ދިވެހިންގެ ޤައުމީ އުފެއްދުންތެރިކަމުގެ މައުރަޒު ކާމިޔާބުކަމާއެކު ނިންމާލައިފި

ދިވެހިންގެ ޤައުމީ އުފެއްދުންތެރިކަމުގެ މައުރަޒު ކާމިޔާބުކަމާއެކު ރޭ ނިންމާލައިފިއެވެ.

ހުޅުމާލޭ ސެންޓްރަލް ޕާކްގައި ކުރިއަށްދިޔަ މި މައުރަޒު ރަސްމީކޮށް ނިންމާލާފައިވަނީ ރޭ 12 ޖަހާއިރުއެވެ. ކުރިން އެގާރަ ޖަހާއިރު ނިންމާލަން ތާވަލްކޮށްފައި އޮތްނަމަވެސް މައުރަޒަށް ވަނުމަށް ގިނަ ބަޔަކު ކިޔޫގައި ތިބުމުން ބިޒްނަސް ސެންޓަ ކޯޕަރޭޝަނުން ވަނީ ވަގުތު ދަންމާލާފައެވެ. މިފަހަރުގެ މައުރަޒު ހުޅުވާފައިވަނީ އޮކްޓޯބަރުމަހުގެ 25 ވީ އާދިއްތަ ދުވަހުގެ ރެއެވެ.

ޖުމްލަ 9 ދުވަހުގެ މުއްދަތަކަށް ކުރިއަށްދިޔަ މިފަހަރުގެ މައުރަޒަކީ މިހާތަނަށް އެންމެގިނަ ބަޔަކު އަދި އެންމެގިނަ އުފެއްދުންތައް ފެނިގެންދިޔަ މައުރަޒެވެ. އެގޮތުން މިފަހަރުގެ މައުރަޒުގައި 780 ފަރާތަކުން ރަޖިސްޓްރީކޮށް، 419 ފަރާތަކުން 4,404 އުފެއްދުން ބައިވެރިކުރިއެވެ. މިއީ 2025 ވަނަ އަހަރާ އަޅާބަލާއިރު 83.5 އިންސައްތައިގެ އިތުރުވުމެކެވެ.

މިފަހަރުގެ މައުރަޒުގައި 16 ދާއިރާއަކުން 73 ގިންތިއެއް ހިމެނޭގޮތަށް ކުރިއަށްދިޔައިރު، މި މައުރަޒުގައި އެންމެ ގިނަ އުފެއްދުން ފެންނަނީ ދިވެހިންގެ ޒަމާންވީ ސަގާފަތާ ގުޅިފައިވާ އަތްތެރި މަސައްކަތުގެ ދާއިރާއިންނެވެ. އެއީ 1,695 އުފެއްދުމެވެ. ދެވަނައަށް އެންމެ ގިނައީ ކްރިއޭޓިވް އާޓްސް އަދި ޑިޒައިނިންގ ދާއިރާގެ 920 އުފެއްދުމެވެ. މީގެއިތުރުން ކާބޯތަކެތި، ފެޝަން، އައިސީޓީ، އަދަބިއްޔާތު، މަސްވެރިކަން އަދި އިޔާދަކުރަނިވި ހަކަތަ ފަދަ ދާއިރާތަކުންވެސް ގިނަ އަދަދެއްގެ މޮޅެތި އުފެއްދުންތައް ފެނިގެންދިޔައެވެ.

މިފަހަރުގެ މައުރަޒުގެ ފުރަތަމަ ތިން ރޭ އެކަނިވެސް ދެ ލައްކައާ ގާތްކުރާ އަދަދަކަށް މީހުން ޒިޔާރަތްކުރިކަމަށް ބީސީސީން ވަނީ ބުނެފައެވެ. މީގެ އިތުރުން މިފަހަރުގެ މައުރަޒަކީ ޤައުމުގެ ރައީސުލްޖުމްހޫރިއްޔާ މައުރަޒަށް ވަޑައިގެން މައުރަޒުގެ ބައިވެރިންނާއެކު އެންމެގިނައިރު ވަގުތު ހޭދަކުރެއްވި ފަހަރުވެސް މެއެވެ. އެގޮތުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ މިފަހަރުގެ މައުރަޒަށް ވަޑައިގެން މައުރަޒުގެ ބައިވެރިންގެ އުފެއްދުންތައް ބައްލަވާލައްވައި. ބައިވެރިންނަށް ތަކެތި އުފެއްދުމުގަޔާއި، މާކެޓްކުރުމުގައި ހުރި އުނދަގޫތައް އައްސަވައި ބޭނުންވާ ބައެއް މައުލޫމާތުތައް ހޯއްދަވާފައެވެ.

މިފަހަރުގެ މައުރަޒުގައި ރާއްޖޭގެ އިތުރުން ބޭރުގެ ބައެއް ފަރާތްތަކުންވެސް ވަނީ ބައިވެރިވެފައެވެ. އެގޮތުން ޗައިނާ ފަދަ ޤައުމުތަކުގެ ސްޓޭޓް ކުންފުނިތަކުން މި މައުރަޒުގައި ބައިވެރިވިކަން ފާހަގަކޮށްލެވެއެވެ.

މިފަހަރުގެ މައުރަޒުވެސް ކުރިއަށްދިޔައީ ކާބޯތަކެތީގެ ސްޓޯލްތަކާއި، މުނިފޫހިފިލުވުމުގެ ހަރަކާތްތައް ހިމަނއިގެންނެވެ. ކާބޯތަކެތީގެ ސްޓޯލްތަކަސް އާންމުންގެ ބޮޑު ތަރުހީބެއް ލިބުނުއިރު، އެތަންތަނުގެ ވިޔަފާރިވެސް މިފަހަރު ވަރަށް ރަނގަޅުކަމަށް ސްޓޯލްތައް ހިންގި ބައެއް ފަރާތްތަކުން ވަނީ ފާހަގަކޮށްފައެވެ.