އީރާނާ ދެކޮޅަށް ކުރާ ހަނގުރާމަ ނިންމުމަށް ޗައިނާ އަދި ރަޝިޔާގެ އެހީތެރިކަމެއް ބޭނުމެއް ނޫން: ޓްރަމްޕް
އެމެރިކާއިން އީރާނާ ދެކޮޅަށް ކުރަމުންދާ ހަނގުރާމަ ނިންމުމަށް ޗައިނާ ނުވަތަ ރަޝިޔާގެ އެއްވެސް އެހީތެރިކަމެއް ބޭނުން ނުވާ ކަމަށާއި، އީރާނުގެ އަސްކަރީ ބާރުތައް އެމެރިކާ ސިފައިން ވަނީ ބޮޑުތަނުން ބަލިކަށިކޮށްލާފައި ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.
ޓްރަމްޕް މިހެން ބުނީ ޗައިނާގެ ޝެންޒެންގައި، އެ ޤައުމުގެ ރައީސް ޝީ ޖިންޕިންގ އަދި ރަޝިޔާގެ ރައީސް ވްލަޑިމީރް ޕޫޓިންއާއެކު ބޭއްވެވި ތިންފަރާތުގެ ބައްދަލުވުމުގެ ކުރިން ބުރާސްފަތި ދުވަހު ފޮކްސް ނިއުސްއަށް ދިން ބަސްދީގަތުމެއްގައެވެ.
"އަހަރެމެން އެއްވެސް އެހީއަކަށް ބޭނުމެއް ނުވޭ. އަހަރެމެން ވާނީ އެމީހުންގެ ކަނޑުގެ ސިފައިންނާއި، ވައިގެ ސިފައިންގެ އިތުރުން ވައިގެ ދިފާޢީ ނިޒާމުތައް ބަލިކޮށްލާފައި،" ޓްރަމްޕް ބުންޏެވެ.
އޭނާ އިތުރަށް ބުނީ، އީރާނުގެ މިސައިލް ސްޓޮކް މިހާރު ހުރީ ކުރިން ހުރި މިންވަރުގެ ގާތްގަނޑަކަށް 12 ނުވަތަ 13 އިންސައްތައިގައި ކަމަށެވެ. އަދި އީރާނުން އެއްބަސްވުމަކަށް އަންނަން ބޭނުންވާ ކަމަށާއި، އެހެންކަމުން އެއްވެސް ފަރާތެއްގެ އެހީއެއް އެކަމަށް ބޭނުން ނުވާކަމަށެވެ.
މީގެއިތުރުން ހޮރްމުޒް ކަނޑުއޮޅީގެ ފުރިހަމަ ކޮންޓްރޯލް އެމެރިކާގެ އަސްކަރިއްޔާއިން ނަގާފައިވާ ކަމަށާއި، ބެއިޖިންގ އަދި މޮސްކޯއިން އެމެރިކާއާމެދު އަމަލުކުރީ ވަރަށް ރަނގަޅަށް ކަމަށާއި އެ ސަރަޙައްދުގެ ނުތަނަވަސް ކަނޑުގެ ސަރަޙައްދުތަކަށް އެ ޤައުމުތަކުގެ ހަނގުރާމަމަތީ މަނަވަރުތައް ފޮނުވާފައި ނުވާކަން ޓްރަމްޕް ފާހަގަކުރިއެވެ.
ތެހެރާނާއެކު މަޝްވަރާކުރުމާ ގުޅޭގޮތުން ވާހަކަދައްކަމުން ޓްރަމްޕް ބުނީ، އީރާނުގެ ވެރިން އެއްބަސްވުމަކަށް އެދުނު ނަމަވެސް، އޭނާ ބޭނުންވަނީ ދެމެހެއްޓެނިވި ހައްލެއް ކަމަށެވެ.
"އަހަރެން މިއުޅެނީ ވަރަށް އަވަހަށް މީގެ ނިމުން ގެންނަން. ކޮންމެވެސް އެއްގޮތަކުން އަހަރެމެން މީގެ ނިމުން ގެންނާނަން،" ޓްރަމްޕް ބުންޏެވެ.
