ކެނެޑާގެ ޚާރިޖީ ވަޒީރު އިންޑިއާގައި
ކެނެޑާގެ ޚާރިޖީ ވަޒީރު އަނީތާ އާނަންދު، އިންޑިއާއަށް ވަޑައިގެންފިއެވެ.
މިއީ އެކަމަނާ އިންޑިއާ އަށާއި ޔުނައިޓެޑް އަރަބް އެމިރޭޓްސް އަށް ކުރައްވާ ދަތުރުފުޅެކެވެ. ދަތުރުފުޅުގެ ކުރިން އަނީތާ ވިދާޅުވީ މިއީ ކެނެޑާގެ މުހިއްމު ދެ ބައިވެރިޔަކާއެކު އޮންނަ ގުޅުން އިތުރަށް ހަރުދަނާކުރުމަށް ކުރައްވާ ދަތުރުފުޅެއްކަމަށެވެ. އެމެރިކާ އާއި ކެނެޑާއާއި ދެމެދު އޮތް ޒަމާންވީ ގުޅުން، އެމެރިކާގެ ރައީސް ޑޮނަލްޑް ޓްރްމްޕްގެ ސިޔާސަތުތަކާއެކު ގޯސްވެފައިވާ މި ދަނޑިވަޅުގައި ކެނެޑާއިން އަންނަނީ އެހެން ގައުމުތަކާއެކު އޮންނަ ގުޅުން އިތުރަށް ހަރުދަނާކުރުމަށް މަސައްކަތްތަކެއް ކުރަމުންނެވެ.
އިންޑިއާއަށް ވަޑައިގެން އަނީތާ ވަނީ އިންޑިއާގެ ޚާރިޖީ ވަޒީރު ޑރ. ސުބްރަމާނިއަން ޖައިޝަންކަރާ ބައްދަލުކުރައްވައި، ދެޤައުމުގެ މެދުގައި ރަސްމީ މަޝްވަރާތަކެއް ކުރައްވާފައެވެ. އަދި މީގެ އިތުރުން ބޮޑުވަޒީރު ނަރެންދްރަ މޯދީގެ އަރިހަށްވެސް އަނީތާ ޒިޔާރަތްކުރެއްވިކަމަށް އިންޑިއާއިން ޚާރިޖިއްޔާއިން ބުނެއެވެ. ދެޤައުމުގެ ގުޅުން އެކި ދާއިރާއިން ބަދަހިކުރުމުގެ އިތުރުން، އިންޑިއާއާއި ކެނެޑާއާއެކު ސޮއިކުރުމަށް މަޝްވަރާކުރަމުންދާ ކޮމްޕްރެހެންސިވް އިކޮނޮމިކް ޕާޓްނަރޝިޕް އެގްރިމެންޓްގެ މަޝްވަރާތައް އަވަސްކުރުމާ ބެހޭ ގޮތުން އަނީތާ އާއި މޯދީ ވަނީ މަޝްވަރާކުރައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
