މާސްޓަރސްއަށް ކިޔެވުމަށް ޗައިނާއިން ދިވެހިންނަށް 200 ފުލް ސްކޮލާޝިޕްގެ ފުރުސަތު
ޒުވާން ލީޑަރުން ބިނާކުރުމުގެ މަގްސަދުގައި ޗައިނާ ސަރުކާރުން ހުރިހާ ހަރަދެއް ކުރާގޮތަށް، މާސްޓާސް ޑިގްރީއަށް ކިޔެވުމަށް ދިވެހި ދަރިވަރުންނަށް 200 ސްކޮލާޝިޕްގެ ފުރުސަތު މިއަދު ހުޅުވާލައިފިއެވެ.
މި ސްކޮލާޝިޕްތަކަކީ ޗައިނީޒް ސްކޮލާޝިޕް ކައުންސިލްގެ އެހީގައި ދިވެހިންނަށް ހުޅުވާލާފައިވާ ޕޯސްޓްގްރެޖުއޭޓް ޕްރޮގްރާމްތަކެކެވެ. މިއީ އެއް އަހަރު ދުވަހުގެ މުއްދަތަށް ކުރިއަށްގެންދާ، ޕްރޮގްރާމްތަކެކެވެ.
މިނިސްޓްރީ އޮފް ހަޔާ އެޑިއުކޭޝަނުން މިއަދު ކުރި އިއުލާނެއްގައި ބުނެފައިވަނީ، ޗައިނާގެ 92 ޔުނިވާސިޓީއަކުން ހިންގާ ތަފާތު އެކި ދާއިރާތަކުގެ ކޯސްތަކުގައި ބައިވެރިވުމުގެ ފުރުސަތު ލިބިގެންދާނެ ކަމަށެވެ. އަދި މި ސްކޮލާޝިޕްތަކަށް ޝައުގުވެރިވާ ފަރާތްތަކުން އަންނަ އަހަރުގެ މާޗް މަހުގެ 29 ވަނަ ދުވަހުގެ ކުރިން އޮންލައިންކޮށް ފޯމު ހުށަހެޅުމަށް މިނިސްޓްރީން ވަނީ އެދިފައެވެ.
މި ކޯސްތަކަށް ކުރިމަތިލުމުގެ މައިގަނޑު ޝަރުތުތަކުގެ ތެރޭގައި، ބެޗްލާސް ޑިގްރީ ފުރިހަމަކޮށްފައިވުމާއެކު، އުމުރުން 45 އަހަރު ފުރިފައި ނުވާ މީހަކަށް ވާންޖެހެއެވެ.
މީގެއިތުރުން، މި ފުރުސަތުތަކަށް ހޮވޭ ދަރިވަރުން ކޯހަށް ފުރުމުގެ ކުރިން ހާއްސަ ސަމާލުކަމެއް ދޭންޖެހޭ މުހިންމު ކަންތައްތަކެއް ހަޔާ އެޑިއުކޭޝަން މިނިސްޓްރީން ވަނީ ފާހަގަކޮށްފައެވެ. އެގޮތުން، ތައުލީމު ހާސިލުކުރަން ދާ އިންސްޓިޓިއުޓަކީ އަދި ހޮވިފައިވާ ކޯހަކީ މޯލްޑިވްސް ކޮލިފިކޭޝަންސް އޮތޯރިޓީއިން ގަބޫލުކުރާ ތަނެއް އަދި ކޯހެއްތޯ ކަށަވަރުކުރުމަށް ވަނީ އިލްތިމާސްކޮށްފައެވެ.
ހަމައެއާއެކު، ރާއްޖޭގައި ވަޒީފާ އަދާކުރުމަށްޓަކައި ވަކި ޕްރޮފެޝަނަލް ލައިސެންސެއް ބޭނުންވާ ދާއިރާތަކުން ކިޔަވާ ދަރިވަރުން، އެ ކޯހަކީ ކަމާބެހޭ ކަމާގުޅޭ އިދާރާތަކުން ވެސް ގަބޫލުކުރާ މަރުކަޒެއްގައި ހިންގާ، އެ އިދާރާއަކުން ބަލައިގަންނަ ކޯހެއްކަން ކަށަވަރުކުރުމަށް ވެސް މިނިސްޓްރީގެ އިއުލާނުގައި ވަނީ ހަނދާންކޮށްދީފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް