ކުޅުދުއްފުށި ކަސްޓޯޑިއަލްގައި ހުރި މީހަކު އަމިއްލައަށް މަރުވާން އުޅެފި، އިހުމާލެއް އޮތްތޯ ބަލަނީ

ހދ. ކުޅުދުއްފުށީ ޕޮލިސް ކަސްޓޯޑިއަލްގައި ހުރި މީހަކު އަމިއްލައަށް މަރުވާން އުޅެފި އެވެ.

ދިވެހި ފުލުހުންގެ ޚިދުމަތުން ބުނީ ކުޅުދުއްފުށީ ޕޮލިސް ކަސްޓޯޑިއަލްގައި ހުރި މީހަކު މިރޭ 21:12 ގައި އަމިއްލައަށް މަރުވާން މަސައްކަތް ކޮށްފައިވާ ކަމަށެވެ. އެ މީހާއަށް ކުޅުދުއްފުށި ރީޖަނަލް ހޮސްޕިޓަލްގައި ފަރުވާ ދެމުންދާ ކަމަށެވެ.

އެ މީހާއަކީ މަސްތުގެ ހާލުގައި ހުރެގެން ގޭގެ މުދަލަށް ގެއްލުން ދިން މައްސަލައަކާ ގުޅިގެން މި މަހުގެ ދެވަނަ ދުވަހު ހައްޔަރު ކުރި މީހެކެވެ. އެއީ 35 އަހަރުގެ ދިވެއްސެއް ކަމަށް ވެސް ބުންޏެވެ.

މި ހާދިސާއާ ގުޅިގެން އަޅަން ޖެހޭ ފިޔަވަޅުތަައް އެޅުމަށް ފަހު ކަމާބެހޭ މުއައްސަސާތަކަށް މައުލޫމާތު ހިއްސާކޮށް ހާދިސާގެ ތަހުގީގަށް މޭޖާ ކްރައިމް އިންވެސްޓިގޭޝަންގެ ޓީމެއް ކުޅުދުއްފުއްޓަށް ދާން ތައްޔާރުވެފައިވާ ކަމަށެވެ.

ފުލުހުން ބުނީ މި ހާދިސާއާ ގުޅިގެން އެތެރޭގެ ތަހުގީގެއް ހާއްސަ އިސްކަމެއް ދީގެން ފަށާފައިވާ ކަމަށެވެ.

މީގެ ކުރީން ވެސް ހދ. ކުޅުދުއްފުށީ ޕޮލިސް ކަސްޓޯޑިއަލްގައި ހުރި މީހަކު އަމިއްލައަށް މަރުވާން އުޅުނެވެ. ފަރުވާ ދެނިކޮށް އެ މީހާ މަރުވީ އެވެ. އޭނާ އަކީ އޭނާގެ އަންހެނުންގެ މަރާއި ގުޅިގެން ހައްޔަރު ކޮށްފައި ހުރި މީހެކެވެ.