ޓްރަމްޕްގެ އިންޒާރެއް؛ އީރާނުގެ ބާކީ އޮތް ބައި ވެސް "ހަލާކުކޮށްލަން" ޖެހިދާނެ

އެމެރިކާ އަދި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމައިގައި، އީރާނުގެ ބާކީ އޮތް ބައި ވެސް އެއްކޮށް "ހަލާކުކޮށްލަން" އެމެރިކާއަށް މަޖުބޫރުވެދާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.

ވައިޓް ހައުސްގެ އޯވަލް އޮފީހުގައި ނޫސްވެރިންނާ ވާހަކަދައްކަމުން ޓްރަމްޕް ބުނީ އީރާނު ހަނގުރާމައާ މެދު ގޮތެއް ނިންމާނީ އެމެރިިކާއިން ކަމަށެވެ.

"އަހަރެން ބޭނުމެއް ނޫން އެ ގައުމުގެ ބާކީ އޮތް ބައި ހަލާކުކޮށްލާކަށް، އެއީ އެކަން ނުކޮށް ވާން އޮތް ނަމަ. އެކަމަކު ފަހަރުގައި އަހަންނަށް އެކަން ކުރަން ޖެހިދާނެ،" ޓްރަމްޕް ބުންޏެވެ.

އަދި އެކަމާ މެދު އަޅާނެ ފިޔަވަޅެއް ވަރަށް އަވަހަށް އެނގިގެންދާނެ ކަމަށް ވެސް އޭނާ ބުންޏެވެ.

ޓްރަމްޕް އިތުރަށް ބުނީ، ދެން ގޮތެއް ނިންމާނީ އެމެރިކާއިން ކަމަށާ، އަމާޒަކީ ދުވަހަކުވެސް ދެން އެފަދަ ކަމެއް ތަކުރާރު ނުވާނެކަން ކަށަވަރުކުރުން ކަމަށެވެ.

ފެބްރުއަރީ މަހުން ފެށިގެން އެމެރިކާ އާއި އިސްރާއީލު ގުޅިގެން އީރާނަށް ދެމުންދާ ހަމަލާތަކުގެ ސަބަބުން ލިބިފައިވާ ގެއްލުންތަކުން އަރައިގަނެ، ގައުމު އަލުން ބިނާކުރަން އީރާނަށް 25 އަހަރު ނަގާނެ ކަމަށް ޓްރަމްޕް ބުންޏެވެ.

މީގެއިތުރުން، ގަތަރު މެދުވެރިކޮށް އީރާނުގެ ނިއުކްލިއާ ޕްރޮގްރާމާ ގުޅޭ ހުށަހެޅުމެއް އެމެރިކާއަށް ފޮނުވާފައިވާ ކަމަށް ދެކެވޭ ވާހަކަތަކާ ގުޅިގެން ސުވާލުކުރުމުން ޓްރަމްޕް ބުނީ، އެމެރިކާގެ ރުހުމެއް ނެތި އެމީހުންނަށް އެއްވެސް ކަމެއް ނުކުރެވޭނެ ކަމަށެވެ. ރިޕޯޓްތައް ބުނާ ގޮތުން ވޮޝިންޓަނުން އެ ހުށަހެޅުން ދިރާސާކުރަމުންދާއިރު، އީރާނުން އިންތިޒާރު ކުރަމުންދަނީ އެ ގައުމުން ހުށަހަޅާފައިވާ ހަތް ޝަރުތު ފުރިހަމަވުމަށެވެ.