ޕޮލިސް ކޮމިޝަނަރ ކަމަށް ނަވީން އައްޔަނުކޮށްފި
ފުލުހުންގެ އިދާރާ ވަގުތީ ގޮތުން ހިންގުމާ މިވަގުތު ހަވާލުވެ ހުންނެވި ޑެޕިއުޓީ ކޮމިޝަނަރ އޮފް ޕޮލިސް އިސްމާއީލް ނަވީން, ޕޮލިސް ކޮމިޝަނަރުގެ މަގާމަށް އައްޔަންކުރައްވައިފިއެވެ.
ޕޮލިސް ކޮމިޝަނަރުގެ މަގާމު ހުސްވެފައިވަނީ އެ މަގާމުގައި ކުރިން ހުންނެވި އަލީ ޝުޖާއު ކުއްލި ގޮތަކަށް އިސްތިއުފާ ދެއްވުމާ ގުޅިގެންނެވެ. އެ މަގާމަށް ނަވީންގެ އިތުރުން ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީއާއި ސައުތު ޕޮލިސް ކޮމާންޑަރު އެސިސްޓެންޓް ކޮމިޝަނަރު އަހްމަދު ޝަމީމް ވެސް ވަނީ ކުރިމަތިލައްވާފައެވެ.
އެ ތިން ބޭފުޅުން ވެސް ކޮމިޝަނަރު ކަމަގެ މަގާމަށް ޝަރުތު ހަމަވާ ކަމަށް ޕޮލިސް ބޯޑުން އިއްޔެވަނީ ކަނޑައަޅައިފައެވެ. ޕޮލިސް ކޮމިޝަނަރު އައްޔަން ކުރަނީ ޕޮލިސް ބޯޑުން ހޯމް މިނިސްޓަރަށް ނަންތައް ފޮނުވުމުން، ހޯމް މިނިސްޓަރުގެ ލަފާފުޅާއިއެކު ރައީސުލްޖުމްހޫރިއްޔާއެވެ.
އެ މަގާމުގައި ކުރިން ހުންނެވި އަލީ ޝުޖާއު އިސްތިއުފާދެއްވީ، މި އަހަރުގެ އޭޕްރިލް މަހުގެ 18 ވަނަ ދުވަހު ހައްވާ ޔުމްނު ރަޝީދު, ފުރާޅެއް މައްޗަށް ވެއްޓިފައި އޮއްވާ ފެނުނު މައްސަލައިގެ ތަހުގީގުގައި ފުލުހުން އަމަލުކުރި ގޮތުން ރައްޔިތުންގެ ފާޑުކިޔުންތަށް އޭނާއަށް އަމާޒުވެފައިވާ ދަނޑިވަޅެއްގައެވެ.
މި ސަރުކާރުން އެންމެ ފުރަތަމަ ޕޮލިސް ކޮމިޝަނަރަކަށް ފުރުސަތު ހުޅުވާލުމުން އެ މަގާމަށް ވާދަ ކުރެއްވި 2 ބޭފުޅުންގެ ތެރޭގައި ނަވީން ހިމެނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
