ލޯނުތައް ދައްކަން މީގެކުރިން ހޭދަނުކުރާވަރަށް ހޭދަކޮށްފި

މީގެ ކުރިން އެކި އަހަރުތަކުގައި ސަރުކާރުގެ ހަރަދުތައް ފޫބެއްދުމަށް ނެގި ލޯނުތައް އަދާކުރުމަށް މީގެކުރިން ނުކުރާވަރަށް މިއަހަރުގެ ތެރޭގައި ހޭދަކޮށްފައިވާކަމަށް މާލީ ވުޒާރާގެ ތަފާސްހިސާބުތަކުން ދައްކައިފިއެވެ.

ފިނޭންސް މިނިސްޓްރީން ނެރެފައިވާ ވީކްލީ ފިސްކަލް ޑިވެލޮޕްމަންޓް ރިޕޯޓަށް ބަލާއިރު، ހުސްވި ހަފްތާގެ ނިޔަލަށް ލޯނުތައް އަދާކުރުމަށް ކުރި ހޭދައިގެ ޖުމްލަ އުޅެނީ 3.9 ބިލިއަން ރުފިޔާގައެވެ. ފިނޭންސްގެ ރެކޯޑްތަކުން ދައްކާގޮތުގައި މިއީ އަދި ރެކޯޑެކެވެ. މިދިޔަ އަހަރުގެ މި މުއްދަތުގެ ތެރޭގައި ލޯނުތައް ދެއްކުމަށް ހޭދަކޮށްފައިވަނީ، 1.6 ބިލިއަން ރުފިޔާއެވެ.

ރައްޔިތުން މަޖިލީހުގެ މިއަހަރަށް ފާސްކުރި ބަޖެޓްގައިވާގޮތުން ލޯނުތައް ދެއްކުމަށް ފާސްކުރި އަދަދުކަމަށް ކަނޑައަޅާފައިވަނީ، 3.8 ބިލިއަން ރުފިޔާއެވެ.

ސަރުކާރަށް ދައްކަންޖެހޭ ދަރަނިތައް ދެއްކުމުގެ މުއްދަތު ކައިރިވަމުން އަންނައިރު، ދާދިފަހަކުން އިންޑިއާ ސަރުކާރުން ވަނީ، މީގެ ކުރިން އެޤައުމުން ނެގި ބައެއް ލޯނުތައް އަނބުރާ ދައްކަންޖެހޭ މުއްދަތު ފަސްކޮށްދީފައވެެ. މީގެ ތެރޭގައި ކުރީގެ ސަރުކާރުން 2019 ވަނަ އަހަރު ބަޖެޓް ސަޕޯޓަށް ބޭނުންވާ ފައިސާ ހޯދުމަށް އިންޑިއާއިން 50 މިލިއަން ޑޮލަރުގެ ލޯނު ހިމެނެއެވެ.

ކުރީ ސަރުކާރުތަކުން ބޭރުގެ އެކި ފަރާތްތަކުން ނަގާފައިވާ ކުރު މުއްދަތުގެ ދަރަނީގެ މައްސަލައަކީ މި ސަރުކާރަށް ކުރިމަތިލާން ޖެހިފައިވާ ގޮންޖެހުމެއްކަމަށް ސަރުކާރުން ވަނީ މީގެ ކުރިން ބުނެފައެވެ.

ކުރިއަށްއޮތް އަހަރު ވެގެންދާނީ ރާއްޖޭގެ ތާރީހުގައިވެސް އެންމެ ބޮޑު އަދަދަކުން ދަރަނިތައް ދައްކަންޖެހޭނެ އަހަރަށްކަމަށް މާލީ ވުޒާރާއިން ވަނީ ބުނެފައެވެ. އެގޮތުން ބޭރުގެ އެކި ފަރާތްތަކުން ނަގާފައިވާ ލޯނުތަކުގެ އިންޓަރެސްޓާއެކު 1 ބިލިއަނަށްވުރެ ގިނަ ޑޮލަރު ދައްކަންޖެހޭަނޭކަމަށް މާލީ ވުޒާރާއިން ފާހަގަކުރެއެވެ. އެއީ ދިވެހި ރުފިޔާއިން ބަލާނަމަ 15 ބިލިއަނަށްވުރެ ގިނަ ރުފިޔާއެވެ.

އަންނަ އަހަރު ދައްކަންޖެހޭ 1 ބިލިއަން ޑޮލަރުގެ ތެރޭގައި ހިމެނެނީ 2021 ވަނަ އަހަރު ވިއްކާފައިވާ ސަވަރިން ސުކޫކަށް ދައްކަންޖެހޭ 500 މިލިއަން ޑޮލަރެވެ.