ވާންވީ އިޙްތިރާމު އަދާކުރާ އަނެކާގެ ލެޔާ، މުދަލާ އަބުރު ރައްކާތެރި ކުރާ ބަޔަކަށް: ރައީސް ޑރ.މުއިއްޒު

އެކަކު އަނެކަކަށް އިޙްތިރާމް އަދާކުރާ، އެކަކު އަނެއްކެއްގެ ލެޔާއި މުދަލާއި އަބުރު ރައްކާތެރިކުރާ ބަޔަކަށް ދިވެހީން ވާންޖެހޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ، އެމަނިކުފާނުގެ ރިޔާސީ ވަޢުދުފުޅުތަކުގެ ތެރޭގައި ހިމެނޭ "އިޙްތިރާމް އަދާކުރުމުގެ ޤައުމީ މަޝްރޫޢު" އިފްތިތާޙު ކުރުމަށްޓަކައި ބޭއްވި ޚާއްޞަ ރަސްމިއްޔާތުގައި ވާހަކަފުޅު ދައްކަވަމުންނެވެ.

މި ރަސްމިއްޔާތުގައި ވާހަކަފުޅު ދައްކަވަމުން ރައީސް ޑރ. މުޢިއްޒު ވިދާޅުވީ، ދިވެހިރާއްޖެއަކީ ސައްތައިން ސައްތަ އިސްލާމީ ޤައުމަކަށް ވާއިރު، އިސްލާމްވަންތަކަމާއި ދިވެހިވަންތަކަމުގެ އަސްލު ރޫޙަކީ އެކަކު އަނެކަކަށް ޤަދަރާއި އިޙްތިރާމު ކުރުން ކަމަށެވެ. އަދި އެކަކު އަނެކަކުގެ ކަރާމާތާއި ޤަދަރަށް ކުޑަވެސް އުނިކަމެއް އަންނާނެ ފަދަ އެއްވެސް ޢަމަލެއް ނުކުރުމަށް ސަމާލުކަން ދޭންޖެހޭ ކަމަށާއި، މީހުންނަށް އިހާނެތިކޮށް ހިތުމާއި، މަލާމާތްކުރުމާއި، ނުރުހޭ ވަނަންތައް ކިޔުމާއި މީހުން ދަށްކޮށްލުން ފަދަ ނާތަހުޒީބު ކަންކަމުން މުޖުތަމަޢު ދުރުހެލިވާން ޖެހޭ ކަމަށްވެސް އެމަނިކުފާނު ވިދާޅުވިއެވެ.

ރައީސް ވިދާޅުވީ އިޙްތިރާމު ކުރުމަކީ އިންސާނާ ކުރާ ލޮލަށް ނުފެންނަ މުޑުވައް ކުރުމެކެވެ. އޭގެ މޭވާއަކީ ހިތްތަކަށް ލިބޭ ފުން ތަސައްލީއެއް ކަމަށާއި، ނަފްސާނީ ޢިލްމުވެރިންގެ ހޯދުންތަކުން ދައްކާ ގޮތުގައި އެކަކު އަނެކަކަށް އިޙްތިރާމް ކުރުމަކީ މުޖުތަމަޢުގައި ކުލުނާއި ގާތްކަން އިތުރުވެ، އަމާންކަމާއި ހަމަޖެހުން ޤާއިމުވާ މައިގަނޑު ސަބަބެވެ.

ހަމައެއާއެކު، އިޙްތިރާމް ކުރުމަކީ ހަމައެކަނި ވަކި ދާއިރާއަކަށް އޮތް ކަމެއް ނޫން ކަމަށާއި، މަގުމައްޗަށާއި، ގުދުރަތީ ވެއްޓަށާއި، މަދަރުސާތަކަށާއި، އަދި އޮފީސްތަކާއި ތިމާގެ ޒިންމާތަކަށްވެސް ފުރިހަމައަށް އިޙްތިރާމް ކުރަންޖެހޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.