އުނގޫފާރުގައި ބުޅާގިނަވުމުން ބުޅާ މެރުމުން ފައިސާދެނީ

ބުޅާ ގިނަވުމުގެ ސަބަބުން އުނދަގޫވާކަމަށްބުނެ، ބުޅާ މެރުމުން ބަދަލުގައި ފައިސާދޭނެ އުސޫލެއް ރ.އުނގޫފާރު ރަށު ކައުންސިލުން އިއުލާންކޮށްފިއެވެ.

އެރަށުގެ ކައުންސިލުން ސަރުކާރުގެ ގެޒެޓްގައި ކޮށްފައިވާ އިއުލާނެއްގައި ވާގޮތުގައި ބުޅަލުގެ ސަބަބުން ގޭގޭގެ ފުރާޅުން ފެންނެގުމަށާއި މީހުންނަށް އުދަގޫވާކަމުގެ ޝަކުވާ ކައުންސިލަށް ލިބެމުންދާ ކަމަށެވެ.

އެހެންކަމުން އެރަށުން ބުޅާމަދުކުރުމުގެ ޕްރޮގުރާމެއް ހިންގުމަށް ކައުންސިލުންވަނީ ނިންމާފައިވާކަމަށް އިއުލާނުގައި ވަނީ ބުނެފައެވެ. އަދި އަމިއްލަ ބޭނުންތަކަށް ގެންގުޅޭ ބުޅާ ގެންގުޅެންވަނީ އާންމުންނަށް އުނދަގޫނުވާގޮތަށްކަމަށް ކައުންސިލުން ވަނީ ބުނެފައެވެ.

އިއުލާންގައި ބުނީ ބުޅަލުގެ އުދަގޫކުޑަކުރުމަށްޓަކާ ބުޅާ ހިފާ ކައުންސިލާއި ހަވާލްކުރުމުން ކޮންމެ 3 ބުޅަލަކަށް -/100 (ސަތޭކަ ރުފިޔާ) ދިނުމަށް ކައުންސިލުން ވަނީ ނިންމާފައިކަމަށެވެ.

މި ބުޅާތައް ބަލައިގަންނާނީ ހެނދުނު 8:30 ން މެންދުރު 11:00 އަށެވެ. މިޕްރޮގުރާމް ކުރިއަށްދާނީ 30 ނޮވެމްބަރ 2019 ގެ ނިޔަލަށެވެ.

ރާއްޖޭގެ މީޑިޔާއެއްކަމުގައިވާ "ސަން" އަށް މައުލޫމާތުދެއްވަމުން އެރަށު ކައުންސިލްގެ ރައީސް އަބްދުއް ނާސިރު ވިދާޅުވީ، ފައިސާ ލިބޭނީ ބުޅާ މަރާލުމަށް ފަހު ކައުންސިލާ ހަވާލުކުރުމުން ކަމަށެވެ

މިގޮތަށް ގެނެވޭ ބުޅާތައް ރައްކާތެރިކަމާއި އެކު ވަޅުލުމަށް ކައުންސިލުން ވަނީ ނިންމާފައެވެ.