ޝީ އަދި ޕޫޓިންއާއެކު އެއްފަހަރާ ބައްދަލުކުރުމުގެ ފައިދާއަކީ ކޮބައިތޯ ސުވާލުކުރުމުން ޓްރަމްޕް ބުނީ، އެ ދެ ލީޑަރުންނަކީ ގުޅިގެން މަސައްކަތްކުރާ ދެބޭފުޅުން ކަމަށެވެ. އަދި ކުރީގެ ރައީސް ބަރަކް އޮބާމާގެ ސިޔާސަތުތަކުގެ ސަބަބުން ހަކަތައިގެ ބޭނުމަށްޓަކައި އެ ދެ ޤައުމު އެކުވި ކަމަށާއި، ޗައިނާއަށް ހަކަތަ ބޭނުންވާއިރު ރަޝިޔާގައި ހަކަތަ އެބަހުރި ކަމަށް ބުންޏެވެ. އަދި އެ ދެ ލީޑަރުންވެސް އޭނާއަށް އިހުތިރާމްކުރާ ކަމަށް ޓްރަމްޕް ބުންޏެވެ.
ވޮޝިންގޓަން ޑީސީއަށް އަމާޒުކޮށް އީރާނުން ޣައިރު ޤާނޫނީ ހަތިޔާރު ނުވަތަ ނުރައްކާތެރި ހަތިޔާރު ބޭނުންކޮށްގެން ހަމަލާއެއް ދޭން އުޅޭކަމަށް ލިބިފައިވާ ޖާސޫސީ ރިޕޯޓުތަކާ ގުޅިގެން ޓްރަމްޕް ބުނީ، އީރާނުން ވިހަ ގޭހާއި ބަޔޮލޮޖިކަލް ހަތިޔާރު ބޭނުންކުރުމަށް ވިސްނަމުންދާ ކަމުގެ އިޝާރާތްތަކެއް އެބަހުރި ކަމަށެވެ. އަދި އެފަދަ ކަމެއް ހިނގައިފިނަމަ އެމެރިކާއިން އެމީހުން އެއްކޮށް ނައްތާލާނެ ކަމުގެ އިންޒާރުވެސް ދިނެވެ. ނަމަވެސް، އެމެރިކާގެ ކެބިނެޓް މެންބަރުން އަސްކަރީ މަރުކަޒުތަކުގައި ދިރިއުޅެނީ ތެހެރާންގެ މިފަދަ އިންޒާރުތަކާ ގުޅިގެން ކަމަށް ދެކެވޭ ވާހަކަތައް އޭނާ ވަނީ ދޮގުކޮށްފައެވެ.
މިދިޔަ ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިސްރާއީލުން ގުޅިގެން ފެށި ހަނގުރާމައާ ގުޅިގެން، އީރާނުން ވަނީ ބަދަލުހިފުމުގެ ގޮތުން އިސްރާއީލަށާއި އެމެރިކާގެ އަސްކަރީ މަރުކަޒުތައް ހުންނަ ޚަލީޖުގެ ޤައުމުތަކަށް ވަރުގަދަ ހަމަލާތަކެއް ދީފައެވެ. މި ހަމަނުޖެހުންތައް ހައްލުކުރުމަށް ޖޫން މަހު ފަހުމުނާމާއެއްގައި ސޮއިކުރެވުނު ނަމަވެސް، ހޮރްމުޒް ކަނޑުއޮޅީގެ ސަލާމަތީ ކަންކަމާމެދު އުފެދުނު ޚިޔާލުތަފާތުވުންތަކާ ހުރެ އެ އެއްބަސްވުން ފުރިހަމައަށް ތަންފީޒުކުރެވިފައެއް ނުވެއެވެ. އަދި ޖުލައި މަހުން ފެށިގެން ދޭތެރެދޭތެރެއިން ދަނީ ކުރިމަތިލުންތައް ހިނގަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް