ސްކޮޓްލޭންޑް ބަލިކޮށް ސްވިޒަލޭންޑުން ބޮޑު މޮޅެއް ހޯދައިފި
ޔޫއީއެފްއޭ ނޭޝަންސް ލީގުގައި ރޭ ކުޅުނު މެޗުގައި ސްވިޒަރލޭންޑުން، ސްކޮޓްލޭންޑްގެ މައްޗަށް ކުރި ހޯދައި އެޓީމްގެ ފެންވަރު ދައްކާލައިފިއެވެ.
ސެއިންޓް ގަލެންގައި ކުޅުނު މި މެޗް ސްވިޒަރލޭންޑުން ކާމިޔާބުކުރީ 4-0 ގެ ނަތީޖާއިންނެވެ. މި މެޗުގައި ސްވިޒަލޭންޑްގެ ފަރާތުން މޮޅު ކުޅުމެއް ފެނިގެންގޮސްފައިވާއިރު، އެޓީމް ފެނުނީ މާބޮޑަށްވެސް ވަރުގަދަކޮށެވެ.
މެޗުގެ ފުރަތަމަ ލަނޑަކީ 22 ވަނަ މިނެޓުގައި ސްކޮޓްލޭންޑްގެ ލޫވިސް ފާގަސަން އަތުން ބައިކޮޅަށް ވަން ލަނޑެކެވެ. ސްވިޒަލޭންޑުން މެޗުގެ ކޮންޓްރޯލް ފުރިހަމައަށް އަތުލީ ދެވަނަ ހާފުގައެވެ. އެގޮތުން 47 ވަނަ މިނެޓުގައި ވިންސްލީ ބޮޓެލީ މޮކާންގޯ ލަނޑެއް ޖަހައި ލީޑު ފުޅާކޮށްދިންއިރު، އޭގެ ހަތަރު މިނެޓު ފަހުން އަލްވިން ސަންޗޭޒް ވަނީ ތިންވަނަ ލަނޑު ކާމިޔާބުކޮށްދީފައެވެ. ސްވިޒަލޭންޑްގެ ފަހު ލަނޑު މެޗު ނިމެން މިނެޓަކަށް ވެފައި ވަނިކޮށް ޖަހައިދިނީ ޒެކީ އަމްދޫނީއެވެ.
މި މެޗުގައި ސްކޮޓްލޭންޑަށް ދިމާވި އެންމެ ބޮޑު ގޮންޖެހުމަކީ ފުރަތަމަ ހާފުގެ ފަހުކޮޅު އެ ޓީމުގެ މުހިންމު ކުޅުންތެރިޔާ އަރޮން ހިކީއަށް އަނިޔާވެގެން ބާލަން ޖެހުމެވެ. މިއާއެކު އެ ޓީމުގެ ޑިފެންސްލައިނަށް ބަލިކަށިވެ، ސްވިޒަލޭންޑްގެ ހަމަލާތައް ހުއްޓުވުމަށް ނުކުޅެދުނެވެ. ސްކޮޓްލޭންޑުން ބޯޅަ ހިފަހައްޓައިގެން ކުޅެން މަސައްކަތް ކުރި ނަމަވެސް، ސްވިޒަލޭންޑްގެ ގޯލަށް ނުރައްކާ ކުރެވޭނެ ފަދަ ހަމަލާއެއް އުފެއްދިފައެއް ނުވެއެވެ.
މި މެޗުގައި ސްވިޒަލޭންޑްގެ އަލްވިން ސަންޗޭޒް އާއި މޮކާންގޯގެ ކުޅުން ހާއްސަގޮތެއްގައި ފާހަގަކޮށްލެވެއެވެ. މި މޮޅާއެކު ސްވިޒަލޭންޑުން ވަނީ މި ސިލްސިލާ ވަރަށް ކާމިޔާބުކަމާއެކު ނިންމާލާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް