ސީޖޭޕީގެ ލީޑަރުން ދޫކޮށްލުމަށް ކޯޓުން އަމުރުކޮށްފި

ކޮކްރޯޗް ޖަންތާ ޕާޓީ (ސީޖޭޕީ) ގެ ތިން ލީޑަރުން ކަމަށްވާ ދިޕްކޭ އާއި އެ ޕާޓީގެ 2 ތަރުޖަމާނުން ދޫކޮށްލުމަށް ނިއުދިއްލީގެ ކޯޓުން އަމުރުކޮށްފިއެވެ.

މި 3 މީހުން ހައްޔަރުކުރީ އިއްޔެ އެ މީހުން ދިއްލީގައި ބާއްވަން ރާވާފައިވާ މުޒާހަރާއެއްގައި ބައިވެރިވުމަށް ދަތުރުކުރި ފްލައިޓު ނިއު ދިއްލީއަށް ޖެއްސުމާއެކު ޓާމިނަލާ ފްލައިޓް ކައިރި ކުރި ވަގުތު ފުލުހުން ފްލައިޓަށް އަރައިގެންނެވެ.

ނިއު ދިއްލީގައި އޮންނަ ޖަންތަރު މަންތަރުގައި އެތައް ހާސް ބަޔަކު އެއްކުރުމަށް ސީޖޭޕީން ރާވާފައި އޮތް ނަމަވެސް، ސަލާމަތީ ބާރުތަކުން ވަނީ މުޒާހަރާ ފެށުމުގެ ކުރިން އެ ސަރަހައްދު ބަންދުކޮށްފައެވެ. ސީޖޭޕީގެ އިސް ވަކީލު ރަތުނާ ސިންގް އާދީއްތަ ދުވަހު ސޯޝަލް މީޑިއާގައި ބުނީ އެގްޒެކެޓިވް މެޖިސްޓްރޭޓް ކޯޓަކުން ދިޕްކޭ އާއި އެ ޕާޓީގެ 2 ތަރުޖަމާނުން ދޫކޮށްލާފައިވާ ކަމަށެވެ. އެ މީހުން ދޫކޮށްލީ އެއް އަހަރު ދުވަހު ސުލްހައާ ހިލާފު އަމަލެއް ނުކުރުމަށް ޝަރުތުކޮށް ކަމަށް ރަތުނާ ބުންޏެވެ.

އިއްޔެ ނިއު ދިއްލީގައި އެތައް ހާސް ފުލުހުންނާއި ޕެރަމިލިޓަރީ ސިފައިން ހަރަކާތްތެރިވިއެވެ. އަދި އެ ސަރަހައްދުން އިންޓަނެޓްގެ ހިދުމަތް ވެސް ސަރުކާރުން ވަނީ ކަނޑާލާފައެވެ. މީގެ އިތުރުން އެތައް މެޓްރޯ ސްޓޭޝަނަކާއި ބާޒާރުތައް ބަންދުކޮށް، ބޮޑެތި މަގުތަކާއި ސިޓީއަށް ވަންނަ މަގުތަކުގައި ޗެކް ޕޮއިންޓުތައް ފުލުހުން ވަނީ ބަހައްޓާފައެވެ.

ހިންދޫ ނޫހުން ދިއްލީ ފުލުހުންނާ ހަވާލާދީ ރިޕޯޓުކޮށްފައިވާ ގޮތުގައި، ވެރިރަށް ނިއު ދެލީން ގާތްގަނޑަކަށް 2،500 މީހުން ހައްޔަރުކުރިއެވެ. ރޮއިޓާސް ނިއުސް އެޖެންސީން ދާހިލީ ވުޒާރާގެ އޮފިޝަލަކާ ހަވާލާދީ ބުނީ، އެ އަދަދު ގާތްގަނޑަކަށް 2،000 ކަމަށެވެ. މީގެ އިތުރުން، މުމްބައީން ވެސް ގާތްގަނޑަކަށް 600 މީހުން ހައްޔަރުކުރި ކަމަށް އޭއެންއައި ނިއުސް އެޖެންސީން ރިޕޯޓުކޮށްފައިވެއެވެ.

މުޒާހަރާކުރި ފަރާތްތަކުން ގޮވާލާފައިވަނީ ޗީފް އިލެކްޝަން ކޮމިޝަނަރު ގިޔާނެޝް ކުމާރު އިސްތިއުފާ ދިނުމަށެވެ. ވޯޓު ދިނުމުގެ ހައްގު ލިބޭ ފަރާތްތަކުގެ ލިސްޓުތައް އިސްލާހުކުރުމުގައި ނެގި ހާއްސަ ފިޔަވަޅުތައް އިންޑިއާގެ ބޮޑުވަޒީރު މޯދީގެ ބީޖޭޕީއަށް ނާޖާއިޒު ފައިދާ ލިބޭ ގޮތަށް ބައްޓަންކޮށްފައިވާ ކަމަށް މުޒާހަރާގެ ބައިވެރިން ތުހުމަތުކުރެއެވެ.

ބީޖޭޕީ އާއި އިލެކްޝަން ކޮމިޝަނުން މި ތުހުމަތުތައް ދޮގުކޮށްފައިވާ އިރު، ކޮމިޝަނަރު ކުމާރު އެ ކަމާ ގުޅޭ ގޮތުން މިހާތަނަށް އެއްވެސް އެއްޗެކޭ ވިދާޅުވެފައެއް ނުވެއެވެ. އިދިކޮޅު ޕާޓީތަކުން ބުނަނީ ވޯޓު ލިސްޓުގެ ބަދަލުތަކުގެ ނުފޫޒު ފަހުގެ ސްޓޭޓް އިންތިހާބުތަކުގެ ނަތީޖާއަށް ފޯރާފައިވާ ކަމަށެވެ. މިއާއެކު ދުނިޔޭގެ އެންމެ ބޮޑު ޑިމޮކްރެސީ ކަމުގައި ސިފަކުރެވޭ އިންޑިއާގައި އިންތިހާބީ ނިޒާމުގެ މިނިވަންކަމާ މެދު އުފެދިފައިވާ ބަހުސް ވަނީ ހޫނުވެފައެވެ.