އިންޑިއާ ކަނޑުގައި ހުރި އެމެރިކާގެ މަނަވަރުތަކަށް ހަމަލާދޭނެ ކަމުގެ އިންޒާރު އީރާނުން ދީފި

އެމެރިކާއިން އީރާނާ ދެކޮޅަށް އައު ހަނގުރާމައެއް ފަށައިފި ނަމަ އިންޑިއާ ކަނޑުގައި ދުއްވާ އެމެރިކާގެ ހަނގުރާމަމަތީ އުޅަނދުތަކަށް ހަމަލާ ދޭނެ ކަމުގެ އިންޒާރު އީރާނުގެ ރެވޮލިއުޝަނަރީ ގާޑުގެ ސިފައިން ދީފިއެވެ.

އީރާނުގެ ރެވޮލިއުޝަނަރީ ގާޑުގެ ކަނޑުގެ ލަޝްކަރުގެ ސިޔާސީ ކަންކަމާ ބެހޭ ނައިބު، ޢަލީ މުޙައްމަދީ ވަނީ ހޮރްމޫޒް ކަނޑުއޮޅީގެ ކޮންޓްރޯލާ ގުޅޭ ގޮތުން އެމެރިކާއަށް ބަހުގެ ހަމަލާތަކެއް އަމާޒުކޮށްފައެވެ.

އެގޮތުން، އެމެރިކާގެ ރައީސް ޑޮނަލްޑް ޓްރަމްޕް ހޮރްމޫޒް ކަނޑުއޮޅިއަކީ އޭނާގެ ކަނޑުއޮޅި ކަމުގައި ދެކެންޔާ އޭނާގެ ބޯޓުތަކާއި އުޅަނދުތައް އެތުނަގައި ނެތީ ކީއްވެތޯ އަހައި މުޙައްމަދު ސުވާލުކޮށްފައިވާ ކަމަށް އީރާނުގެ ފާރްސް ނޫހާ ހަވާލާދީ ރިޕޯޓުތައް ބުނެއެވެ. މީގެ އިތުރުން، ހޮރްމޫޒް ކަނޑުއޮޅީގެ ކޮންޓްރޯލް އެމެރިކާ އަތުގައި އޮތް ކަމަށް ބުނާ ނަމަ، އެ ސަރަހައްދާ ކައިރިއަށް އެންމެ އުޅަނދެއް ނަމަވެސް ގެނެވޭތޯ ބަލަން އޭނާ ވަނީ އެމެރިކާ އާއި ޗެލެންޖު ކޮށްފައެވެ.

އޭނާ އިތުރަށް ބުނީ, އެމެރިކާ އާއި އީރާނާ ދެމެދު އައު ހަނގުރާމައެއް ފެށިއްޖެ ނަމަ އިންޑިއާ ކަނޑުގައި ވެސް އެ މީހުންގެ މަނަވަރުތަކާއި ހަނގުރާމައިގެ އުޅަނދުތަކަށް ހަމަލާ ދީ ސުންނާފަތިކޮށްލުމަކީ ޝައްކެއް ނެތް ކަމެއް ކަމަށެވެ. މި އިންޒާރު އައިސްފައި ވަނީ އެމެރިކާއާއި އީރާނާ ދެމެދު ނިއުކްލިއާ މައްސަލައާ ގުޅިގެން ނުތަނަވަސްކަން ބޮޑުވެފައިވާ ދަނޑިވަޅެއްގައެވެ.