ރައީސް ޔާމީން މިނިވަން ކުރުމަށް ގޮވައިލައި ޕެޓިޝަނެއްގައި ސޮއިކުރަން ފަށައިފި

މަނީލޯންޑަރިންގެ ކުށް ސާބިތުވެ، ފަސް އަހަރަށް ޖަލަށްލުމަށް ހުކުމްކޮށްފައިވާ ކުރީގެ ރައީސް އަބްދުﷲ ޔާމީން އަބްދުލްގައްޔޫމް މިނިވަން ކުރުމަށް ގޮވައިލައި، މުޅި ރާއްޖޭގައި ޕެޓިޝަނެއްގައި ސޮއިކުރަން ފަށައިފިއެވެ.

ރައީސް ޔާމީން މިނިވަން ކުރުމަށް ގޮވައިލައި މިރޭ ކާނިވާ ސަރަހައްދުގައި އިދިކޮޅު ކޯލިޝަނުން ބޭއްވި ޖަލްސާގައި ވާހަކަ ދައްކަވަމުން، އިދިކޮޅު އިހުތިޖާޖުގެ ލީޑަރެއް ކަމަށްވައި އަބްދުﷲ މުހައްމަދު (މަދަނީ އަބްދުﷲ) ވިދާޅުވީ، ރައީސް ޔާމީން މިނިވަން ކުރުމަށް ގޮވައިލައި ޕެޓިޝަނެއްގައި މިރޭ ސޮއިކުރަން ފަށާފައިވާ ކަމަށެވެ.

ކާނިވާ ސަރަހައްދުގައި މިރޭ ސޮއިކުރަން ފަށާފައިވާއިރު، ޕީޕީއެމްގެ އޮފީސް ކުރިމަތީގައިވެސް ސޮއިކުރުމުގެ ހަރަކާތް ކުރިޔަށް ދާނެ ކަމަށެވެ. މިޕެޓިޝަނުގައި ސޮއިކުރުން ރާއްޖޭގެ ހުރިހާ ރަށެއްގައިވެސް ކުރިޔަށް ދާނެ ކަމަށް އަބްދުﷲ ވިދާޅުވިއެވެ.

''މިރޭ ވަރަށް މުހިންމު ކަމެއް ފެށިގެންދާނެ. ރައީސް ޔާމީން މިނިވަން ކުރުމަށް ގޮވައިލައި ޕެޓިޝަނެއްގައި މިރޭ ވަނީ ސޮއިކުރަން ފަށާފައި. ޖަލްސާގެ ތެރެއިންވެސް ޕީޕީއެމް އޮފީސް ކުރިމަތީގައިވެސް، ޕީޕީއެމްގެ އޮފީހުގައިވެސް ޕެޓިޝަނުގައި ސޮއިކުރުމުގެ ކަންކަން ކުރިޔަށް ދާނެ. މިޕެޓިޝަންގައި ސޮއިކުރާނެ މުޅި ރާއްޖޭގައި.'' އަބްދުﷲ ވިދާޅުވިއެވެ.

އަބްދުﷲ ވިދާޅުވީ، އިހުތިޖާޖުގެ އިސް ވެރިން ހައްޔަރުކުރެވިދާނެ ކަމަށާއި ނަމަވެސް އެނބުރި އަންނާނެ ކަމަށެވެ. ސަރުކާރުން ދައްކައި ބިރަށް ފަސް ނުޖެހޭނެ ކަަން ފާހަގަކުރައްވައި އަބްދުﷲ ވަނީ އިހުތިޖާުޖު ރެޔަކަށްވުރެ ރެޔެއް ވަރުގަދަ ކުރުމަށް ވެސް ގޮވައިލައްވަައިފައެވެ.

ރައީސް ޔާމީންގެ މައްޗަށް އިއްވި ހުކުމާއި ގުޅިގެން އިދިކޮޅުން ދަނީ އެކަމާއި ނުރުހުން ފާޅުކޮށް ޕީޕީއެމް އޮފީސް ކުރިމަތީގަޔާއި، ކާނިވާ ސަރަހައްދުގައި މުޒާހަރާ ކުރަމުންނެވެ. އެ އެއްވުންތައް ރޫޅައިލުމަށް ފުލުހުން ކުރާ މަސައްކަތަށް ހުރަސްއެޅުމުން ބައެއް ފަރާތްތައް ހައްޔަރުކުރާއިރު، ބައެއް މީހުންނަށް އަނިޔާވެސް ލިބިފައިވެއެވެ.