ބަންގްލަދޭޝް ނޫސްވެރިންގެ ފާސްތައް ކެންސަލް ކޮށްފި
ލިޔުންތެރިޔާ
އަބްދުﷲ ހުސައިން
ބަންގްލަދޭޝްގެ ޕްރެސް އިންފޮރމޭޝަން ޑިޕާޓްމަންޓުން އެގައުމުގައި ހަރަކާތްތެރިވާ އެގައުމުގެ ނޫސްވެރިންނަށާއި ބައިނަލްއަގްވާމީ ނޫސްވެރިންނަށް ދޫކޮށްފައިވާ ފާސްތައް ކެންސަލްކޮށްފިއެވެ.
ޕްރެސް ކާޑުތަކުގެ އެކްރެޑިޓޭޝަން ކެންސަލްކުރިކަމަށް އިއުލާންކުރަމުން ބަންގްލަދޭޝްގެ ދާޚިލީ ވުޒާރާއިން ބުނީ މިއީ ސަލާމަތީ ސަބަބުތަކަށްޓަކައި އެޅި ފިޔަވަޅެއްކަމަށެވެ. މިއާއެކު ބަންގްލަދޭޝްގެ ސަރުކާރުގެ މައި އޮފީސްތައް ވެރިރަށް ޑާކާގައި ހުންނަ 'ސެކްރެޓޭރިއެޓް' ސަރަހައްދަށް ނޫސްވެރިންނަށް ދެން ނުވަދެވޭނެއެވެ. އަދި ނޫސްވެރިންނަށް ފާސްދޫކުރުމާ ބެހޭ އުސޫލުތައް އަލުން މުރާޖައާކުރުމަށްފަހު، ޕްރެސް ކާޑު ހޯދުމަށް މީޑިއާތަކަށް ފުރުސަތު ހުޅުވާލާނެކަމަށްވެސް ދާޚިލީ ވުޒާރާއިން ބުންޏެވެ. މިކަމުގެ ސަބަބުން ނޫސްވެރިންނަށާއި މީޑީއާތަކަށް ދިމާވާނެ ދަތިތަކަށް ބަންގްލަދޭޝް ސަރުކާރުން މާފަށްވެސް އެދިފައިވެއެވެ.
އާ ކާޑުތައް ދޫކުރެވެންދެން ނޫސްވެރިން ދެން ޖެހޭނީ މިނިސްޓްރީއަކުން ބާއްވާ ކޮންމެ އިވެންޓަކަށް، އެމިނިސްޓްރީއަކުން ޚާއްސަކޮށް އެ އިވެންޓަށް ހުއްދަ ހޯދަންށެވެ. ކުރިން އޮތް ޕްރެސް ކާޑު ބޭނުންކޮށްގެން ނޫސްވެރިންނަށް ފަސޭހަކަމާއެކު ސެކްރެޓޭރިއެޓް ސަރަހައްދަށް ވަދެވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
