ރާއްޖެއަށް ޕޭޕަލް ތައާރަފްކުރުމަށް ޕްރޮޕޯސަލް ހުށަހަޅައިފި

ރާއްޖޭގައި އޮންލައިން ވިޔަފާރި ކުރުމަށް ހުރި ހުރަސްތައް ނައްތާލުމަށްޓަކައި، ދުނިޔޭގެ އެންމެ މަޝްހޫރު އޮންލައިން ޕޭމަންޓް ޕްލެޓްފޯމްތަކުގެ ތެރެއިން އެއް ޕްލެޓްފޯމް ކަމަށްވާ ޕޭޕަލްގެ ހިދުމަތް ރާއްޖެއަށް ގެނައުމަށްޓަކައި، ދިވެހި ސަރުކާރުގެ ޕްރޮޕޯޒަލް މިދިޔަ ހަފުތާގައި އެ ކުންފުންޏަށް ހުށަހަޅާފައިވާކަމަށް އިޤްތިޞާދީ ތަރައްޤީއާއި ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ދައުލަތުގެ މީޑިއާ، ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވާހަކަފުޅު ދައްކަވަމުން ވަޒީރު ސައީދު ވިދާޅުވީ، އެ ޕްރޮޕޯޒަލް ކުންފުންޏަށް ފޮނުވާފައިވަނީ މީގެ 3 ދުވަސް ކުރިން ކަމަށެވެ. އެއާއިއެކު، ވަރަށް އަވަހަށް މިކަމާއި ގުޅޭ އެއްބަސްވުމަކާއި ހަމައަށް އާދެވޭނެ ކަމަށް އުންމީދުކުރައްވާ ކަމަށް ވަޒީރު ވިދާޅުވިއެވެ.

"އަޅުގަނޑުމެން މި އިންތިޒާރު ކުރަނީ ވަރަށް އަވަހަށް އިރާދަކުރެއްވިއްޔާ ކޮންމެވެސް ކަހަލަ އެއްބަސްވުމަކަށް އަޅުގަނޑުމެންނަށް އާދެވޭނެ ކަމަށް. ސީދާ އަޅުގަނޑު ނެތިން ދަންނަވާކަށް މިވެނި ދުވަހަކުއޭ ޕޭޕަލްގެ ހިދުމަތް ރާއްޖޭގައި ފެއްޓޭނީ. އެހެން ނަމަވެސް އިރާދަކުރެއްވިއްޔާ ޕޭޕަލް ރާއްޖެ އަށް ގެނެވޭނެ އަޅުގަނޑުމެންނަށް،"

ވަޒީރު ސައީދު ވިދާޅުވިއެވެ.

ރާއްޖެ އަށް ޕޭޕަލްގެ ހިދުމަތް ތައާރަފްކުރުމަކީ ރައީސް ޑރ.މުޙައްމަދު މުޢިއްޒުގެ ރިޔާސީ ވައުދަކަށްވާއިރު، މި ހިދުމަތް ރާއްޖެ އަށް ތައާރަފް ކުރުމަށްޓަކައި ސަރުކާރުން ކުރަމުންދާ މަސައްކަތުގެ ތެރެއިން ވަޒީރު ސައީދު ވަނީ މިދިޔަ މަހުގެ 22 ވަނަ ދުވަހު، ޕޭޕަލްގެ ގްލޯބަލް މާކެޓިންގެ ރައީސްއާ މުހިންމު މަޝްވަރާތަކެއް ކުރައްވާފައެވެ.

ޕޭޕަލްއަކީ އޮންލައިންކޮށް ޕޭމަންޓްގެ ޚިދުމަތްތަކާއި، ބައިނަލްއަޤްވާމީ ފައިސާ ޓްރާންސްފަރ އަދި ވިޔަފާރީގެ ޙައްލުތައް ފޯރުކޮށްދޭ ކުންފުންޏެކެވެ. މި ކުންފުނި މަޝްހޫރުވެފައިވަނީ ރައްކާތެރި މުޢާމަލާތްތަކާއި، ހަރުދަނާ ސެކިއުރިޓީ ފިޔަވަޅުތަކާއި، އެކި އީ-ކޮމާސް ޕްލެޓްފޯމްތަކާއެކު އިންޓަގްރޭޓްވެފައިވާތީއެވެ.