ޕާސްޕޯޓް ނިމިފައިވާނަމަ، ލަސްނުކޮށް އަވަހަށް ބަލާ އާދޭ: އިމިގްރޭޝަން
ޕާސްޕޯޓް ނިމިފައިވާނަމަ ވީހާވެސް އަވަހަށް ޕާސްޕޯޓް ބަލާ އައުމަށް އިމިގްރޭޝަނުން އިލްތިމާސްކޮށްފިއެވެ.
މޯލްޑިވްސް އިމިގްރޭޝަނުން ކުރި ޕޯސްޓެއްގައި ބުނެފައިވަނީ، ޕާސްޕޯޓް ނިމިފައި ހުރިނަމަވެސް ގިނަ ފަރާތްތަކަކުން ޕާސްޕޯޓް ނަގަން ނާންނަ މައްސަލަ ފާހަގަކުރެވިފައިވާކަމަށެވެ. ޕްރިންޓްކޮށްފައިވާ ޕާސްޕޯޓްތައް އިމިގްރޭޝަނުގައި ބެހެއްޓޭނީ 6 މަސްދުވަހުގެ މުއްދަތައްކަން ފާހަގަކުރަމުން އިމިގްރޭޝަނުން ބުނީ، ކަނޑައެޅިފައިވާ މުއްދަތު ހަމަވުމަށްފަހު އޮންނަ އުސޫލުގެ މަތިން ޕާސްޕޯޓް ނައްތާލެވޭނޭކަމަށެވެ.
އެހެންކަމުން ޕާސްޕޯޓް ނިމި އެ އިދާރާއިން އެ ބަލާ އައުމަށް އެންގުމުން އެކަމަށް އިޖާބަދިނުމަށް ސަމާލުކަން ދިނުމަށް އިމިގްރޭޝަނުން ވަނީ އެދިފައެވެ. ކުރިއަށް އޮތީ ސްކޫލް ބޮޑު ބަންދާއި، އަދި އުމްރާއަށް ގިނަ އަދަދެއްގެ މީހުން ދާ ދުވަސްވަރަކަށް ވުމުން މިދުވަސްވަރު ޕާސްޕޯޓް ހައްދާމީހުންގެ އަދަދު އިތުރުވާކަމަށް އިމިގްރޭޝަނުން ފާހަގަކުރެއެވެ.
އިމިގްރޭޝަނުން ވަނީ ޕާސްޕޯޓަށް އެދި ފޯމް ހުށަހަޅާއިރު ސަމާލުކަންދޭންވީ ބައެއް މުހިންމު ކަންކަންވެސް މީގެ ކުރިން އާންމުންގެ ސަމާލުކަމަށް ގެނެސްފައެވެ. އެގޮތުން ޕާސްޕޯޓަށް ހުށަހަޅާއިރު އޮންނަ އުސޫލްގެ މަތިން ފޮޓޯ ހުށަހެޅުމަށް ސަމާލުކަން ދިނުމަށް ވަނީ އެދިފައެވެ. އިމިގްރޭޝަނުން އެހެން ބުނެފައިވަނީ ފޮޓޯ ނެގުމަށްފަހު ބައެއް ފަރާތްތަކުން އޭއައި ގެ އެހީގައި ފޮޓޯ ރީތިކުރުމަށްފަހު ހުށަހަޅާތީއެވެ.
އިމިގްރޭޝަނުން ބުނެފައިވަނީ އާޓިފިޝަލް އިންޓަލިޖަންސް ބޭނުންކޮށްގެން ޕާސްޕޯޓް ފޮޓޯ އެޑިޓްކޮށްފިނަމަ އެއީ އުސޫލާ ހިލާފް ކަމެއްކަމަށެވެ. ޕާސްޕޯޓަކީ މީހާގެ އައިޑެންޓިޓީ ކަށަވަރުކޮށްދޭ މުހިންމު ސެކިއުރެޓީ ޑޮކިއުމެންޓަކަށް ވާތީވެ، ފޮޓޯ ހުށަހެޅުމުގައި ސަމާލުވުމަށް އިމިގްރޭޝަނުން ވަނީ އެދިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް