ނާޒިމްގެ ކެމްޕެއިން ޓީމާ ހީނާގެ ކެމްޕެއިން ޓީމާ ދެމެދު ކުރިމަތިލުންތަކެއް!
ދިއްގަރު ދާއިރާއަށް ވާދަކުރައްވާ ކެނޑިޑޭޓް އަހުމަދު ނާޒިމްގެ ކެމްޕެއިން ޓީމުން އެދާއިރާއަށް ޕީޕީއެމް ޕީއެންސީ ކޯލިޝަންގެ ފަރާތުން ވާދަކުރައްވާ ކެނޑިޑޭޓް ހީނާ ވަލީދުގެ ކެންޕެއިން ޓީމަށް ހަމަލާދީ މާރާމާރީ ހިންގަން މަސައްކަތް ކޮށްފިކަމަށް ވޮއިސްއަށް މައުލޫމާތު ލިބިއްޖެއެވެ.
ހީނާ ވަލީދުގެ ކެމްޕެއިން މެނޭޖަރ މުއާޒް ހަލީމް ވޮއިސް އަށް މައުލޫމާތު ދެއްވަމުން ވިދާޅުވެފައިވަނީ ދިއްގަރުގައި މިއަދު ހީނާގެ ކެމްޕެއިން ޓީމުން ކެމްޕެއިން ކުރަމުން ދަނިކޮށް އަހުމަދު ނާޒިމްގެ ކެމްޕެއިން ޓީމަށް ނިސްބަތްވާ ބަޔަކު އައިސް ކެމްޕެއިން ހަރަކާތައް ހުރަސް އަޅާ ގައިގައި ޖެހުމަށް އަތް ހޫރައި، މާރާމާރީ ހިންގުމަށް މަސައްކަތް ކޮށްފައިވާކަމަށެވެ.
މުއާޒް ވިދާޅުވީ ނާޒިމްގެ ކެމްޕެއިން ޓީމުުން ހީނާގެ ކެމްޕެއިން ޓީމަށް ފުރައްސާކޮށް މާރާމާރީ ހިންގަން މަސައްކަތް ކޮށްފައިވަނީ ނާޒިމް އަކީ ރައީސް ޔާމީން ތާއީދު ކުރައްވާ ބޭފުޅެއް ނޫންކަމަށް އެމަނިކުފާނު ދިއްގަރުގެ ރައްޔިތުންގެ އަރިހުގައި ވިދާޅުވުނާއި ގުޅިގެންކަމަށެވެ. އަދި މިއަދު މާރާމާރީ ހިންގަން މަސައްކަތް ކޮށްފައިވަނީވެސް ރައީސް ޔާމީން ދިއްގަރުގެ ރައްޔިތުންނާއި ދެއްކެވި ވާހަކަތައް ލައުޑް ސްޕީކާރ އެއް ބޭނުންކޮށްގެން ޕިކަޕެއްގައި ޖަހަމުން ދަނިކޮށް ކަމަށްވެސް މުއާޒް ވިދާޅުވިއެވެ.
މިހާރުވެސް ނާޒިމް ކެމްޕެއިން ކުރައްވަމުން ގެންދަވަނީ ޕީޕީއެމްގެ މުދާލާއި ޕީޕީއެމް ޕީއެންސީގެ ކުލަ ބޭނުންކޮށްގެން ކަމަށް މުއާޒު ވިދާޅުވިއެވެ. އަދި ގޭގެއަށް ގޮސް ކެމްޕެއިން ކުރާއިރުވެސް އޭނާ އަކީ ރައީސް ޔާމީންގެ ތާއީދު ލިބިފައިވާ ކެނޑިޑޭޓެއް ކަމަށާއި، ހީނާ އަށް ވޯޓް ނުދިނުމަށް ބުނަމުން ދާކަމަށްވެސް މުއާޒް ވަނީ ވިދާޅުވެފައެވެ.
އަދި މިވާހަކަތައް ރައީސް ޔާމީންގެ އަރިހުގައި ދެންނެވުމުން، ރައީސް ޔާމިން ދިއްގަރުގެ ރައްޔިތުންނާއި ފޯނުން ގުޅާ ވާހަކަފުޅު ދައްކަވާފައިވާ ކަމަށާއި، އަދި އެވާހަކަތަކުގައި ނާޒިމް އަކީ އެބޭފުޅާގެ ތާއީދު ލިބިގެން ކުރިމަތިލައްވާ ބޭފުޅެއް ނޫން ކަމަށް ވިދާޅުވެފައިވާ ކަމަށް މުއާޒް ވިދާޅުވިއެވެ. އަދި އެބޭފުޅާ ތާއީދު ކުރައްވައިގެން ދިއްގަރު ދާއިރާއަށް ވާދަކުރައްވާފައިވަނީ ހީނާ ވަލީދުކަމަށްވެސް ރައީސް ޔާމީން ވިދާޅުވެފައިވާ ކަމަށް މުއާޒް ވަނ ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
