ޖޫރިމަނާގެ ގޮތުގައި އަންނަ އަހަރު ލިބޭ ފައިސާ ދަށްވާނޭކަމަށް ލަފާކޮށްފި
ޖޫރިމަނާގެ ގޮތުގައި އަންނަ އަހަރު ދައުލަތުގެ ބައިތުލްމާލަށް ލިބޭ ފައިސާގެ އަދަދު ދަށްވާނޭކަމަށް މާލީ ވުޒާރާއިން ލަފާކޮށްފިއެވެ.
އަންނަ އަހަރަށް ލަފާކޮށް ރައްޔިތުންގެ މަޖިލީހަށް ފިނޭންސް މިނިސްޓްރީން ހުށަހެޅި ބަޖެޓް ތަފްސީލްތަކަށް ބަލާއިރު، ކުރިއަށްއޮތް 2027 އަހަރު ޖޫރިމަނާގެ ގޮތުގައި ދައުލަތަށް ލިބޭނޭކަމަށް އަންދާޒާކުރާ އަދަދަކީ 188.5 މިލިއަން ރުފިޔާއެވެ. މިއީ މިހިނގާ އަހަރު އަދި އޭގެ ކުރީ އަހަރާ އަޅާބަލާއިރު ނިސްބަތުން ދަށް އަދަދަކެވެ. ބަޖެޓް ތަފާސްހިސާބުތަކަށް ބަލާއިރު، ޖޫރިމަނާ ފައިސާގެ ގޮތުގައި މިހިނގާ އަހަރު 234.1 މިލިއަން ރުފިޔާ ލިބޭނޭކަމަށް ވަނީ އަންދާޒާކޮށްފައެވެ. މިދިޔަ އަހަރު ޖޫރިމަނާގެ ގޮތުގައި ދައުލަތަށް 255.5 މިލިއަން ރުފިޔާ ލިބުނެވެ.
ދައުލަތުގެ ޓެކްސް އިދާރާއިން އާންމުކުރި މިއަހަރުގެ ދެވަނަ ކުއާތަރުގެ އާމްދަނީ ތަފާސްހިސާބަށް ބަލާއިރު އެ ކުއާޓަރުގައި ޖޫރިމަނާ ފައިސާގެ ގޮތުގައި ލިބޭނޭކަމަށް އަންދާޒާކުރި އަދަދަށްވުރެ ބޮޑު އަދަދަދެއ ްވަނީ ލިބިފައެވެ. އެގޮތުން މިއަހަރުގެ ދެވަނަ ކުއާޓަރުގައި ޖޫރިމަނާ ފައިސާގެ ގޮތުގައި ވަނީ 66.2 މިލިއަން ރުފިޔާ ލިބިފައެވެ. ކުރިން އަންދާޒާ ކޮށްފައިވަނީ ޖޫރިމަނާގެ ގޮތުގައި 20.8 މިލިއަން ރުފިޔާ ލިބޭނެ ކަމަށެވެ.
އާއްމުގޮތެއްގައި ޖޫރިމަނާގެ ގޮތުގައި ދައުލަތަށް އާމްދަނީ ލިބެނީ ދައްކަންޖެހޭ ޓެކްސް ނުދެއްކުމުންނާއި، އެކިއެކި މައްސަލަތަކުގައި ކުރެވޭ ޖޫރިމަނާއިންނެވެ. ދައުލަތުގެ ބަޖެޓަށް އާމްދަނީ ލިބޭނޭ ދާއިރާތައް ކަނޑައަޅާއިރު ޖޫރިމަނާ ފައިސާ ލިބޭނޭކަމަށް ޖަހާފައި އޮވެއެވެ. ޖޫރިމަނާ އަކީ ކުށްތައް މަދުކުރުމަށް އަޅާ ފިޔަވަޅަކަށް ވާއިރު، ބަޖެޓު ފޫބެއްދުމަށް ޖޫރިމަނާއިން ބޮޑު އާމްދަނީއެއް ހޯދަން އަމާޒު ހިފުމަކީ ސިޔާސީ އަދި އިޤްތިޞާދީ ގޮތުން ގިނަ ފާޑުކިޔުންތަކެއް އަމާޒުވާ ކަމެއްކަން ފާހަގަކޮށްލެވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
