ދަރާފައިވާ ކުންފުނިތަކަށް މަޝްރޫޢުތައް ނުދޭން ފާސްކޮށްފި

ސަރުކާރާއި ސަރުކާރު ހިއްސާވާ ކުންފުނިތަކަށް ބޮޑެތި އަދަދުތަކުން ފައިސާދޭންހުރި ކުންފުނިތަކަށް ސަރުކާރުގެ މަޝްރޫޢުތައް ނުދޭން ރައްޔިތުންގެ މަޖިލީހުން މިއަދު ފާސްކޮށްފިއެވެ.

ރައްޔިތުންގެ މަޖިލީހުން މިގޮތަށް ފާސްކޮށްފައިވަނީ، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އަށް ސަރުކާރާއި އަމިއްލަ ފަރާތްތަކުން ބޮޑެތި އަދަދުތައް ދައްކަންހުރުމާ ގުޅިގެން, ރައްޔިތުންގެ މަޖިލީހުގެ މާލިއްޔަތު ކޮމިޓީން ދިރާސާކޮށްނިންމި ގޮތުގެ ރިޕޯޓް މަޖިލީހުގެ ތަޅުމަށް ފާސްކުރުމަށް ހުށަހެޅުނު ކަންކަމުގެ ތެރެއިންނެވެ.

މާލިއްޔަތު ކޮމިޓީގެ ރިޕޯޓްގައިވާގޮތުން ސަރުކާރާއި އަމިއްލަ ފަރާތްތަކުން އެޗްޑިސީއަށް ލިބެންޖެހޭ 1.4 ބިލިއަން ރުފިޔާ އަދިވެސް އެބައޮތެވެ. މީގެ ތެރޭގައި ހިމެނެނީ އަމިއްލަ ފަރާތްތަކުން އެޗްޑީސީއަށް ދޭންޖެހޭ 1.2 ބިލިއަން ރުފިޔާ އާއި ސަރުކާރުގެ އެކި މުއައްސަސާތަކުން ދޭންޖެހޭ 54.5 މިލިއަން ރުފިޔާއެވެ.

މާލިއްޔަތު ކޮމިޓީން ވަނީ އެޗްޑީސީއަށް ފައިސާ ހޯދުމަށް 7 ކަމެއް ހުށަހަޅާފައެވެ. އެދި އެކަންކަން ވަނީ މިއަދުގެ މިއަދުގެ ރައްޔިތުންގެ މަޖިލީހުގެ ތަޅުުން ފާސްކޮށްފައެވެ. ފާސްކުރި ބައެއް ކަންކަމުގެ ތެރޭގައި ހިމެނެނީ، ބިޑަކަށް ކުރިމަތިލާ ފަރާތަކުން އެޗްޑީސީއަށް ފައިސާ ދައްކަން ޖެހޭތޯ ބެލުމަށްފަހު ނޫނީ އިތުރު މަޝްރޫޢުއެއް ހަވާލުނުކުރުމާއި، ކުނފުނިތަކުން ދޭންޖެހޭ ފައިސާ ހޯދުމަށް މައާފްދިނުމުގެ އުސޫލެއް އެކުލަވާލައި، 30 ދުވަހުގެ ތެރޭގައި އެކަން އެންގުމާއި، ސަރުކާރުން މަޝްރޫޢުއެއް ހަވާލުކުރާ ކުންފުންޏަކީ، ސަރުކާރަށްދަރާފައި އޮތް ކުންފުންޏެއްތޯ ބެލުމުގެ އިތުރުން ސަރުކާރުން ލިބެންޖެހޭ ފައިސާ އާއި ސަރުކާރުން ދޭންޖެހޭ ފައިސާ އޮފްސެޓް ކުރެވޭނެ ނިޒާމެއް ގާއިމުކުރަން ފިނޭންސަށް އެންގުން ހިމެނެއެވެ. މީގެ އިތުރުން އިޖުތިމާއީ ޒިއްމާގެ ދަށުން ހިންގާ ކަންކަން ވީހާވެސް ދެފުށްފެންނަ ނިޒާމަކުން ކުރިއަށްގެންދިއުމަށް އެޗްޑީސީއަށް އެންގުންވެސް ހިމެނެއެވެ.

ރައްޔިތުންގެ މަޖިލީހުން މިއަދު އެކަންކަން ފާސްކުރީ ވޯޓުގައި ބައިވެރިވެ ވަޑައިގެންނެވި 71 މެމްބަރުންގެ އިއްތިފާގުންނެވެ. ސަރުކާރުގެ ކުންފުނިތަކަށް ލިބެންޖެހޭ ފައިސާގެ މައްސަލަ ބޮޑުވެފައިވާއިރު، ސަރުކާރުެގ އެއްކުންފުނިން އަނެއް ކުންފުންޏަށް ލިބެންޖެހޭ ފައިސާގެ މައްސަލައަކީވެސް ބޮޑުވެފައިވާ މައްސަލައެކެވެ. މިގޮތުން އެސްޓީއޯއަށް ފެނަކައިން ބިލިއަނުން ފައިސާ ލިބެންޖެހޭއިރު، ސްޓެލްކޯއަށް ދައުލަތުގެ މީޑިއާއިން ލިބެންޖެހޭ ފައިސާ އެތައް މިލިއަނަކަށް އަރާކަމަށް އެކުންފުނިތަކުގެ މާލީ ރިޕޯޓްތަކުން ދައްކައެވެ.