ސިފްކޯ ހިޔާ ފްލެޓްތައް ކުއްޔަށް ދޭނަމަ އަތުލާނަން: އެމްއެންޑީއެފް
ސިފައިންނާއި ސިފައިންގެ އާއިލާތަކަށް ބޯހިޔާވަހިކަން ފޯރުކޮށްދިނުމަށް ދޫކޮށްފައިވާ ސިފްކޯ ފްލެޓުތައް ކުއްޔަށް ދޭނަމަ އެތަންތަން އަތުލާނެ ކަމުގެ އިންޒާރު މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ދީފިއެވެ.
އެމްއެންޑީއެފްގެ މީޑިއާ އޮފިޝަލަކު ވިދާޅުވީ ސިފްކޯ ފްލެޓްތައް ދޫކޮށްފައިވާ މީހުންނާއެކު ހަދާފައިވާ އެއްބަސްވުމުގައިވާ ގޮތުން އެތަންތަން ކުއްޔަށް ދޫކުރުމަކީ މަނާ ކަމެއް ނަމަވެސް އެޕާޓްމަންޓުތައް ކުއްޔަށްދޭ މައްސަލަ އެމްއެންޑީއެފްގެ ސަމާލުކަމަށް އައިސްފައިވާ ކަމަށެވެ.
އެއްބަސްވުމާ ޚިލާފަށް އެކަން ކުރަމުންދާ ފަރާތްތަކަށް އެގޮތަށް ޢަމަލު ނުކުރުމަށް އަންގާ އިންޒާރު ދީފައިވާކަމަށާއި، މިހާތަނަށް އަދި އެއްވެސް ފްލެޓެއް އަތުލާފައި ނުވާކަމަށް އެމްއެންޑީއެފްގެ މީޑިޔާ އޮފިޝަލް ވިދާޅުވިއެވެ.
ސިފްކޯ ހިޔާ ފްލެޓްތަކަކީ 2013 ވަނަ އަހަރު ކުރީގެ ރައީސް ޑރ. މުޙައްމަދު ވަޙީދު ހަސަން މަނިކުގެ ވެރިކަމުގައި ފެށި މަޝްރޫޢެކެވެ. ހުޅުމާލޭގައި، ތިން ޓަވަރުގައި 345 އެޕާޓްމަންޓު ޢިމާރާތްކޮށް އެތަންތަން ލިބުނު ސިފައިންނަށް ތަޅުދަނޑިތައް ހަވާލުކޮށްފައިވަނީ މިދިޔަ އަހަރުގެ ސެޕްޓެމްބަރު މަހުގައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
