މިޑްޓާމް އިންތިހާބާ ދިމާކޮށް އެމެރިކާއިން އީރާނަށް އަނެއްކާވެސް ހަމަލާތަކެއް ދީފި

އެމެރިކާގައި މިހާރު ހިނގަމުންދާ މިޑްޓާމް އިންތިހާބާ ދިމާކޮށް އެމެރިކާއިން އީރާނަށް އަނެއްކާވެސް ހަމަލާތަކެއް ދީފިއެވެ.

އެމެރިކާގެ އޮފިޝަލުން ކޭބީއެސް ނިއުސްއަށް މައުލޫމާތު ދެމުން ބުނެފައިވަނީ، ހޮރްމުޒް ކަނޑުއޮޅީގައި އޮންނަ އިރާނުގެ ގޭޝްމް ރަށަށް އެމެރިކާގެ އަސްކަރިއްޔާއިން ހަމަލާތަކެއް ދީފައިވާ ކަމަށެވެ. އިރާނުގެ ދައުލަތުގެ މީޑިއާ އައިއާރުއެންއޭ އިން ވެސް ވަނީ އިއްޔެ އެ ރަށުގައި ވަރުގަދަ ގޮވުންތަކެއްގެ އަޑު އިވިފައިވާ ކަން ކަށަވަރުކޮށްދީފައެވެ.

އެމެރިކާގެ އޮފިޝަލުން ސިފަކުރި ގޮތުގައި މި ހަމަލާތަކަކީ "ލިމިޓެޑް" ހަމަލާތަކެކެވެ. އަދި މި ހަމަލާތައް ދީފައިވަނީ، އިރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން އެމެރިކާގެ އުޅަނދަކަށް ހަމަލާދިނުމާ ގުޅިގެން، އޭގެ ރައްދުގައި ކަމަށްވެސް އޮފިޝަލުން ބުނެފައިވެއެވެ.

މި ހަމަލާތައް ދީފައިވަނީ، އެމެރިކާގެ ކޮންގްރެސްގެ ކޮންޓްރޯލް ލިބޭނީ ރިޕަބްލިކަން ނުވަތަ ޑިމޮކްރެޓުންނަށްތޯ ކަނޑައަޅާ މިޑްޓާމް އިންތިހާބު ބޭއްވުމުގެ ކުޑަވަގުތުކޮޅެއް ކުރިންނެވެ. ފެބުރުއަރީ މަހު އެމެރިކާއާއި އިސްރާއީލު ގުޅިގެން އިރާނަށް ދޭން ފެށި ހަމަލާތަކަށްފަހު، އެމެރިކާގެ ރައީސް ޑޮނަލްޑް ޓްރަމްޕްގެ މަގުބޫލުކަން ދަށްވެ، ހަނގުރާމަ ނިންމާލުމަށް އޭނާގެ ޕާޓީގެ އެތެރެއިންވެސް ބޮޑެތި ފިއްތުންތަކެއް ވަނީ ކުރިމަތިވެފައެވެ.

ނަމަވެސް، ހޯމަ ދުވަހު ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، އިރާނަށް ދޭ ހަމަލާތައް ވަރުގަދަކުރުމުގައި އެއްވެސް ހާސްކަމެއް ނެތް ކަމަށެވެ. އެކްސިއޯސްއަށް ދެއްވި އިންޓަވިއުއެއްގައި ޓްރަމްޕް ވިދާޅުވީ، އިރާނުގެ އިގްތިސާދު ބަލިކަށިކޮށްލެވިފައިވާ ކަމަށާއި، އެމީހުންގެ އަތުގައި ފައިސާއާއި ޕެޓްރޯލް ނެތުމުގެ ސަބަބުން ރައްޔިތުންނަށް ވަރަށް ބޮޑެތި ދަތިކަމެއް އައިސްފައިވާ ކަމަށެވެ.

މީގެ އިތުރުން، ފޮކްސް ނިއުސްއަށް ދެއްވި އިންޓަވިއުއެއްގައި އިރާނުގެ ނިއުކްލިއާ ޕްރޮގްރާމާ ގުޅުންހުރި "ޕިކްއެކްސް" ސައިޓަށް ހަމަލާދޭން ޖެހިދާނެ ކަމަށާއި، އެއީ އެއްގަޑިއިރު ތެރޭގައި ކުރެވިދާނެ ކަމެއް ކަމަށް ޓްރަމްޕް ވިދާޅުވިއެވެ.

ހަމައެއާއެކު އިންތިހާބަށްފަހު އެމެރިކާއިން އިރާނަށް ބޮޑެތި ހަމަލާތަކެއް ދޭން ފަށާފާނެ ކަމަށް ދެކެވޭ ވާހަކަތައް ޓްރަމްޕް ވަނީ ދޮގުކުރައްވާފައެވެ. އަދި، އިރާނުގެ ހާރިޖީ ވަޒީރު އަައްބާސް އަރާގްޗީ ވިދާޅުވީ، މެދުވެރިން މެދުވެރިކޮށް ހަނގުރާމަ ނިންމާލުމުގެ މަޝްވަރާތައް ވަރަށް ވަރުގަދައަށް ކުރިއަށްދާ ކަމަށެވެ.

އެގޮތުން، އިރާން އޮތީ ހާރިޖީ އަދި އަސްކަރީ ކޮންމެ ހާލަތަކަށްވެސް ތައްޔާރަށް ކަމަށާއި، މަޝްވަރާގެ މަގުތޯ ނުވަތަ އަސްކަރީ ނުރައްކާތެރި މަގު ހިޔާރުކުރުން އޮތީ އެމެރިކާގެ އަތްމަތީގައި ކަމަށް އޭނާ ވިދާޅުވިއެވެ.