ސްޓެލްކޯގެ ޕަންޕް ސްޓޭޝަންތައް މަގުމަތިން ނަގަން އެމްޓީސީސީއާ ހަވާލުކޮށްފި!

މާލޭގެ ބޮޑުތަކުރުފާނު މަގުގައި ހުންނަ ސްޓެލްކޯގެ ޕަންޕް ސްޓޭޝަންތައް އެ ތަނުން ނަގައި އެ ދިމާ ފަޅު ހިއްކައިގެން ހަދާ ޕްލެޓްފޯމަކަށް ބަދަލުކުރަން އެމްޓީސީސީއާ ހަވާލުކޮށްފިއެވެ.

މިކަމަށްޓަކައި މިއަދު ބޭއްވި ރަސްމިއްޔާތުގައި ސްޓެލްކޯގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ހުސެން ފަހުމީ އެވެ. އެމްޓީސީސީގެ ފަރާތުން ސޮއިކުރެއްވީ ސީއީއޯ އަބްދުالله ޒިޔާދެވެ.

އެއްބަސްވުމުގައި ސޮއިކުރެއްވުމަށް ފަހު، ނޫސްވެރިންނަށް މަޢުލޫމާތު ދެއްވަމުން ފަހުމީ ވިދާޅުވީ ޕަންޕް ސްޓޭޝަން ނެގުމުގެ މަސައްކަތް ކުރަނީ ސްޓެލްކޯގެ ބަޖެޓުން ގާތްގަނޑަކަށް 7.1 މިލިއަން ރުފިޔާ ހަރަދުކޮށްގެން ކަމަށެވެ. އަދި ޕަންޕު ސްޓޭޝަން ނެގުމަށް ރާވާފައިވަނީ ގާތްގަނޑަކަށް 60 ދުވަސް ތެރޭގައި ކަމަށެވެ.

މި މަސައްކަތް މިކުރަނީ ގާތްގަނޑަކަށް 7.1 މިލިއަން ރުފިޔާ އަޅުގަނޑުމެންގެ ބަޖެޓުން ޚަރަދު ކޮށްގެން. ޕަންޕު ސްޓޭޝަން ނެގުމަށް ރާވާއި މިވަނީ ގާތްގަނޑަކަށް 60 ދުވަސް ތެރޭގައި. އެހެން ނަމަވެސް ޗެލެންޖަސް ތަކެއް އެބަހުރި. އީއައޭ އެޕްރޫވް ވެ. އީއައިއޭ އެޕްރޫވް ވާތާ 60  ދުވަސް ތެރޭގައި އަޅުގަނޑުމެންނަަށް މަސައްކަތް ނިންމާލެވޭނީ.

ހުސައިން ފަހުމީ

މިކަމާއި ގުޅޭގޮތުން މަޢުލޫމާތު ދެއްވަމުން އެމްޓީސީސީގެ ސީއީއޯ ޒިޔާދު ވިދާޅުވީ މަސައްކަތް ފެށުމަށް ކުރަން ޖެހޭ ވަރަށް ގިނަ ކަންތައްތައް ހުރި ކަމަށެވެ. އެގޮތުން އެންމެ ފުރަތަމަ މަސައްކަތާ ގުޅޭ ސާވޭ ހަދަން ޖެހޭ ކަމަށާ، އެއަށް ފަހު ޝީޓްޕައިލްކޮށް ޕްލެޓްފޯމެއް ހަދާނެ ކަމަށާއި އެއަށް ފަހު ސްޓްރަކްޗާ ހަދައި މެޝިނަރީތައް ބަދަލު ކުރަން ފަށާނެ ކަމަށް ވިދާޅުވި އެވެ.

އަދި އޭގެ އެކަން ނިމުމުން މިހާރު ހުރި ޕަންޕް ސްޓޭޝަން ނަގައި، އެ ތަނުގެ ޕޭވްމަންޓް ހަދައި، މަގު ރަނގަޅަށް ހުޅުވާލާނެ ކަމަށާ، އެއާއެކު ރައްޔިތުންނަށް މަގު ބޭނުން ކުރުމުގައި ވަރަށް ބޮޑު ލުއިފަސޭހަތަކެއް ވާނެ ކަމަށް ޒިޔާދު ވިދާޅުވި އެވެ.