ޖިންސީ ފުރައްސާރައިގެ ތުހުމަތުވާ ފަޒީން، ބްރޯޑްކޮމް މެންބަރު ކަމުން ވަކި ކުރަން ކޮމިޓީން ފާސްކޮށްފި

މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގެ ނައިބު ރައީސް, މުޙައްމަދު ފަޒީން އެ ކޮމިޝަންގެ މެންބަރުކަމުގެ މަގާމުން ވަކިކުރުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ފާސްކޮށްފިއެވެ.

މި މައްސަލައާއި ގުޅިގެން މިނިވަން މުވައްސަސާތަކުގެ ކޮމިޓީން މަޖިލީހަށް ފޮނުއްވި ސިޓީ މިއަދުގެ މަޖިލީހުގެ ޖަލްސާގައި ވަނީ އިއްވާފައެވެ.

އެސިޓީގައި ބުނެފައިވާގޮތުން، ފަޒީން އެ ކޮމިޝަންގެ އަންހެން މުވައްޒަފަކަށް ޖިންސީ ފުރައްސާރަކުރިމަތިވަމުންދާކަން ފާހަގަކޮށް، އެކަން މަޖިލީހުގެ ސަމާލުކަމަށް ގެނައުމަށް އެ ކޮމިޝަނުންނާއި ޖިންސީ ފުރައްސާރަ ކުރިމަތިވަމުންދާ މުވައްޒަފު މި އަހަރުގެ ޖަނަވަރީ މަހުގެ 9 ވަނަ ދުވަހު މަޖިލީހަށް ވަނީ ސިޓީއެއް ފޮނުއްވާފައެވެ.

އެސިޓީއާއި ގުޅިގެން މިނިވަން މުވައްސަސާތަކުގެ ކޮމިޓީއަށް އެ ކޮމިޝަންގެ ބައެއް މުވައްޒަފުންނާއި، މެންބަރުން ހާޒިރުކޮށް މައުލޫމާތު ސާފުކޮށްފައިވާ ކަމަށް ސިޓީގައި ބުނެފައިވެއެވެ.

އެގޮތުން ފުރައްސާރަކުރެވުނު މުވައްޒަފާއި އެހެން މުވައްޒަފުން ފާހަގަކުރި ކަންކަމުގެ ތަފްސީލް ސިޓީގައި ބަޔާންކޮށްފައިވެއެވެ. އެއީ؛

1) ފުރައްސާރަ ކުރެވުނު މުވައްޒަފު ކޮމިޓީގައި ބުނެފައިވާގޮތުން ފަޒީން ވަނީ އެކިފަހަރު މަތީން އެ މުވައްޒަފުގެ ގައިގައި ނުރުހުމުގައި އަތްލާފައެވެ. އަދި ބޭއަދަބީ ބަހުން ވާހަކަދައްކާފައެވެ.

އަދި ކޮމިޝަންގެ އެހެން އަންހެން މުވައްޒަފަކާވެސް ބޭއަދަބީ ބަހުން ވާހަކަދައްކާ ކަމަށް އެ މުވައްޒަފު ކޮމިޓީއަށް މައުލޫމާތު ދީފައިވެއެވެ.

2) މި މައްސަލަ ބްރޯޑްކޮމް ގައި އުފައްދާފައިވާ  ޖިންސީ ފުރައްސާރަ ކުރުމާއި ގޯނާ ކުރުން ހުއްޓުވުމުގެ ކޮމިޓީއަށް ހުށަހަޅާފައިވާނެ ކަން މަޖިލީހުގެ ކޮމިޓީއަށް ހާޒިރުވި މުވައްޒަފުން ބުނެފައިވެއެވެ.

3) ކޮމިޝަންގެ އެހެން މުވައްޒަފުންވެސް ވަނީ ފަޒީން އެ ކޮމިޝަންގެ ދެ އަންހެން މުވައްޒަފަކާ ބޭއަދަބީ ބަހުން ވާހަކަ ދައްކަވާފައިވާ ކަމަށް ވިދާޅުވެފައިވެއެވެ.

4) މީގެ އިތުރުން ކޮމިޝަނުގެ މަސައްކަތުގެ ބޭރުން އެ އަންހެން މުވައްޒަފަށް ގުޅައި، އާއްމު އަޚްލާގީ މިންގަނޑާއި ޚިލާފަށް ވަނީ މުޚާތަބު ކޮށްފައިވެއެވެ.

އެހެންކަމުން ފަޒީން މަގާމުން ވަކިކުރުމުގެ މައްސަލަ މަޖިލީހުގެ ތަޅުމަށް ފޮނުވާފައިވާއިރު އެކަން މިއަދު އިއުލާން ކުރުމަށްފަހު، މައްސަލަ އިތުރަށް ދިރާސާ ކުރުމަށް ވަނީ ކޮމިޓީއަށް އަނބުރާ ފޮނުވާފައެވެ.

އަދި މިއަދުގެ ޖަލްސާ ނިމުމާއެކު މިނިވަން މުވައްސަސާތަކުގެ ކޮމިޓީ ބައްދަލުވުން ބާއްވައި ފަޒީން ވަކިކުރުމާމެދު ވަނީ ވޯޓަށް އަހާފައެވެ. އިދިކޮޅު އެމްޑީޕީގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ފިޔަވައި، ދެން ތިބި ސަރުކާރު މެންބަރުންގެ ވޯޓު ދިނީ ފަޒީން މަގާމުން ވަކިކުރާ ގޮތަށެވެ.

ފަޒީން ބްރޯޑްކޮމްގެ ނައިބު ރައީސްގެ މަގާމަށް އައްޔަނުކުރީ ނިމިދިޔަ އެމްޑީޕީ ސަރުކާރުގައެވެ.