ހުރިހާ ގައުމަކުން އަބަދު އެއްބާރުލުމެއް ނުލިބޭނެ؛ ބައެއް ފަހަރު ކަންކަން ނުރަނގަޅު ދިމާއަށްވެސް ދޭ: ޖައިޝަންކަރު

ހުރިހާ އިރެއްގައި ހުރިހާ ގައުމަކުން އިންޑިއާއަށް އެއްބާރުލުން ނުލިބޭނެ ކަމަށް ގަބޫލުކުރައްވާ ކަމަށް އެކްސްޓާނަލް އެފެއާޒް މިނިސްޓަރު އެސް ޖައިޝަންކަރު ވިދާޅުވެއްޖެ އެވެ.

އިންޑިއާގެ މަހާރާޝްތުރާ ސްޓޭޓުގެ ނާގްޕޫރުގައި ބޭއްވި ހާއްސަ ޓައުންހޯލް ބައްދަލުވުމެއްގައި އިންޑިޔާގެ ރައްޔިތަކު ވަނީ، އިންޑިޔާއާއި ދިވެހިރާއްޖެއާއި ދެމެދު އުފެދިފައިވާ ނުތަނަވަސްކަމާއި ގުޅޭގޮތުން ޖެއިޝަންކަރު އާ ސުވާލު ކޮށްފައެވެ. އަދި ދުނިޔޭގެ އެކި ގައުމު ތަކުގައި، ސަރުކާރު ބަދަލުވުމުން، އެ އަންނަ ބަދަލުގެ ތެރެއިންވެސް، އެ އިންޑިޔާއަށް އެންމެ މަސްލަހަތު ހުރި ގޮތް ޔަގީންކުރަނީ ކިހިނެއްތޯ އޭނާ ވަނީ ސުވާލުކޮށްފަ އެވެ.

އެ ސުވާލަށް ޖަވާބު ދެއްވަމުން ޖެއިޝަންކަރު ވިދާޅުވީ، އިންޑިޔާއިން ގެންގުޅެމުންދަނީ "ނެއިބަރ ހޫޑް ފަސްޓް" ޕޮލިސީ ކަމަށެވެ.

އެހެންނަމަވެސް، ސިޔާސީ ކަންކަމަކީ ސިޔާސީ ކަންކަން. އެހެންވީމާ، ކޮންމެ ގައުމެއްގައި، ކޮންމެ ދުވަހަކު، އެ ގައުމެއްގެ އެންމެން އަހަރެމެންނަށް އެއްބާރުލުންދީ އަހަރެމެންނާ އެއްބަސްވާނެ ކަމުގެ ޔަގީންކަން އަހަރެންނަށް ނުދެވޭނެ.

އެކްސްޓާނަލް އެފެއާޒް މިނިސްޓަރު އެސް ޖައިޝަންކަރު

ކަން މިހެން ހުރުމުން، ފާއިތުވެދިޔަ 10 އަހަރު ތެރޭގައިވެސް، އިންޑިޔާއިން މަސައްކަތް ކޮށްފައިވާނީ ގައުމުތަކާއި ވަރަށް ވަރުގަދަ ގުޅުމެއް ބަދަހި ކުރެއްވުމަށް ކަމަށް އޭނާ ވިދާޅުވި އެވެ.

އަދި އޭގެ ސަބަބުން، އެ ގައުމު ތަކުގެ ސަރުކާރު ބަދަލުވި ނަމަވެސް، އެ ގައުމުގެ ރައްޔިތުންނާ މުޖުތަމައު، އިންޑިޔާއާއި މެދު ރަނގަޅަށް ދެކި، އިންޑިޔާއާއި އެ ގައުމާއި ދެމެދު އޮންނަ ގުޅުމުގެ މުހިންމުކަން ގައުމުތަކުގެ ރައްޔިތުންނަށް އިހްސާސް ކުރެވޭނެ ކަމަށް އޭނާ ވިދާޅުވި އެވެ.

އެގޮތުން ގުޅުން ބަދަހި ކުރުމަށްޓަކައި، އެ ގައުމުތަކުގައި އުމްރާނީ އެކިއެކި މަޝްރޫޢުތައް ހިންގައި، އިގުތިސޯދީ ގޮތުންނާއި، ވިޔަފާރި އާއި އިންވެސްޓުމަންޓުތަކުގެ އިތުރުން ގައުމުތަކަށް ޗުއްޓީއަށް ދިޔުން ފަދަ ކަންކަން ކުރުމާއި އެނޫންވެސް ކުރެވެމުންދާ ކަމަށް އޭނާ ވިދާޅުވި އެވެ.

"މި ހުރިހާ ކަމަކީ މި ގުޅުންތައް ތަރައްގީކުރެވޭނެ ގޮތްތައް. ބައެއް ބައެއް ފަހަރު ކަންކަން ރަނގަޅު ނޫން ގޮތް ގޮތަށްވެސް ދޭ. އެހެންވީމާ، އަހަރެމެން ޖެހޭނީ، މަޝްވަރާކޮށް، ކަންކަން ކުރިން އޮތް ގޮތަށް އިއާދަ ކުރެވޭތޯ މަސައްކަތް ކުރަން"

އެކްސްޓާނަލް އެފެއާޒް މިނިސްޓަރު އެސް ޖައިޝަންކަރު

ޖައިޝަންކަރު މިފަދައިން ވާހަކަ ދައްކާފައި މިވަނީ، ރާއްޖެ އާއި އިންޑިޔާގެ ދެމެދުގައި މަސްލަހަތު ގޯސްވެ, ރާއްޖެ ބޯއިކޮޓް ކުރަން އިންޑިޔާއިން ގޮވާލާ އަޑު ގަދަވެފައިވާ ދަނޑިވަޅެއްގައި އިންޑިޔާ ނޫން އެހެން ގައުމަތުން އެކި އެހީ ހޯދަން ދިވެހި ސަރުކާރުން ނިންމާފައިވާ ދަނޑިވަޅެއްގައި ކަން ފާހަގަކޮށްލަން ޖެހެއެވެ.