އެއްދުވަހެއްގައި އެންމެގިނަ ފަތުރުވެރިން ޒިޔާރަތްކުރި ދުވަހަކަށް އިއްޔެ

ރާއްޖޭގެ ފަތުރުވެރިކަމުގެ ތާރީހުގައިވެސް އެއްދުވަހެއްގެ މައްޗަށް އެންމެގިނަ ފަތުރުވެރިން ޒިޔާރަތްކުރި ދުވަހަކަށް އިއްޔެ ވެއްޖެއެވެ.

ޓޫރިޒަމް މިނިސްޓްރީން އެކްސްގައި ކުރި ޕޯސްޓެއްގައި ބުނީ އިއްޔެއަކީ ރާއްޖޭގެ ފަތުރުވެރިކަމުގެ ސިނާއަތުގެ ތާރީހުގައި ރެކޯޑް އަދަދަކަށް ފަތުރުވެރިން ރާއްޖެއަށް ޒިޔާރަތްކުރި ދުވަހެއްކަމަށެވެ. އެގޮތުން އިއްޔެ ރާއްޖެއަށް 10,253 ފަތުރުވެރިން ވަނީ ޒިޔާރަތްކޮށްފައެވެ. މިހާތަނަށް އެއްދުވަހެއްގެ ތެރޭގައި އެންމެގިނައިން ފަތުރުވެރިން ޒިޔާރަތްކޮށްފައިވަނީ 2024 ވަނަ އަހަރުގެ ފެބުރުއަރީމަހުގެ 10 ވަނަ ދުވަހުއެވެ. އެ ދުވަހު ރާއްޖެއަށް 10,213 ފަތުރުވެރިން އައެވެ.

ކޮންމެ ހަފްތާއެއްގެވެސް އާދިއްތަދުވަހަކީ ވެލާނާ އިންޓަރނޭޝަނަލް އެއާޕޯޓަށް އެންމެ ބާރުބޮޑުވާ ދުވަހެވެ. ވެލާނާ އިންޓަރނޭޝަނަލް އެއާޕޯޓްގެ އައު ޓާމިނަލް ހުޅުވުމާއެކު ވީއައިއޭގެ ހިދުމަތް ދިނުމުގެ ގާބިލުކަން އިތުރުވުމާއެކު ރާއްޖެއަށް އަންނަ ފްލައިޓްތަކުގެ އަދަދުވަނީ ވަރަށްބޮޑަށް އިތުރުވާން ފަށާފައެވެ.

ޓޫރިޒަމް މިނިސްޓްރީގެ ތަފާސްހިސާބަށް ބަލާއިރު އިއްޔެގެ ނިޔަލަށް ރާއްޖެއަށް ވަނީ 235,041 ފަތުރުވެރިން ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު، 4.8 އިންސައްތައިގެ އިތުރުވުމެކެވެ. މިދިޔަ އަހަރުގެ މި މުއްދަތުގެ ތެރޭގައި ރާއްޖެއަށް ޒިޔާރަތްކޮށްފައިވަނީ، 224,358 ފަތުރުވެރިންނެވެ.

ވެލާނާ އިންޓަރނޭޝަނަލް އެއާޕޯޓްގެ އައު ޓާމިނަލް ހުޅުވުމާއެކު ރާއްޖެއަށް ޒިޔާރަތްކުރާ ފަތުރުވެރިންނަށް ހިދުމަތް ދިނުމުގެ ގާބިލްކަން އިތުރުވެގެން ގޮސްފައިވާއިރު، ސަރުކާރުގެ އަމާޒަކީ އައުޓާމިނަލާއެކު އަހަރެއްގެ ތެރޭގައި 7.5 މިލިއަން ފަސެންޖަރުންނަށް ހިދުމަތް ދިނުމެވެ.