަން ރުފިޔާ

ސަރުކާރުން ސަޕްލިމެންޓަރީ ބަޖެޓެއް ހުށަހެޅިއިރު، މިއަހަރަށް ކަނޑައެޅި ބަޖެޓުން، އަދި ހުސް ނުވާކަމަށް ފިނޭންސް މިނިސްޓްރީން ވަނީ ބުނެފައެވެ. އެގޮތުން މިދިޔަ މަހުގެ ނިޔަލަށް ބަޖެޓުން ހޭދަކުރެވިފައިވަނީ، ބަޖެޓުގެ 74 އިންސައްތަކަމަށް ފިނޭންސް މިނިސްޓަރު މާލީ ވަޒީރު ވަނީ ވިދާޅުވެފައެވެ.

ރައްޔިތުންގެ މަޖިލީހުން މިއަހަރު ފާސްކޮށްފައިވަނީ 49.8 ބިލިއަން ރުފިޔާގެ ބަޖެޓެކެވެ. ބަޖެޓަށް އާމްދަނީގެ ގޮތުގައި ލިބޭނޭކަމަށް ލަފާކުރީ 33.5 ބިލިއަން ރުފިޔާއެވެ. ޑެފިސިޓް ހުންނާނޭކަމަށް ލަފާކޮށްފައިވަނީ 16.3 ބިލިއަން ރުފިޔާގައެވެ. ސަޕްލިމަންޓަރީ ބަޖެޓުގެ ގޮތުގައި އިތުރުވާ 5.1 ބިލިއަން ރުފިޔާ އާއެކު، މިއަހަރުގެ ބަޖެޓް ޑެފިސިޓް 18 ބިލިއަން ރުފިޔާއަށް އަރާނެއެވެ.