ޔޮޓެއްގައި ރާއްޖެއަށް 21 މިލިއަން ރުފިޔާގެ ހަޝިޝް އޮއިލް އެތެރެކުރަން އުޅުނު ބަޔަކު އަތުލައިގެންފި

އިންޑިއާގެ ޔޮޓެއްގައި ދިވެހިރާއްޖެއަށް 12 ކިލޯގެ ހަޝިޝް އޮއިލް އެތެރެކުރަން އުޅުނު 4 މީހަކު އިންޑިއާގެ ޑައިރެކްޓަރޭޓް އޮފް ރެވެނިއު އިންޓެލިޖެންސް (ޑީއާރްއައި) އިން ހައްޔަރުކޮށްފިއެވެ.

އިންޑިޔާގެ ނޫސްތަކުން ރިޕޯޓް ކޮށްފައިވާ ގޮތުގައި، ރާއްޖެއަށް މަސްތުވާތަކެތި އެތެރެކުރަން އުޅޭ ކަމުގެ މައުލޫމާތު ލިބުމާ އެކު ޑީއާރުއައި އިން ވަނީ ޓުޓިކޮރިންގެ ޕޯޓު ސަރަހައްދުގެ ސެކިއުރިޓީ ވަރުގަދަ ކޮށްފަ އެވެ.

އަދި މިދިޔަ ބުދަ ދުވަހު އެ ސަރަޙައްދުގައި ދުއްވަމުންދިޔަ ދެމީހަކު ސައިކަލުން ހުއްޓުވައި، އެމީހުންގެ އަތުގައި އޮތް ދަބަހެއް ބަލައި ފާސްކޮށްފައުވާއިރު، އެ ދަބަހުގައި ކަޅު ކުލައިގެ ދިޔާ މާއްދާއެއް ހުރި 12 ކޮންޓެއިނަރެއް ފެނުނު ކަމަށް ބުނެފައުވެއެވެ. އެ ކެމިކަލް ތަޙުލީލުތަކުން ދައްކާގޮތުގައި މިއީ ހަޝިޝް އޮއިލް ކަންވެސް ފާހަގަކޮށްފައިވެއެވެ.

ހަޝިޝް އޮއިލްގެ މަގުމަތީ އަގަކީ ކިލޯއަކަށް 1.8 މިލިއަން ރުފިޔާ އެވެ. އެހެންވެ، އަތުލައިގަތް ހަޝިޝް އޮއިލްގެ އަގު 21 މިލިއަން ރުފިޔާއަށް އަރާނެ ކަމަށް ލަފާކުރެ އެވެ.

މި މައްސަލައާ ގުޅިގެން ހައްޔަރުކުރެވުނު 4 މީހުންނަކީ ޓުޓިކޯރިންގެ ފާތިމާ ނަގަރުގެ ރާޖާ އުރުފު ޖެސުރާޖާ (34 އަހަރު) އާއި ސުދަކަރު (33 އަހަރު)، އަދި ޖޯޖް ރޯޑުގެ ކިންގްސްލީ (56 އަހަރު) އާއި ސޯރިސްޕުރަމްގެ މަރިމުތު (30 އަހަރު) އެވެ.

މަރިމުތުއަކީ ސީއައިއެސްއެފްގެ މުވައްޒަފެކެވެ. އޭނާ މި ޢަމަލުގައި ބައިވެރިވެފައިވަނީ ސެކިއުރިޓީ ގޭޓުން ހަޝިޝް އޮއިލް ފޮށިތައް ނެރުމަށް އެހީތެރިވެދީގެންނެވެ.

މި 4 މީހުންވެސް ބަންދު ކޮށްފައިވާ ކަމަށް މީޑިއާ ރިޕޯޓްތައް ބުނެއެވެ:

އެ މައްސަލާގައި ފުލުހުންގެ ތަރުޖަމާނު އަހުމަދު ޝިފާން ވިދާޅުވީ އެ ކޭސްގެ މައުލޫމާތު ހިއްސާކުރުމަށް އިންޑިއާގެ ކަމާ ގުޅޭ އިދާރާތަކަށް ރަސްމީކޮށް އަންގާފައިވާ ކަމަށެވެ. އަދި މިހާތަނަށް ޖަވާބެއް ނުލިބޭ ކަމަށް ވެސް ވިދާޅުވި އެވެ.