މީޑިއާ ކޮމިޝަނަށް ފަރުސަތު، ސަފާ އަދި ސަރާހަތު އައްޔަނުކުރަން ފާސްކޮށްފި
ލިޔުންތެރިޔާ
އަބްދުﷲ ހުސައިން
މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނަށް ކުރިމަތިލި ބޭފުޅުންގެ ތެރެއިން ތިން ބޭފުޅަކަށް ރުހުން ދިނުމަށް ރައްޔިތުންގެ މަޖިލީހުގެ ތަޅުމުން މިއަދު ފާސްކޮށްފިއެވެ.
އެ ތިން ބޭފުޅުންނަށް މިނިވަން މުއައްސަސާތަކާ ބެހޭ ކޮމިޓީން ރުހުން ދީފައިވަނީ އިއްޔެއެވެ. ކޮމިޝަނަށް ކުރިމަތިލެއްވި 10 ބޭފުޅުންގެ ތެރެއިން ދެ ބޭފުޅަކު އިންޓަވިއު މަރުހަލާގެ ކުރިން ނަން އަނބުރާ ގެންދެވިއެވެ. އަދި ބާކީ ތިބި އަށް ބޭފުޅުންނާ އިންޓަވިއު ކުރުމަށްފަހު ކޮމިޓީން ވަނީ މާކްސް ދީފައެވެ. މަޖިލީހުގެ ގަވާއިދުގައިވާ ގޮތުން، ކޮމިޓީން ވޯޓަށް އެހުމަށް މަޖިލީހުގެ ތަޅުމަށް ފޮނުވޭނީ 75 އިންސައްތައަށްވުރެ މަތިން މާކްސް ލިބޭ ބޭފުޅުންގެ ނަންތަކެވެ.
މަޖިލީހުގެ ތަޅުމުގައި މިއަދު ވޯޓަށް އެހުމުން ފާސްވި ތިން ބޭފުޅުންގެ ތެރޭގައި ހިމެނެނީ ބްރޯޑްކާސްޓިން ކޮމިޝަނުގެ ކުރީގެ ރައީސް ޞަފާ ޝަފީގާއި ކުރީގެ މެންބަރު އައިމިނަތު ސަރާހަތު އިއްޒަތުގެ އިތުރުން މުހައްމަދު ފަރުޝަތަށެވެ. މި ތިން ބޭފުޅުން އައްޔަނުކުރުމަށް 54 މެމްބަރުންގެ ވޯޓު ލިބުނެވެ.
ހަތް މެންބަރުންގެ މައްޗަށް އެކުލެވޭ މީޑިއާ އެންޑް ބްރޯޑްކާސްޓިން ކޮމިޝަނަށް މަޖިލީހުން އައްޔަންކުރާނީ ތިން މެންބަރުންނެވެ. މިހާރު ވަނީ އިންތިޚާބަކާ ނުލައި ބްރޯޑްކާސްޓަރުންނާއި އެހެނިހެން މީޑިއާތަކުން ހަތަރު މެންބަރުން އިންތިޚާބުވެފައެވެ. މަޖިލީހުން އައްޔަންކުރާ މެންބަރުންނާއެކު މީޑިއާ އެންޑް ބްރޯޑްކާސްޓިން ރެގިއުލޭޝަން ޤާނޫނުގެ ދަށުން އުފެދޭ ފުރަތަމަ މީޑިއާ އެންޑް ބްރޯޑްކާސްޓިން ކޮމިޝަނަށް މެންބަރުން ހަމަވާނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
