ރޮނާލްޑޯގެ ޝަރަފުގައި ޕޯޗުގަލް ޓީމުގެ 7 ނަންބަރު ޖާޒީގެ ސްޓައިލް ބަދަލުކޮށްފި

ބައިނަލްއަޤްވާމީ ފުޓްބޯޅަ ކުޅުން ހުއްޓާލި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯގެ ޝަރަފުގައި، އެ ޤައުމުގެ ޤައުމީ ޓީމުގެ 7 ނަންބަރު ޖާޒީގައި ނަންބަރު ލިޔާ ސްޓައިލަށް ޕޯޗުގަލްގެ ފުޓްބޯޅަ ފެޑެރޭޝަނުން ބަދަލެއް ގެނެސްފިއެވެ.

ދުނިޔޭގެ ފުޓްބޯޅައިގައި "ސީއާރް7" ގެ ނަމުން މަޝްހޫރުވެފައިވާ ރޮނާލްޑޯ ޤައުމީ ޓީމަށް ކުޅުން ހުއްޓާލުމާ ގުޅިގެން ޕޯޗުގަލްގެ ފެޑެރޭޝަނުން މީސްމީޑިއާގައި ބުނީ ދުވަހަކުވެސް ފަނޑުވުމެއްނެތި ދެމިއޮންނާނެ އެއް ނަންބަރަކީ 7 ނަންބަރު ކަމަށެވެ. މި ޕޯސްޓާއެކު ރޮނާލްޑޯއަކީ ތާރީޚުގައިވެސް އެންމެ މޮޅު ކުޅުންތެރިޔާ (ގޯޓް) ކަން ދޭހަކޮށްދިނުމުގެ ގޮތުން ކަންބަޅިއެއްގެ އިމޯޖީވެސް ވަނީ ބޭނުންކޮށްފައެވެ.

އާ ޑިޒައިނުގައި ޔޫރަޕްގެ ޤައުމުތަކުގައި ޢާންމުކޮށް ލިޔާ ގޮތަށް 7 ނަންބަރުގެ މެދުން ހުރަސް ރޮނގެއް ހިމަނާފައިވެއެވެ. މިއީ ރޮނާލްޑޯއަށް ފަހު އެ ނަންބަރު ބޭނުންކުރާ ކޮންމެ ކުޅުންތެރިއަކުވެސް، އޭނާ ދޫކޮށްދިޔަ ބޮޑު ޒިންމާއާއި ވާރުތަ އުފުލަންޖެހޭނެކަން ރަމްޒުކޮށްދިނުމުގެ ގޮތުން ގެނައި ބަދަލެއް ކަމަށް ޕޯޗުގަލްއިން ބުނެއެވެ.

ޔުއެފާ ނޭޝަންސް ލީގުގައި ޕޯޗުގަލްގެ އެސްޓާޑިއޯ ބްރާގާގައި ޑެންމާކާ ދެކޮޅަށް ކުޅުނު މެޗުގައި، މި އާ ސްޓައިލްގެ 7 ނަންބަރު ޖާޒީ އަޅައިގެން ފުރަތަމަ ފަހަރަށް ކުޅުނީ ބެލްޖިއަމްގެ ކްލަބް ބްރޫޖަށް ކުޅޭ އުމުރުން 22 އަހަރުގެ ވިންގަރ ކާލޮސް ފޯބްސްއެވެ. އަދި މި މެޗަށް ޓީމު ދަނޑަށް ނުކުތީ ރޮނާލްޑޯގެ ޝަރަފުގައި ޚާއްޞަ ޖާޒީތަކެއްގައެވެ.

ޢުމުރުން 41 އަހަރުގެ ރޮނާލްޑޯ ބައިނަލްއަޤްވާމީ ފުޓްބޯޅަ ކުޅުން ހުއްޓާލިކަން އިޢުލާންކުރީ މި ނޮވެމްބަރު މަހުގެ 5 ވަނަ ދުވަހުއެވެ. އޭނާ މި ނިންމުން ނިންމީ ކޯޗު ޖޯޖް ޖީސަސްއާ ދެމެދު އުފެދުނު ޚިޔާލުތަފާތުވުންތަކަކަށް ފަހުގައެވެ. ޖީސަސް އޭނާ ބެންޗުގައި ބޭންދުމަށްފަހު، ދެން އޮތް މެޗުގައިވެސް ފުރަތަމަ އެގާރައިގައި ނުހިމަނާނެކަން އެންގުމުން ރޮނާލްޑޯ ވަނީ ކޭމްޕް ދޫކޮށް ގޮސްފައެވެ. ފަހުން ކޯޗު ޖީސަސް ވަނީ ރޮނާލްޑޯ އެނބުރި އަންނަން ބޭނުންނަމަ އެ ފުރުޞަތު އަދިވެސް އޮތް ކަމަށް ބުނެފައެވެ.

ރޮނާލްޑޯގެ އެންމެ ފަހު މެޗަކީ ސެޕްޓެމްބަރު 24 ގައި ވޭލްސް އަތުން 1-0 އިން ޕޯޗުގަލް މޮޅުވި މެޗެވެ. 2003 އިން 2026 އަށް ދެމިގެންދިޔަ އޭނާގެ ކާމިޔާބު ޤައުމީ ކެރިއަރުގައި، ދުނިޔޭގެ ރެކޯޑެއްގެ ގޮތުގައި 234 މެޗު ކުޅެދީ، އެއްވެސް ކުޅުންތެރިއަކަށް ޤައުމީ ޓީމަކަށް ނުޖެހޭ މިންވަރަށް 146 ލަނޑު ވަނީ ޖަހައިދީފައެވެ. އަދި އޭނާއަކީ 6 ވޯލްޑް ކަޕްގައި ވާދަކޮށް، ކޮންމެ މުބާރާތެއްގައިވެސް ލަނޑު ޖެހި ހަމައެކަނި ފިރިހެން ކުޅުންތެރިޔާއެވެ. ރޮނާލްޑޯ ވަނީ ޕޯޗުގަލްއާއެކު 2016 ވަނަ އަހަރު ޔޫރޯ މުބާރާތްވެސް ކާމިޔާބުކޮށްފައެވެ.