ފޮށްޓަކުން ގިނައަދަދެއްގެ މަސްތުވާތަކެތި، ފޮށި ނެގި މީހާބުނީ އެއީ މުދާ ކްލިއާ ކުރާ މީހެއް ކަމަށް

ޗޮކްލެޓް ސިރަޕް ފުޅިތަކެއްގައި ފޮރުވައިގެން ގިނަ އަދަދެއްގެ މަސްތުވާތަކެތި ކަނޑުމަގުން ރާއްޖެއަށް އެތެރެކުރަން އުޅުނު މައްސަލައިގައި އެތަކެތި ބަލާ ދިޔަ މީހާ 15 ދުވަހަށް ބަންދުކުރަން ކްރިމިނަލް ކޯޓުން އިއްޔެ ހުކުމް ކޮށްފިއެވެ.

މި މައްސަލާގައި ހައްޔަރުކޮށްފައިވަނީ ހއ. ހޯރަފުއްޓަށް ނިސްބަތްވާ އުމުރުން 47 އަހަރުގެ އަހުމަދު ޢަލީ އެވެ.

އޭނާގެ މައްޗަށް ކުރެވެނީ ރާއްޖެއަށް މަސްތުވާތަކެތި އެތެރެކޮށް، އެތަކެތި ގެންގުޅެ، އެތަކެތި ބޭނުންކޮށް އެތަކެތީގެ ވިޔަފާރިކުރާ ކަމުގެ ތުހުމަތެވެ.

ބަންދު އަމުރުގައިވާގޮތުން މީނާގެ މައްޗަށް ތުހުމަތުކޮށްފައިވާ ކުށް މީނާ ކުރިކަމަށް ތުހުމަތުކުރެވޭ ކޮންމެވެސް މިންވަރެއްގެ ހެކިލިބިފައިވެއެވެ.

އެގޮތުން ކަސްޓަމްސްގެ މައްސަލަ ހުށަހަޅާ ފޯމާއި ފުލުހެއްގެ ބަޔާން ހުށަހަޅާފައިވެއެވެ.

ބަންދު އަމުރުގައިވާގޮތުން މީނާއަކީ މަސްތުވާތަކެތި ހުރި ފޮށިގަނޑު ބަލައިދިޔުމަށް ގޮސްފައިވާ މީހެކެވެ. އަދި އެ ފޮށިގަނޑުން ގިނަ އަދަދެއްގެ މަސްތުވާތަކެތި ފެނިފައިވެއެވެ.

މި ކަމަކީ ރާވައިގެން އިންތިޒާމުވެގެން ދިވެހިރާއްޖެއަށް ގިނަ އަދަދަކަށް މަސްތުވާތަކެތި އެތެރެކުރުމަށް މަސައްކަތް ކޮށްފައިވާ މައްސަލައެއް ކަމަށް ފުލުހުން ފާހަގަކޮށްފައިވާ ކަމަށްވެސް އަމުރުގައިވެއެވެ.

ބަންދު އަމުރުގައި ވާގޮތުން ދިފާއުގައި މީނާ ބުނީ އެ ފޮށިގަނޑުގައި މަސްތުވާތަކެތި ހުރިކަން ނޭނގޭކަމާއި، މީނާއަކީ މުދާ ކްލިއަރކުރުމުގެ މަސައްކަތްކުރާ މީހެއްކަމަށެވެ.

މި މައްސަލައިގައި ދެން ފުލުހުން ހައްޔަރުކުރީ މަސްތުވާތަކެތި ހުރި ފޮށިގަނޑު ރާއްޖެއަށް ގެނައި ކުންފުނީގެ އެންމެ އިސް މީހާ އެވެ. އެއީ ގދ. ތިނަދޫ، ގޯލްޑަންހައުސް، މުހައްމަދު އާދިލް، 57، އެވެ. އޭނާ ވެސް ހުރީ ފުލުހުންގެ ބަންދުގަ އެވެ.

މައްސަލައިގައި ކަސްޓަމުން އަތުލައިގަތް މަސްތުވާތަކެތީގެ މަގުމަތީ އަގު 30 މިލިއަނަށްވުރެ ގިނަ ރުފިޔާއަށް އަރަ އެވެ. އެއީ މަސްތުވާތަކެތީގެ ބާވަތެއް ކަމަށްވާ ކެނަބިސް އެވެ.