އީރާނާ ދެކޮޅަށް ހަނގުރާމަ ފެށުމަށް އެދި ނަތަންޔާހޫ ކޮންމެ ދުވަހަކު ޓްރަމްޕަށް ގުޅާ: ރިޕޯޓް

އީރާނާ ދެކޮޅަށް އަސްކަރީ ފިޔަވަޅުތައް އަލުން އެޅުމަށް ބާރުއަޅައި، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އެމެރިކާގެ ރައީސް ޑޮނަލްޑް ޓްރަމްޕަށް ކޮންމެ ދުވަހަކު ފޯނުން ގުޅަމުންދާ ކަމަށާއި، މިކަމާ ގުޅިގެން ވައިޓް ހައުސްގެ ތެރޭގައާއި އަރަބި އިސްލާމީ ޤައުމުތަކުގައި ބޮޑެތި ކަންބޮޑުވުންތަކެއް އުފެދިފައިވާ ކަމަށް ރިޕޯޓުތައް ބުނެފިއެވެ.

ފައިނޭންޝަލް ޓައިމްސް އިން ރިޕޯޓުކޮށްފައިވާ ގޮތުގައި، ހަނގުރާމަ އަލުން ފެށުމަށް ނަތަންޔާހޫ ޓްރަމްޕަށް ބާރުއަޅަމުން ދިޔަ ނަމަވެސް، ވައިޓް ހައުސްގެ އިސް އޮފިޝަލުންނާއި އަރަބި ލީޑަރުން ދަނީ އިތުރު ހަމަނުޖެހުމަކަށް ނުގޮސް، ސުލްހަވެރި މަޝްވަރާތަކަށް އިސްކަންދިނުމަށް ޓްރަމްޕަށް ވިސްނައިދިނުމަށް މަސައްކަތް ކުރަމުންނެވެ.

މިގޮތުން ސައޫދީ އަރަބިއްޔާގެ ވަލީއަހުދު މުޙައްމަދު ބިން ސަލްމާން، ޔޫއޭއީގެ ރައީސް ޝައިޚް މުޙައްމަދު ބިން ޒައިދު އަލް ނަހްޔާން، ޤަތަރުގެ އަމީރު ޝައިޚް ތަމީމް ބިން ޙަމަދު އަލް ޘާނީ އަދި ތުރުކީގެ ރައީސް ރަޖަބް ތައްޔިބު އުރުދުޣާން ހިމެނިވަޑައިގަންނަވާހެން މަދުވެގެން އަރަބި އަދި އިސްލާމީ ހަތަރު ލީޑަރަކު ވަނީ ފާއިތުވި ދުވަސްތަކުގައި ޓްރަމްޕާ ފޯނުން ގުޅުއްވައި، ޑިޕްލޮމެޓިކް ހައްލަކަށް ފުރުސަތު ދިނުމަށް އެދިވަޑައިގެންފައެވެ. ލީޑަރުން ކަންބޮޑުވަނީ އެމެރިކާގެ މިޑްޓާމް އިންތިޚާބަށްފަހު އަލުން ދޭ ހަމަލާތަކެއްގެ ސަބަބުން މުޅި ސަރަޙައްދު ނުރައްކާތެރި ހަނގުރާމައެއްގެ ތެރެއަށް ވެއްޓިދާނެތީއެވެ.

ޔޫއޭއީގެ ރައީސްގެ ޑިޕްލޮމެޓިކް އެޑްވައިޒަރު އަންވަރު ގަރްގާޝް ވިދާޅުވީ، މިވަގުތު އެންމެ ބޮޑު އިސްކަމެއް ދޭންވީ ސަރަޙައްދީ ހަމަޖެހުން ދެމެހެއްޓުމަށްޓަކައި ސިޔާސީ އަދި ޑިޕްލޮމެޓިކް ހައްލުތައް ހޯދުމަށް ކަމަށެވެ.

މި ދަނޑިވަޅުގައި ރައީސް ޓްރަމްޕް ވަނީ އީރާނާ ދެކޮޅަށް މިވަގުތު އަސްކަރީ ފިޔަވަޅު އެޅުމުގެ ފުރުސަތު ކުޑަކަމަށް އިޝާރާތެއް ކޮށްފައެވެ. އަދި އީރާނުގެ އަސްކަރިއްޔާ މިހާރު އޮތީ ވަރަށް ބޮޑަށް ބަލިކަށިވެފައި ކަމަށާއި، ހަނގުރާމަ ނިމުމަކަށް ގެނައުމަށް "އެދެވޭ ކުރިއެރުންތަކެއް" ލިބެމުންދާ ކަމަށް ބުނެފައިވެއެވެ. ޓްރަމްޕް މިފަދައިން ބުނީ ވައިޓް ހައުސްގައި ޤަތަރުގެ ބޮޑުވަޒީރު ޝައިޚް މުޙައްމަދު ބިން އަބްދުއްރަޙްމާން އަލް ޘާނީ އާއި އެމެރިކާގެ ނައިބު ރައީސް ޖޭޑީ ވެންސް ބައިވެރިވި ބައްދަލުވުމަކަށް ފަހުގައެވެ.

ތެލުގެ އަގު އުފުލުމާއި ހަނގުރާމައިގެ ސަބަބުން، އެމެރިކާގެ މިޑްޓާމް އިންތިޚާބުގައި ރިޕަބްލިކަން ޕާޓީއަށް ބޮޑެތި ނާކާމިޔާބީތަކާ ކުރިމަތިލާން ޖެހިފައިވާއިރު، އީރާނުން ވެސް ވަނީ އެ ޤައުމަށް އަނެއްކާވެސް ހަމަލާއެއް ދީފިނަމަ ހަރުކަށި ރައްދެއް ދޭނެ ކަމުގެ އިންޒާރު ދީފައެވެ. އީރާނުން ވަނީ ހޮރުމުޒް ކަނޑުއޮޅީގައި އަޅާފައިވާ ކަނޑުއަޑީގެ ކޭބަލްތަކަށާއި ސަރަޙައްދުގެ ޑޭޓާ ސެންޓަރުތަކަށް ހަމަލާދީފާނެ ކަމުގެ އިންޒާރު ވެސް ދީފައެވެ.

މެދުއިރުމަތީގެ މަސްރަޙު ފިނިކުރުމަށާއި، ވޮޝިންޓަނާއި ތެހެރާނާ ދެމެދު ވަގުތީ އެއްބަސްވުމަކަށް އައުމަށް ޤަތަރު ފަދަ ޤައުމުތަކުން އިސްނަގައިގެން ގިނަ މަސައްކަތްތަކެއް ކުރަމުންދާއިރު، އިސްރާއީލުން އަދިވެސް މަސައްކަތް ކުރަމުން ދަނީ އެމެރިކާ ލައްވައި އީރާނަށް އިތުރު ހަމަލާތަކެއް ދިނުމަށެވެ.