ޝަންގްރިއްލާ އަށް ވަޑައިގެން ހުޅުވަން ކުރާ މަސައްކަތް ރައީސް ބައްލަވާލައްވައިފި

އައްޑޫގެ ވިލނގިލީގައި ހިންގާ ޝަންގްރިއްލާ ރިސޯޓު ހުޅުވަން ކުރައްވާ މަސައްކަތް ބައްލަވާލެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ރިސޯޓަށް ވަޑައިގެންފި އެވެ.

އައްޑޫ ސިޓީއަށް ކުރައްވާ ދަތުރުފުޅުގައި ރައީސް މުޢިއްޒު މިއަދު ވަނީ ޝަންގްރިއްލާ ރިސޯޓަށް ވަޑައިގެންފަ އެވެ. ރައީސް އޮފީހުން ބުނީ އެ ރިސޯޓު ހުޅުވަން ކުރައްވާ މަސައްކަތް އެމަނިކުފާނު ބައްލަވާލެއްވި ކަމަށެވެ. އަދި މައުލޫމާތު ސާފުކުރެއްވި ކަމަށެވެ.

2009 ވަނަ އަހަރު ހުޅުވި ސަންގްރިއްލާ ރިޒޯޓް ބަންދުކޮށްފައިވަނީ، ކޮވިޑް ބަލިމަޑުކަމާ ގުޅިގެން 2020 އަހަރުއެވެ. އެ ރިސޯޓް އަހަރުގެ ފަހު ދުވަހު ރަސްމީކޮށް ހުޅުވަން ދަނީ ތައްޔާރުވަމުންނެވެ.

ކޮވިޑާ ގުޅިގެން ޝަންގްރިއްލާ ބަންދުކުރި ފަހުން، އެ ރިސޯޓުން އަލުން ޚިދުމަތް ދޭނެ ދުވަހަކަށް އައްޑޫގެ ރައްޔިތުން އަންނަނީ އިންތިޒާރުކުރަމުންނެވެ. އެގޮތުން ބަލާއިރު މިދިޔަ ރިޔާސީ އިންތިހާބުގައި ވެސް އައްޑޫގެ ރައްޔިތުންގެ އެންމެ ބޮޑު އެދުމަކަށް ވެފައިވަނީ އައްޑޫގައި ހިންގާ ހަންކެޑެ މަޝްރޫއު އަލުން ފަށައި ނުވަތަ ޝަންގްރިއްލާއިން އަލުން ޚިދުމަތްދޭން ފެށުމެވެ.

ކޮވިޑާ ގުޅިގެން 2020 ވަނަ އަހަރު އެ ރިސޯޓު ބަންދުކުރިއިރު 580 މުވައްޒަފަކު އެ ރިސޯޓުގައި މަސައްކަތްކުރަމުން ދިޔައެވެ. އެ ރިސޯޓު އަލުން ހުޅުވުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެއް ވެސް މެއެވެ.