ރަހިމުގައި އޮތް ކުއްޖެއްގެ މައިބަދައިގެ އޮޕަރޭޝަނެއް އިންޑިއާގައި ފުރަތަމަ ފަހަރަށް ކާމިޔާބުކަމާއެކު ކޮށްފި
ސިއްހީ ދާއިރާގައި ފާހަގަކޮށްލެވޭ ފަދަ ބޮޑު ކާމިޔާބީއެއް ހޯދައި، އިންޑިއާގެ ނިއުދިއްލީގެ އޯލް އިންޑިއާ އިންސްޓިޓިއުޓް އޮފް މެޑިކަލް ސައިންސަސް (އެއިމްސް) ގެ ޑޮކްޓަރުން، ރަހިމުގައި އޮތް ކުއްޖެއްގެ މައިބަދައިގެ އޮޕަރޭޝަނެއް ކާމިޔާބުކަމާއެކު ނިންމާލައިފިއެވެ. މިއީ މާބަނޑު ދުވަސްވަރު ދަރިފުޅު ރަހިމުގައި އޮއްވައި، އިންޑިއާގައި މިފަދަ އޯޕަން ފީޓަލް ސާޖަރީއެއް ހެދި ފުރަތަމަ ފަހަރެވެ.
މި އޮޕަރޭޝަން ކޮށްފައިވަނީ ބަނޑަށް 25 ހަފުތާ ވެފައިވާ އަންހެނެއްގެ ބަނޑުގައި އޮތް ދަރިފުޅަށެވެ. މި ހިނގާ ނޮވެމްބަރު މަހުގެ 12 ވަނަ ދުވަހު ކުރިއަށް ގެންދިޔަ މި އޮޕަރޭޝަނަކީ 6 ގަޑިއިރަށް ދެމިގެންދިޔަ ބުރަ މަސައްކަތެކެވެ. މި ސާޖަރީގައި ފަރުވާ ދީފައިވަނީ "ސްޕައިނާ ބިފިޑާ" ގެ އެންމެ ނުރައްކާތެރި ވައްތަރު ކަމަށްވާ "ލަމްބޯސެކްރަލް މައެލޯމެނިންގޯސީލް" (lumbosacral myelomeningocele) އަށެވެ. ތަފާތު އެކި ދާއިރާތަކުގެ 30 އަށް ވުރެ ގިނަ ޑޮކްޓަރުންނާއި ނަރުހުން ހިމެނޭ ޓީމަކުން މި އޮޕަރޭޝަން ކާމިޔާބުކުރީ، ފަސް ހަފުތާއަށް ވުރެ ގިނަ ދުވަހުގެ ޕްލޭނިންގ، އިމޭޖިންގ، ކައުންސިލިންގ އަދި ތައްޔާރީތަކަށް ފަހުގައެވެ.
މައެލޯމެނިންގޯސީލް އަކީ ޣަރުބަގަންނަ ދުވަސްވަރު ކުއްޖާގެ ސިކުނޑިއާއި މައިބަދަ އުފެދުމުގައި ދިމާވާ މައްސަލައެކެވެ. މައިބަދައިގެ ބައެއް ރަނގަޅަށް ނުބެދި ހުރުމުގެ ސަބަބުން، ނާރުތަކާއި ދިޔަތައް ބޭރަށް ނުކުމެ "ސެކް" އެއް އުފެދެއެވެ. މިކަމުގެ ސަބަބުން ފަޔާއި ކުޑަކަމުދާ އަދި ބޮޑުކަމުދާ ނިޒާމުގެ ހަރަކާތްތަކަށް ހުރަސްއެޅި، ސިކުނޑީގައި ފެންހެދުން (ހައިޑްރޯސެފަލަސް) ފަދަ ނުރައްކާތެރި ހާލަތްތައް މެދުވެރިވެއެވެ. އާންމުގޮތެއްގައި މިފަދަ ކަންކަން ރަނގަޅުކުރުމަށް ސާޖަރީ ހަދަނީ ކުއްޖާ ވިހެއުމަށް ފަހުގައެވެ. ނަމަވެސް އެގޮތަށް ލަސްކުރުމުން، ބަނޑުގައި އޮންނަ ދުވަސްވަރު ނާރުތަކަށް އިތުރު ގެއްލުންތައް ލިބުމުގެ ފުރުސަތު އޮވެއެވެ.
އެހެންކަމުން، މި ކާމިޔާބީއަކީ މައިބަދައިގެ އައިބުތައް ހުންނަ ކުދިންނަށް ފަރުވާދިނުމުގައި ލިބުނު ބޮޑު ކުރިއެރުމެކެވެ. ވިހަންދެން މަޑުނުކޮށް، ރަހިމުގައި އޮންނަ ދުވަސްވަރު މިފަދަ އޮޕަރޭޝަންތައް ކުރުމުން، ކުއްޖާގެ ނާރުތަކަށް އިތުރަށް ލިބޭ ގެއްލުންތައް ކުޑަކުރެވި، ވިހެއުމަށްފަހު ސިއްހީ ގޮތުން ދުޅަހެޔޮ ދިރިއުޅުމެއް ލިބުމުގެ ފުރުސަތު ބޮޑުވެގެންދެއެވެ.
މަންމަގެ ބަނޑުގައިވާ ދަރިފުޅު އުފަންވުމުގެ ކުރިން، ފުރާނައަށް ނުރައްކާވާ ފަދަ ނުވަތަ މުޅި އުމުރަށް ނުކުޅެދުންތެރިކަން މެދުވެރިވެދާނެ އުފެދުމުގެ އައިބުތައް ރަނގަޅުކުރުމަށް ސާޖަރީ ހެދުމަކީ މީގެ ކުރިން ސައިންސް ފިކްޝަން ފިލްމުތަކުން އެކަނި ފެންނަ މަންޒަރެއް ނަމަވެސް ޒަމާނީ ބޭސްވެރިކަމުގެ ތެރެއިން މިއަދު މިވަނީ އެކަން ހަގީގަތަކަށް ވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް