ކާނާލިބުން ދަތިވެ، ޣައްޒާގެ ކުޑަކުދިން މަރުވަމުންދާ ރޭޓް އިތުރުވެއްޖެ

ކާނާ ލިބުން ދަތިވެ ޣައްޒާގައި ކުޑަކުދިން މަރުވަމުންދާ ރޭޓް ވަރަށްބޮޑަށް އިތުރުވެއްޖެކަމަށް ގައްޒާ ސިޓީގެ ހެލްތު މިނިސްޓްރީން ހާމަކޮށްފިއެވެ.

ޣައްޒާގެ ހެލްތު މިނިސްޓްރީން ބުނީ ކާބޯތަކެތި ލިބުން ދަތިވުމާއި ގުޅިގެންނާއި ރަނގަޅުކާނާ ނުލިބުމުގެ ސަބަބުން މިފަހުން ޢައްޒާއިން 322ގެ ފުރާނަ ގެއްލުނުއިރު، މީގެ ތެރޭގައި ކުޑަކުދިންގެ އަދަދު 121 އަށް އަރާކަމަށެވެ. ކާނާ ލިބުން ދަތިވުމާ ގުޅިގެން ހުކުރުދުވަހުވެސް ޣައްޒާގެ ތުއްތު އަންހެން ކުއްޖަކުވަނީ ދުނިޔެދޫކޮށްފައެވެ. އިސްރާއީލްގެ އަމަލުތަކުގެ ސަބަބުން ޣައްޒާގައި ބަނޑުހައިހޫނުކަން ކާރިސާއަކަށް ބަދަލުވެގެން ގޮސްފައިވާއިރު، ޣައްޒާގެ ވަށައިގެންވާ ސަރަހައްދުތަކުގެ ހާލަތުވެސް ވަރަށް ގޯސްވެފައިވާކަމަށް އަލްޖަޒީރާއިން ވަނީ ބުނެފައެވެ.

އިސްރާއީލުން ޣައްޒާ ވަށާލައި ކާބޯތަކެތި ވެއްދުމަށް ހުަރަސްތައް ކުރިމަތިކުރުވަމުންދާއިރު، ޔަހޫދީ ސިފައިން ބުނެފައިވަނީ ހަމާސްއިން އަމާންދިނުމުން ނޫނީ ޣައްޒާ ހިފުމަށް ހިންގަމުންގެންދާ ޖަރީމާތައް ހުއްޓާނުލާނެކަށެވެ.

އިސްރާއީލުން މިފަހުން ޣައްޒާއަށް ދޭންފެށި ހަމަލާތަކުގައި 62,895 އަށްވުރެ ގިނަ މީހުން ޝަހީދުވެފައިވާއިރު، 158,927 އަށްވުރެ ގިނަ މީހުން ވަނީ ޒަހަމްވެފައެވެ.