ރެސިޑެންޝަލް ޓްރީޓްމަންޓް ސެންޓަރަށް މުވައްޒަފުން ހޯދަން އިއުލާނުކޮށްފި

ހއ. ހޯރަފުށީގައި ހުޅުވަން ހަމަޖެހިފައިވާ ކުޑަކުދިންގެ ރެސިޑެންޝަލް ޓްރީޓްމަންޓް ސެންޓަރަށް މުވައްޒަފުން ހޯދަން އިއުލާނުކޮށްފި އެވެ.

ޖުވެނަލް ޖަސްޓިސް ޑިޕާޓްމަންޓުން އިއުލާންކޮށްފައި ވަނީ ޓެކްނިކަލް ޑިރެކްޓަރަކާއި، އެޑްމިނިސްޓްރޭޓިވް އޮފިސަރަކާއި، އެސިސްޓެންޓް ކައުންސެލަރަކާއި، 2 ޕްރޮގްރާމް އޮފިސަރުން، 2 ސީނިއާ ޖުވެނަލް ޖަސްޓިސް އޮފިސަރުން، 2 މަސައްކަތު މީހުން، 2 ކައްކާ އަދި 6 ޗައިލްޑް ކެއާ އެޓެންޑެންޓުންނާއި 6 ސެކިޔުރިޓީ އޮފިސަރުން ހޯދުމަށެވެ.

އެ މަގާމުތަކަށް ކުރިމަތިލުމަށް ހޫލުވާލާފައިވަނީ މި މަހުގެ 18 ވަނަ ދުވަހުގެ މެންދުރު 12:00 ގެ ނިޔަލަށެވެ.

2019 ވަނަ އަހަރު ފާސްކޮށް، ޢަމަލުކުރަން ފެށި، ކުޑަކުދިންގެ ޢަދުލާ ބެހޭ ޤާނޫނުގައި ބުނާ ގޮތުން ކުށުގެ ވެށީގައި އުޅޭ ކުދިންނާއި ނުރައްކަލަށް ހުށަހެޅުމުގެ ފުރުސަތު އޮތް ކުދިން މަރުކަޒުކޮށް ފަރުވާދޭން ޖެހޭނެއެވެ. ނަމަވެސް ޤާނޫނު ފާސްކުރިތާ 5 އަހަރު ވެގެން ދިޔައިރުވެސް ރެސިޑެންޝަލް ސެންޓަރެއް ހެދުމުގެ މަސައްކަތެއް ނުނިމެއެވެ. ނަމަވެސް ކުރީ ސަރުކާރުން ވަނީ ދ. ކުޑަހުވަދޫގައި ރެސިޑެންޝަލް ޓްރީޓްމަންޓް ސެންޓަރެއް އަދި ހއ. ހޯރަފުށީގައި ހާފްވޭ ހައުސްއެއް އަޅަން ފަށާފައެވެ.

އެހެން ނަމަވެސް، ކުޑަހުވަދޫ ރެސިޑެންޝަލް ސެންޓަރުގެ ޙާލަތު ހުރި ގޮތުން ސަރުކާރުން ވަނީ ހޯރަފުށީގައި އެޅި ހަލފްވޭ ހައުސް ރެސިޑެންޝަލް ޓްރީޓްމަންޓް ސެންޓަރަކަށް ބަދަލުކޮށް މި ހަފުތާގެ ތެރޭގައި އެ ތަން ބޭނުންކުރަން ނިންމައިފަ އެވެ.

މިދިޔަ ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި، ހޯމްލޭންޑު ސެކިއުރިޓީ މިނިސްޓަރު އަލީ އިހުސާން ވިދާޅުވީ ރެސިޑެންޝަލް ފަރުވާއަށް ފަހު އެ ކުދިން ބަދަލުކުރަން ޖެހޭނީ ހާފްވޭ ހައުސަށް ކަމަށެވެ. ފުރަތަމަ މަރުހަލާ ފުރިހަމަ ނުކޮށް، އެ ނިޒާމުގައި ދެ ވަނަ ސްޓެޕް އަކަށް ނުދެވޭ ކަމަށް އޭނާ ވިދާޅުވި އެވެ.

"ކުޑަކުއްޖަކު އެޓް ރިސްކަށް އައުމާ ހިސާބުން ފެށިގެން އަޅުގަނޑުމެންނަށް އައިޑެންޓިފައިވާ ހިސާބުން އެ ކުއްޖާ ގެންދަން މި ޖެހެނީ މި ދެންނެވި ރެސިޑެންޝަން ޓްރީޓްމެންޓް ސެންޓަރަކަށް. އެ ރެސިޑެންޝަން ޓްރީޓްމެންޓްގަ ވަކި ވަރެއް ވަންދެން ރިހެބިލިޓޭޝަން ޕްރޮގްރާމްތައް ހިންގުމަށް ފަހުގަ ދެން މި ގެންދަން ޖެހެނީ ހަލފްވޭ ހައުސް ކިޔާ ތަނަކަށް. ހަލފްވޭ ހައުސަކީ ބޮޑަށް ކޮމިއުނިޓީއަށް ރީ އިންޓެގްރޭޓް ކުރުމުގެ ކުރިން އެ

ކުއްޖަކު ބަހައްޓަން ލާޒިމު ކުރާތަން." ވަޒީރު ވިދާޅުވިއެވެ.

"މި ގޮތުން ހަލފްވޭ ހައުސެއްގެ ގޮތުގަ ހއ.ހޯރަ ފުށީގަ އެބަހުރި ތަނެއް ހެދިފަ. އެތަންވެސް ހުރީ އަދި ނުހުޅުވި އަޅުގަނޑުމެންނާ ހިސާބަށް އައި އިރު.

އަޅުގަނޑުމެންނަށް މި ދެންނެވި ސްޓެޕް ވަން، ދ. ކުޑަހުވަދޫގަ މަރުކަޒު ނުހުޅުވިއެއް ސްޓެޕް 2 އަކަށް ދެވުމަކީ އެއީކީ ކުރެވޭނޭ ކަމެއް ނޫން މިނިޒާމުގަ. އެހެންމަ އަޅުގަނޑުމެން މިހާރު ނަގާފަ އިން އެއް ޑެސިޝަން އަކީ ހޯރަފުށީގަ ހުރިތަން އަޅުގަނޑުމެން ފުރަތަމަ ފަށްޓާނީ ޖުވެނައިލް ރެސިޑޭންޝަލް ޓްރީޓްމެންޓް ސެންޓަރެއްގެ ގޮތުގަ ކަމަށް. އަޅުގަނޑުމެން އިރާދަ ކުރެއްވިއްޔާ މި ފެށޭ ހަފްތާގަ އެތަން ހުޅުވާނަން."

ނޫސްވެރިންގެ ބައްދަލުވުމުގައި ވަޒީރު އިތުރަށް ވިދާޅުވިއެވެ.