ކުރިއަށް އޮތް ދިހަ ދުވަހުގެ ތެރޭގަ ހިންގާ ސިޔާސީ ހަރާކަތްތައް ބޮޑު ތަނުން ވަރުގަދަ ކުރާނަން - އަހުމަދު އީސާ

ކުރިއަށް އޮތް ދިހަ ދުވަހުގެ ތެރޭގަ ހިންގާ ސިޔާސީ ހަރާކަތްތައް ކުރިއަށްވުރެް ބޮޑު ތަނުން ވަރުގަދަ ކުރާނެ ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ރައްޔިތުންގެ މަޖިލީހުގެ އިންތިޚާބަށް ކަނޑައަޅުއްވާފައިވާ ތަރުޖަމާނު، ކެނދިކުޅުދޫ ދާއިރާގެ މެންބަރު އަހުމަދު އީސާ ވިދާޅުވެއްޖެއެވެ.

މެންބަރު އަހުމަދު އީސާ މިހެން ވިދާޅުވެފައި ވަނީ ރޭ އެމްޑީޕީއިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.

މެންބަރު ވިދާޅުވީ ކުރިއަށް އޮތް ދިހަ ދުވަހު ގިނަ ސިޔާސީ ހަރަކާތްތަކެއް ކުރިއަށް ގެންދަން ރޭވިފައި ވާކަމަށާ، ޢީދު ބަންދަށް ފަހު އެމްޑީޕީގެ ޓީމުތައް، ސިޔާސީ ޙަރަކާތްތައް ހިންގުމަށް ދަތުރުފަށާނެ ކަމަށެވެ. އެގޮތުން އެމްޑީޕީގެ ޓީމުތައް ރާއްޖޭގެ 70% ސަރަހައްދުތަކުގައި ސިޔާސީ ހަރަކާތްތަކުގައި ޢަމަލީ ގޮތުން ބައިވެރިވާނެ ކަމަށްވެސް މެންބަރު ވިދާޅުވިއެވެ.

"މި ޕާޓީއިން ކުރިއަށް އޮތް 10 ދުވަހުގެ ތެރޭގަ ހިންގާ ސިޔާސީ ހަރަކާތްތައް އަޅުގަނޑުމެން ބޮޑުތަކުން ވަރުގަދަ ކުރާނަން. އަޅުގަނޑުމެންގެ ކުރިއަށް އޮތް 10 ދުވަހުގެ ޕްލޭން ހެދި އެ ޕްލޭނާ އެއްކޮށް އަޅުގަނޑުމެންގެ މަސައްކަތްތައް އިރާދަކުރެއްވިއްޔާ ޢީދު ބަންދަށްފަހު ފަށައިގަންނާނަން. އޭގެ މާނައަކީ މާދަމާ ނޫން އަނެއްދުވަހު އަޅުގަނޑުމެންގެ ލީޑަޝިޕް ޓީމުތައް ރާއްޖޭގެ އެކި ސަރަހައްދުތަކަށް ދަތުރުކުރުމުގެ ދަތުރުތަކަށް ފަށައިގަންނާނަން."

އަހުމަދު އީސާ ވިދާޅުވިއެވެ.

ކުރިއަށް އޮތް ރައްޔިތުންގެ މަޖިލީހުގެ އިންތިޚާބަށް އެމްޑީޕީއިން ކެމްޕެއިން ކުރައްވާ ޓީމުތައް ލީޑު ކުރައްވާނީ އެ ޕާޓީގެ އެޑްވައިޒާ، އަދި ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހާއި، ކުރީގެ ނައިބު ރައީސް ފައިސަލް ނަސީމުގެ އިތުރުން، އެމްޑީޕީގެ ޗެއަރ ޕާސަން ފައްޔާޒު، ކުރީގެ ޗެއަރ ޕާސަން މާރިޔާ ދީދީ އަދި އެމްޑީޕީގެރައީސް އަބްދުﷲ ޝާހިދެވެ.

ރޭގެ ނޫސްވެރިންގެ ބައްދަލުވުމުގައި މެންބަރު އަހުމަދު އީސާ ވިދާޅުވީ، ކުރިއަށް އޮތް 10 ދުވަހުގެ ތެރޭގައި ރާއްޖޭގެ 14 އަތޮޅެއްގައި އެމްޑީޕީގެ ލީޑަޝިޕް ޓީމުތައް ހަރަކާތްތެރިވުމަށް ރޭވިފައިވާކަމަށެވެ. އެގޮތުން ޓީމުތައް އުތުރުގެ ހުރިހާ އަތޮޅުތަކެއްގައި ހަރަކާތްތެރިވުމަށް ރާވާފައި ވާއިރު، ދެކުނުން ހަރަކާތްތެރިވުމަށް ރާވާފައި ވަނީ މ. އަތޮޅު، ފ. އަތޮޅު، ދ.އަތޮޅު، ތ.އަތޮޅު، ލ.އަތޮޅު، ގއ.އަތޮޅު އަދި ގދ.އަތޮޅުގައެވެ.

ކެމްޕެއިން ޙަރަކާތްތަކުގައި ބައިވެރިވެވަޑައިގަންނަވާ ލީޑަރުން, ދާއިރާތަކުގެ ހުރިހާ ސިޔާސީ ހަރަކާތްތަކުގައި ބައިވެރިވެ ވަޑައިގަންނަވާނެކަމަށް ވެސް ނޫސްވެރިންގެ ބައްދަލުވުމުގައި އަހުމަދު އީސާ ވިދާޅުވިއެވެ. އެގޮތުން ޖަލްސާކުރެއްވުމުން ފަށައިގެން، ޕޯސްޓަރު ހިއްޕުމާއި ޑޯ-ޓު-ޑޯ ކެމްޕޭނުގައިވެސް އެ ބޭފުޅުން ބައިވެރިވެ ވަޑައިގަންނަވާނެކަމަށް މެންބަރު ވިދާޅުވިއެވެ.