އެމެރިކާއާއި އިސްރާއިލްގެ ޖާސޫސުންގެ ގޮތުގައި މަސައްކަތްކުރި އީރާނުގެ ތިން މީހަކަށް މަރުގެ އަދަބުދީފި

ސަރުކާރާ ދެކޮޅަށް ޖެނުއަރީ މަހު އީރާނުގައި ބޭއްވި މުޒާހަރާތަކުގެ ތެރޭގައި އާންމު އިމާރާތްތަކަށް ހަމަލާދީ، އިސްރާއީލާއި އެމެރިކާއަށް ޖާސޫސީ މަސައްކަތްކޮށްދިން ކަމުގެ ކުށް ސާބިތުވެ، ތިން މީހަކަށް އީރާނުން މަރުގެ އަދަބުދީފިއެވެ.

އީރާނުގެ ފާރްސް ނިއުސް އެޖެންސީން ހާމަކޮށްފައިވާ ގޮތުގައި، މަރުގެ އަދަބު ދީފައިވާ ތިން މީހުންނަކީ ހަސަން ދިއޯބަންދު، ހާމިދު ކަޒޭމީ އަދި ރެޒާ ޒަންގާނޭއެވެ. މި ތިން މީހުންނަކީވެސް މުޒާހަރާތަކުގެ ތެރޭގައި ހިންގި ތަފާތު އެކި ހަމަނުޖެހުންތަކުގައި އިސްކޮށް އުޅުނު މީހުން ކަމަށް ރިޕޯޓުތައް ބުނެއެވެ.

އިރާނުގެ އަދުލުއިންސާފާ ބެހޭ އިދާރާއިން މައުލޫމާތު ދޭ ގޮތުގައި، މި މީހުން ވަނީ ކަރަޖް ސިޓީގައި ބަޑިއާއި، ގްރެނޭޑް އަދި މޮލޮޓޯވް ކޮކްޓެއިލް ބޭނުންކޮށްގެން އާންމު ތަންތަނުގައި ރޯކޮށް، ސަރުކާރުގެ އިމާރާތްތަކަށް ބޮޑެތި ގެއްލުންތަކެއް ދީފައެވެ. އަދި އެ ސިޓީގެ ކަރަންޓު ސަބްސްޓޭޝަނަކަށް ވެސް މި މީހުން ވަނީ ގެއްލުން ދީފައެވެ.

މިއީ ޖެނުއަރީ މަހުގެ މުޒާހަރާތަކާ ގުޅިގެން އިރާނުން މަރުގެ އަދަބު ތަންފީޒުކުރި ފުރަތަމަ ފަހަރެއް ނޫނެވެ. ފަހަކަށް އައިސް އިރާނުން އަންނަނީ އެ މުޒާހަރާތަކުގައި ބައިވެރިވި މީހުންގެ ތެރެއިން، އެމެރިކާއާއި އިސްރާއީލާ ގުޅުން އޮތް ކަމަށް ތުހުމަތުކުރެވޭ ގިނަ މީހުންތަކަކަށް މަރުގެ އަދަބު ދެމުންނެވެ.

މި އަދަބުތައް ތަންފީޒުކުރުމާ ގުޅިގެން ދުނިޔޭގެ އެކިއެކި ޖަމިއްޔާތަކުންނާއި ސަރުކާރުތަކުން ދަނީ ކަންބޮޑުވުން ފާޅުކުރަމުންނެވެ. އެގޮތުން، އދ. ގެ ހިއުމަން ރައިޓްސް ހައިކޮމިޝަނަރު ވޯލްކާ ތާކް ވަނީ، މަރުގެ އަދަބު ދިނުން ވަގުތުން ހުއްޓާލުމަށާއި، އެ އަދަބު އުވާލުމަށް މަސައްކަތް ކުރުމަށް އިރާނުގެ ކަމާބެހޭ ފަރާތްތަކަށް ގޮވާލައްވާފައެވެ.