ދުނިޔޭގެ ހަތަރުވަނައަށް އެންމެ ބޮޑު އިޤްތިޞާދުގެ މަޤާމު އިންޑިއާއިން ހޯދައިފި

އިންޑިއާ ސަރުކާރުގެ އަހަރީ އިޤްތިޞާދީ ރިވިއުއިން ދައްކާގޮތުގައި، ޖަޕާން ފަހަތަށް ޖައްސާލުމަށްފަހު އިންޑިއާ މިހާރު ވަނީ ދުނިޔޭގެ ހަތަރުވަނައަށް އެންމެ ބޮޑު އިޤްތިޞާދަށް ވެފައެވެ. އަދި މިހާރު ކުރިއަރަމުންދާ ރޭޓަށް ބަލާއިރު، ކުރިއަށް އޮތް ތިން އަހަރު ތެރޭގައި ޖަރުމަނުވިލާތް ފަހަތަށް ޖައްސާލައި، ދުނިޔޭގެ ތިންވަނައަށް އެންމެ ބޮޑު އިޤްތިޞާދުގެ މަޤާމު އިންޑިއާއަށް ލިބޭނެ ކަމަށް އެ ރިވިއުގައި ލަފާކޮށްފައިވެއެވެ.

އެ ރިވިއުގައި ބުނެފައިވާ ގޮތުގައި، އިންޑިއާގެ އުފެއްދުންތެރިކަމުގެ ނިސްބަތް މިހާރު ވަނީ 4.18 ޓްރިލިއަން ޑޮލަރަށް އަރާފައެވެ. އަދި 2030 ވަނަ އަހަރާ ހަމައަށްދާއިރު މިއަދަދު 7.3 ޓްރިލިއަން ޑޮލަރަށް އަރާނެ ކަމަށް ލަފާކުރެވެއެވެ. މި ބަދަލާއެކު، އިޤްތިޞާދީ ގޮތުން އިންޑިއާގެ ކުރީގައި ދެން އޮންނާނީ ހަމައެކަނި އެމެރިކާއާއި ޗައިނާއެވެ.

2025-26 ވަނަ މާލީ އަހަރުގެ ދެވަނަ ކުއާޓަރުގައި އިންޑިއާގެ ރިއަލް ޖީ.ޑީ.ޕީ ވަނީ 8.2 އިންސައްތައަށް ކުރިއަރާފައެވެ. މިއީ އޭގެ ކުރީ ކުއާޓަރުގައި ހުރި 7.8 އިންސައްތައަށްވުރެ މަތީ އަދަދެކެވެ. މިއީ ފާއިތުވި ހަ ކުއާޓަރުގެ ތެރޭގައި އިޤްތިޞާދު އެންމެ ބާރަށް ކުރިއެރުނު ފަހަރެވެ.

މީގެ އިތުރުން، އިންޑިއާގެ އެކްސްޕޯޓްވެސް ވަނީ އިތުރުވެފައެވެ. އިންޖިނިއަރިންގ ސާމާނާއި، އިލެކްޓްރޯނިކްސް، ބޭސްވެރިކަމުގެ އުފެއްދުންތަކާއި، ޕެޓްރޯލިއަމްގެ ބާވަތްތަކުގެ އެހީގައި، ނޮވެމްބަރު މަހު މުދާ އެކްސްޕޯޓްކުރި މިންވަރު ވަނީ 38.13 ބިލިއަން ޑޮލަރަށް އަރާފައެވެ.

މިކަމުގެ ރަސްމީ ކަށަވަރުކުރުމެއް ލިބޭނީ 2026 ވަނަ އަހަރު ޖީ.ޑީ.ޕީގެ ފައިނަލް ތަފާސްހިސާބުތައް އާންމުކުރުމުންނެވެ. ނަމަވެސް އިންޓަނޭޝަނަލް މަނިޓަރީ ފަންޑް (އައި.އެމް.އެފް) އިން ވެސް ލަފާކުރާ ގޮތުގައި އަންނަ އަހަރުގެ ތެރޭގައި އިންޑިއާއިން ޖަޕާން ފަހަތަށް ޖައްސާލާނެއެވެ.

ރިޒާވް ބޭންކް އޮފް އިންޑިއާއިން ވަނީ 2025-26 ވަނަ މާލީ އަހަރުގެ އިޤްތިޞާދީ ކުރިއެރުން ހުންނާނެ ކަމަށް ކުރިން ލަފާކުރި މިންވަރު 7.3 އިންސައްތައަށް މަތިކޮށްފައެވެ.