މަތީތަޢުލީމު ދޭ 101 މަރުކަޒެއްގެ ޕްރޮގްރާމްތައް އެމްކިޔުއޭއިން ދެން ގަބޫލެއްނުކުރާނެ!

ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ މިނިސްޓްރީގައި ރަޖިސްޓަރ ނުކުރާ 101 މަތީ ތަޢުލީމު މަރުކަޒެއްގެ ޕްރޮގްރާމްތައް މިއަދުން ފެށިގެން ބާޠިލުކޮށްފައިވާކަމަށް މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ)އިން ބުނެފިއެވެ.

އެ އޮތޯރިޓީން ކުރި އިއުލާނެއްގައި ބުނެފައިވަނީ "މަތީ ތަޢުލީމާއި ތަމްރީނުގެ ޤާނޫނު" ގެ ދަށުން ދިވެހިރާއްޖޭގައި މަތީ ތަޢުލީމާއި ތަމްރީނުދޭ މަރުކަޒުތައް ހިންގޭނީ މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާގައި ރަޖިސްޓަރ ކުރުމަށް ފަހުގައި ކަމަށެވެ.

ަައަދި މިއަދާ ހަމައަށް ރީ-ރަޖިސްޓަރ ކޮށްފައިނުވާ 101 (ސަތޭކަ އެކެއް) މަރުކަޒެއްގެ ނަން ހިމެނޭ ލިސްޓެއް އެ ވުޒާރާއިން އެ އޮތޯރިޓީއާ ޙިއްސާ ކޮށްފައިވާ ކަމަށެވެ.

އެހެންކަމުން، މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާގައިގެ ދަފްތަރު (ކޮލެޖްތަކާއި އިންސްޓިޓިއުޓްތަކުގެ ދަފްތަރު) ގައި ރަޖިސްޓަރ ކޮށްފައިނުވާ މަރުކަޒުތަކުގެ ލިސްޓްގައި ހިމެނޭ 101 މަރުކަޒަކުން ކުރިން ހުއްދަދީގެން ހިންގަމުން އައި ޕްރޮގްރާމްތައް މިއަދުން ފެށިގެން "މަތީ ތަޢުލީމާއި ތަމްރީނުގެ ޤާނޫނު" ގެ 21 ވަނަ މާއްދާގެ (ބ) ގެ ދަށުން އެ އޮތޯރިޓީން ޤަބޫލުނުކުރާނެ ކަމަށް ބުނެފައިވެއެވެ.

މޯލްޑިވްސް ކޮލިފިކޭޝަންސް އޮތޯރިޓީގެ ވެބްސައިޓްގެ "ޕްރޮގްރާމް އެކްރެޑިޓޭޝަން" ބައިގައިވާ "Previously Approved Programs" ލިސްޓުގައި ވާ މަރުކަޒުތަކާ ދިމާލުގައި މިކަން ފާހަގަކޮށް ވެބްސައިޓުގައި ޝާއިޢު ކުރާނެކަމަށްވެސް އެ އިއުލާނުގައި ބުނެފައިވެއެވެ.

”އަދި ކުރިން އެޕްރޫވަލް ދީފައިވާ ޕްރޮގްރާމްތަކުން ކިޔަވާފައިވާ އަދި އެމް.ކިއު.އޭ އަށް ބެޗް އޮޑިޓަށް ފޮނުވާފައިވާ ދަރިވަރުންގެ ސަނަދު މި އޮތޯރިޓީން ޤަބޫލުކުރާނެ ވާހަކަ މާއުލޫމާތަށްޓަކައި ދެންނެވީމެވެ.“ އިއުލާނުގައި ވެއެވެ.