ޕޭޕަލްގެ ޚިދުމަތް ރާއްޖެއަށް ގެނައުމަށް ސަރުކާރުން މަސައްކަތް ފަށައިފި

ރާއްޖޭގައި އޮންލައިން ވިޔަފާރި ކުރުމަށް ހުރި ހުރަސްތައް ނައްތާލުމަށްޓަކައި، ދުނިޔޭގެ އެންމެ މަޝްހޫރު އޮންލައިން ޕޭމަންޓް ޕްލެޓްފޯމްތަކުގެ ތެރެއިން އެއް ޕްލެޓްފޯމް ކަމަށްވާ ޕޭޕަލްގެ ޚިދުމަތް ރާއްޖެއަށް ގެނައުމަށް ސަރުކާރުން މަސައްކަތް ފަށައިފިއެވެ.

މިކަމާ ގުޅޭގޮތުން އިކޮނޮމިކް މިނިސްޓަރު މުޙައްމަދު ސައީދު ވަނީ ޕޭޕަލްގެ ގްލޯބަލް މާކެޓިންގެ ރައީސްއާ މުހިންމު މަޝްވަރާތަކެއް ކުރައްވާފައެވެ. މި މަޝްވަރާތަކުގައި ބަހުސްކުރެވުނު މައިގަނޑު މައުޟޫއަކީ ރާއްޖޭގައި އީ-ވޮލެޓްގެ ޚިދުމަތް ތަޢާރަފްކޮށް، ޕޭޕަލްގެ އެކްސެސް ހޯދުމުގެ މަސައްކަތެވެ.

މިނިސްޓަރު ސައީދު ވިދާޅުވި ގޮތުގައި، ރާއްޖޭގައި އޮންލައިން ވިޔަފާރި ކުރުމަށް ދިމާވެފައިވާ ދަތިތައް ނައްތާލުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އިސްކަންދޭ ކަމެކެވެ. އަދި މި މަޤްޞަދު ޙާޞިލްކުރުމަށް ވަރަށް ބޮޑު އަހައްމިއްޔަތުކަމެއް ދެއްވާ ކަމަށް ވެސް އެ މަނިކުފާނު ވިދާޅުވިއެވެ.

ޕޭޕަލްއަކީ އޮންލައިންކޮށް ޕޭމަންޓްގެ ޚިދުމަތްތަކާއި، ބައިނަލްއަޤްވާމީ ފައިސާ ޓްރާންސްފަރ އަދި ވިޔަފާރީގެ ޙައްލުތައް ފޯރުކޮށްދޭ ކުންފުންޏެކެވެ. މި ކުންފުނި މަޝްހޫރުވެފައިވަނީ ރައްކާތެރި މުޢާމަލާތްތަކާއި، ހަރުދަނާ ސެކިއުރިޓީ ފިޔަވަޅުތަކާއި، އެކި އީ-ކޮމާސް ޕްލެޓްފޯމްތަކާއެކު އިންޓަގްރޭޓްވެފައިވާތީއެވެ.

ރާއްޖޭގައި ޕޭޕަލްގެ ޚިދުމަތް ލިބެން ފެށުމުން، އޮންލައިން ވިޔަފާރިވެރިންނަށް ފަސޭހަވެ، ބައިނަލްއަޤްވާމީ މާކެޓަށް ވާސިލުވުމަށް ހުރި ހުރަސްތައް ނެތިގެންދާނެ ކަމަށް ބެލެވެއެވެ. މިއީ ރާއްޖޭގެ އިޤްތިޞާދަށް އިތުރު ކުރިއެރުމެއް ލިބިގެންދާނެ ކަމެއް ކަމެކެވެ.