ހޮރްމޫޒް ކަނޑުއޮޅީގައި މިހާތަނަށް 25 ފަޅުވެރިން މަރުވެފައިވާ ކަމަށް އދ. އިން ބުނެފި

އެމެރިކާއާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމައިގައި މިހާތަނަށް 25 ފަޅުވެރިން މަރުވެފައިވާ ކަމަށް އދ. އިން ބުނެފިއެވެ.

މި ތަފާސްހިސާބުތައް ހިއްސާކޮށްފައިވަނީ، މެދުއިރުމައްޗާއި އޭޝިއާ އަދި ޕެސިފިކް ސަރަހައްދަށް ކަނޑައަޅުއްވާފައި ހުންނަވާ އދ. ގެ އެސިސްޓެންޓް ސެކްރެޓަރީ ޖެނެރަލް ޚާލިދު ޚިޔާރީއެވެ. ހުކުރު ދުވަހު އދ. ގެ ސަލާމަތީ މަޖިލީހަށް މައުލޫމާތު ދެއްވަމުން އޭނާ ވިދާޅުވީ، މި އަދަދުތަކަކީ މި މަހުގެ 11 ވަނަ ދުވަހުގެ ނިޔަލަށް ރެކޯޑުކުރެވިފައިވާ މައުލޫމާތު ކަމަށެވެ.

ޚާލިދު ޚިޔާރީ ވަނީ، މިހާރު އެ ސަރަހައްދުގައި އޮތް ނާމާން ހާލަތާމެދު ކަންބޮޑުވުން ފާޅުކުރައްވައި، އެއީ އާންމު ކަމެއްގެ ގޮތުގައި ބަލައިގަނެވިގެން ނުވާނެ ކަމަށް ވިދާޅުވެފައެވެ. އަދި ކަނޑުދަތުރުފަތުރުގެ ރައްކާތެރިކަން ކަށަވަރުކޮށް، އެ ސަރަހައްދުގައި އާންމު ހާލަތަކަށް ދަތުރުފަތުރު ރުޖޫއަކުރުމަށް އޭނާ ގޮވާލެއްވިއެވެ.

ހޮރްމޫޒް ކަނޑުއޮޅިއާއި އޭގެ ވަށައިގެންވާ ސަރަހައްދުތަކުގައި ސަލާމަތީ ނުރައްކާތައް އިތުރުވަމުންދާކަން ފާހަގަކުރައްވަމުން ޚިޔާރީ ވިދާޅުވީ، ހަނގުރާމަ ފެށުނު ފަހުން އެންމެ ގިނަ ހާދިސާތައް ހިނގާފައިވަނީ ނިމިދިޔަ އޮކްޓޯބަރު މަހުގައި ކަމަށެވެ.

އދ. ގެ އިންޓަނޭޝަނަލް މެރިޓައިމް އޯގަނައިޒޭޝަން (އައިއެމްއޯ) ގެ ރެކޯޑުތަކުން ދައްކާގޮތުގައި، މާރިޗު މަހުގެ 1 ވަނަ ދުވަހުން ފެށިގެން ނޮވެމްބަރު 11 ވަނަ ދުވަހުގެ ނިޔަލަށް ހޮރްމޫޒް ކަނޑުއޮޅިއާއި މެދުއިރުމަތީގެ ކަނޑުގެ ސަރަހައްދުގައި އުޅަނދުފަހަރަށް އަމާޒުވި 136 ސަލާމަތީ ހާދިސާއެއް ވަނީ ފާހަގަކުރެވިފައެވެ. މީގެ ތެރެއިން 35 ހާދިސާ އޮކްޓޯބަރު މަހު ހިނގާފައިވާއިރު، ނޮވެމްބަރު މަހުގެ މިހާތަނަށް 10 ހާދިސާއެއް ވަނީ ރިޕޯޓުކޮށްފައެވެ.