ތުރުކީގެ ގާނޫނުހަދާ މަޖިލީހުން މައްކާގެ ދިފާޢީ އެއްބަސްވުން ފާސްކޮށްފި

ސަޢޫދީ ޢަރަބިއްޔާ އާއި ޕާކިސްތާނާއެކު ވެފައިވާ ތާރީޚީ ދިފާޢީ އެއްބަސްވުން ތުރުކީވިލާތުގެ ޕާލިމަންޓުން ބުރާސްފަތި ދުވަހު ރަސްމީކޮށް ފާސްކޮށްފިއެވެ.

މި އެއްބަސްވުމުގެ ދަށުން، އެއްބަސްވުމުގައި ބައިވެރިވާ ޤައުމަކަށް ޙަމަލާއެއް އަތުވެއްޖެ ޙާލަތެއްގައި ނޭޓޯގެ ދެވަނައަށް އެންމެ ބޮޑު އަސްކަރިއްޔާ އޮންނަ ތުރުކީވިލާތުން ދިފާޢުގައި އެހީތެރިކަން ފޯރުކޮށްދިނުން ލާޒިމުވެގެންދެއެވެ.

މި އެއްބަސްވުމުގައި ތުރުކީގެ ރައީސް ރަޖަބް ޠައްޔިބު އުރުދުޣާން އާއި ސަޢޫދީ ވަލީއަޙްދު މުޙައްމަދު ބިން ސަލްމާން އަދި ޕާކިސްތާނުގެ ބޮޑުވަޒީރު ޝެހްބާޒް ޝަރީފް ސޮއިކުރައްވާފައިވަނީ މިއަހަރުގެ އޮގަސްޓް މަހުގެ 7 ވަނަ ދުވަހު މައްކާގައެވެ.

ތުރުކީގެ ޤާނޫނު ހަދާ މަޖިލީހުގައި ބަހުސްކުރުމަށްފަހު ނެގުނު ވޯޓުގައި، މި އެއްބަސްވުން ފާސްވެފައިވަނީ ވޯޓުގައި ބައިވެރިވި 398 މެންބަރުންގެ ތެރެއިން 279 މެންބަރުންގެ އަޣުލަބިއްޔަތުންނެވެ. މި އެއްބަސްވުމާ ދެކޮޅަށް 119 މެންބަރަކު ވަނީ ވޯޓު ދެއްވާފައެވެ.

ޖުމްލަ 16 މާއްދާގެ މައްޗަށް އެކުލެވިގެންވާ މި އެއްބަސްވުމުގެ އެންމެ މުހިންމު ބަޔަކީ އެއް ޤައުމަށް ދެވޭ ޙަމަލާއަކީ ހުރިހާ ޤައުމަކަށް ދެވޭ ޙަމަލާއެއްގެ ގޮތުގައި ބެލެވޭ މާއްދާއެވެ. މިއީ ނޭޓޯ އެލަޔަންސްގެ 5 ވަނަ މާއްދާއާ އެއްފަދަ މާއްދާއެކެވެ.

އެއްބަސްވުމުގެ 1 ވަނަ މާއްދާގައި ބަޔާންކޮށްފައިވާ ގޮތުގައި، މެންބަރު ޤައުމުތަކުގެ ސަރަޙައްދީ ރައްކާތެރިކަމަށް ކުރިމަތިވާ ނުރައްކާތައް ނައްތާލުމަށް "އެޅެންހުރި ހުރިހާ ފިޔަވަޅެއް" އަޅަންވާނެއެވެ. އަދި 2 ވަނަ މާއްދާގައި ބަޔާންކޮށްފައިވަނީ، މެންބަރު ޤައުމަކަށް އަސްކަރީ ޙަމަލާއެއް އަތުވެއްޖެނަމަ، އަނެއް ޤައުމުތަކުން ވަގުތުން ފުރިހަމަ އަސްކަރީ އެހީތެރިކަން ދޭންޖެހޭނެ ކަމަށެވެ.

މީގެއިތުރުން، މި އެއްބަސްވުމުގެ ދަށުން ދިފާޢީ އުފެއްދުންތެރިކަން އިތުރުކުރުމާއި، ގުޅިގެން އަސްކަރީ ތަމްރީނުތައް ހިންގުމާއި، ޓެކްނޮލޮޖީ އަދި ޖާސޫސީ މަޢުލޫމާތު ޙިއްޞާކުރުން ހިމެނެއެވެ. މި އެއްބަސްވުން 10 އަހަރުގެ މުއްދަތަކަށް ދެމިއޮންނައިރު، މެންބަރު ޤައުމުތަކުގެ ރުހުމާއެކު އިތުރު ޤައުމުތަކަށް ބައިވެރިވުމުގެ ފުރުޞަތުވެސް އޮންނާނެއެވެ. މިގޮތުން ސޫރިޔާއިން މިހާރުވެސް ވަނީ މި އެއްބަސްވުމުގައި ބައިވެރިވުމުގެ ޝައުޤުވެރިކަން ފާޅުކޮށްފައެވެ.

ތުރުކީވިލާތުން މި އެއްބަސްވުން ފާސްކޮށްފައި މިވަނީ، ޔަމަނުގެ ޙޫޘީން ސަޢޫދީ ޢަރަބިއްޔާއަށް ދޭ ޙަމަލާތައް އިތުރުވަމުންދާ ދަނޑިވަޅެއްގައެވެ. އަދި އިސްރާއީލާއި އެމެރިކާއިން އީރާނާ ދެކޮޅަށް ކުރަމުންދާ ހަނގުރާމައިގެ ސަބަބުން މުޅި ސަރަޙައްދުގެ މަސްރަޙު ވަރަށް ބޮޑަށް ހޫނުވެފައިވާ ވަގުތެއްގައެވެ.

މި އެއްބަސްވުން ފާސްވި ނަމަވެސް، ތުރުކީގެ ސިފައިން ވަގުތުން ސަޢޫދީއަށް ފޮނުވާނެ ކަމަށް ނުބެލެވެއެވެ. ތުރުކީގެ ދިފާޢީ ވަޒީރު ޔާޝާރް ގުލާ ވިދާޅުވެފައިވަނީ، ތުރުކީގެ އަމާޒަކީ ޙޫޘީންނާ ސީދާ ހަނގުރާމައަކަށް ދިއުން ނޫން ކަމަށާއި، މި އެއްބަސްވުމުގެ މައިގަނޑު ބޭނުމަކީ ނުރައްކާތަކުން ދިފާޢުވުމުގެ ބާރު ގަދަކުރުން ކަމަށެވެ.

ސަޢޫދީ ޢަރަބިއްޔާއިން އިއްޔެވެސް ވަނީ މަދީނާގެ ސަރަޙައްދުން ޙޫޘީންގެ ޑްރޯނެއް ވައްޓާލާފައިވާ ކަމަށް ހާމަކޮށްފައެވެ. ޙޫޘީން މުޤައްދަސް ދެ ޙަރަމްފުޅަށް އަމާޒުކޮށް ޙަމަލާދޭ ކަމަށް ސަޢޫދީން ތުހުމަތުކުރި ނަމަވެސް، އެ ޖަމާޢަތުން އެކަން ދޮގުކުރެއެވެ.