ހޮރްމޫޒް ކަނޑުއޮޅިން ދަތުރުކުރަމުންދިޔަ ދެ ތެޔޮ ޓޭންކަރެއް މައިންތަކެއްގައި ޖެހިއްޖެ

ހޮރްމޫޒް ކަނޑުއޮޅިން ދަތުރުކުރަމުންދިޔަ ދެ ތެޔޮ ޓޭންކަރެއް، ކަނޑުގައި ވަޅުލާފައިވާ މައިންތަކެއްގައި ޖެހިއްޖެއެވެ.

މި ހާދިސާ ހިނގާފައިވަނީ، ދަތުރުފަތުރުކުރުން ބަންދުކޮށްފައިވާ މަގަކުން އެ ދެ އުޅަނދު ހުރަސްކުރަން އުޅުމުގެ ތެރޭގައި ކަމަށް ރިޕޯޓުތައް ބުނެއެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އާ ހަވާލާދީ އެ ގައުމުގެ އިސްނާ ނިއުސް އެޖެންސީން ބުނި ގޮތުގައި، ކަނޑުއޮޅީގެ ދެކުނުން ދަތުރުކުރުން މަނާކޮށްފައިވާ ސަރަހައްދުން ދިޔަ މި ދެ އުޅަނދަށް ބޮޑެތި ގެއްލުންތަކެއް ލިބިފައިވަނީ ކަނޑު އަޑީގައި ހުރި މައިންތަކެއްގައި ޖެހި ގޮވުމުގެ ސަބަބުންނެވެ.

މި ބާރުގަދަ ގޮވުމާއެކު ދެ ތެޔޮ ޓޭންކަރުގައިވެސް ވަނީ ވަރަށް ބޮޑަށް އަލިފާން ރޯވެފައެވެ. ހާދިސާ ހިނގި ސަރަހައްދުގައި އަލިފާންގަނޑު ފެތުރި، އުޅަނދުތަކަށް ބޮޑެތި ގެއްލުންތަކެއް ލިބެމުންދިޔަ ކަމަށް މައުލޫމާތު ލިބެއެވެ.

މި ހާދިސާގައި ހިމެނޭ އެއް އުޅަނދަކީ ދެ މިލިއަން ފީފާއަށްވުރެ ގިނަ ސާފުނުކުރާ ތެޔޮ ބަރުކޮށްގެން ދަތުރުކުރަމުންދިޔަ ބިޔަ "ސުޕަޓޭންކަރެއް" ކަމަށް އިސްނާ ނިއުސް އެޖެންސީން ބުނެފައިވެއެވެ. އަދި އަލިފާން ރޯވެ ލިބުނު ގެއްލުންތަކާއެކު، އެ ބިޔަ ޓޭންކަރު މިހާރު ގަލްފުގެ ދެކުނު ކަނޑުގެ ސަރަހައްދަށް އަޑިއަށް ގޮސްފައިވާ ކަމަށްވެސް އެ އެޖެންސީން ކަށަވަރުކޮށްދެއެވެ.

ޓޭންކަރު އަޑިއަށް ދިއުމާ ގުޅިގެން، އެ ސަރަހައްދުގައި ހަރަކާތްތެރިވާ މަސްވެރިންނަށް އައިއާރުޖީސީން ވަނީ ހާއްސަ އިލްތިމާސެއް ކޮށްފައެވެ. އެގޮތުން، އަޑިއަށް ގޮސްފައިވާ އުޅަނދުގެ ބައިތަކުގައި ޖެހި ނުރައްކާތެރި ހާދިސާއެއް ހިނގިޔަ ނުދިނުމަށްޓަކައި، އެ ސަރަހައްދުން ދަތުރުކުރާ މަސްވެރިން ސަލާމަތީ ފިޔަވަޅުތައް އެޅުމަށާއި ހާއްސަ ސަމާލުކަމެއް ދިނުމަށް ވަނީ އަންގާފައެވެ.