ތެޔޮ ފީފާއެއްގެ އަގު 102 ޑޮލަރަށްވުރެ މައްޗަށް އުފުލިއްޖެ

މެދުއިރުމައްޗާއި ހޮރްމޫޒް ކަނޑުއޮޅީގައި ޝިޕިން ލައިންތަކަށް ދެމުންދާ ހަމަލާތައް އިތުރުވެ، ތެލުގެ ސަޕްލައިއަށް އޮތް ގޮންޖެހުންތަކާއެކު ދުނިޔޭގެ ބާޒާރުގައި ތެލުގެ އަގު ބޮޑުތަނުން މައްޗަށް ގޮސް، ފީފާއެއް 102 ޑޮލަރުން މައްޗަށް އަރައިފިއެވެ.

ގަލްފު ސަރަހައްދުގައި ކަނޑު ދަތުރުތަކަށް އޮތް ނުރައްކާ ބޮޑުވަމުން ދިޔުމާ ގުޅިގެން ތެލުގެ ބާޒާރުގައި ނުތަނަވަސްކަން ވަނީ އިތުރުވެފައެވެ. ހާއްސަކޮށް ހޮރްމޫޒް ކަނޑުއޮޅިއާއި ގަލްފުގައި އުޅަނދުތަކަށް އަމާޒުކޮށް ދޭ ހަމަލާތައް އިތުރުވަމުންދާކަމަށް މީޑިއާގެ ރިޕޯޓްތައް ބުނެއެވެ.

ދުނިޔޭގެ ބާޒާރުގައި މިހާރު ސާފްނުކުރާ ތެއޮފީފާއެއްގެ އަގު 102 ޑޮލަރަށްވުރެ މަތީގައި ހުރިއިރު، އެމެރިކާގެ ވެސްޓް ޓެކްސަސްގައި ތެއޮ ފީފާއެއް ވަނީ 89.94 ޑޮލަރަށް އުފުލިފައެވެ. މީގެ އެއް ދުވަސް ކުރިން ތެލުގެ އަގު ތިރިވެފައި ހުރީ، ބައިނަލްއަގުވާމީ ހަކަތައިގެ ޖަމިއްޔާ (އައިއީއޭ) އިން ތެލުގެ ރިޒާވް ދޫކުރާ މިންވަރު އިތުރުކުރުމަށް އެއްބަސްވުމާ ގުޅިގެންނެވެ.

މާރިޗު މަހު އެކުލަވާލި ޕްލޭނެއްގެ ދަށުން ތެލުގެ ސްޓޮކް ދޫކުރުން އަވަސްކޮށް ޑީސަލް ސަޕްލައިއަށް އިސްކަންދިނުމަށް އައިއީއޭ ވަނީ ނިންމާފައެވެ. ހަނގުރާމައިގެ ސަބަބުން ތެލުގެ ސަޕްލައިއަށް ބުރޫ އެރުމާއި ތެލުގެ އަގު ރެކޯޑް މިންވަރަކަށް އުފުލިފައިވާ މައްސަލައަށް ހައްލެއް ހޯދުމަށް ސަރުކާރުތަކުން ދަނީ މަސައްކަތްކުރަމުންނެވެ.

މި ނިންމުމާ ގުޅިގެން ބުދަ ދުވަހު ތެލުގެ އަގު ތިރިވި ނަމަވެސް، ސަޕްލައިއާ މެދު އޮތް ކަންބޮޑުވުންތައް ފިލައިނުދިޔުމުގެ ސަބަބުން އަނެއްކާ ވެސް އަގު ވަނީ ބޮޑުތަނުން އުފުލިފައެވެ.

ދުނިޔޭގައި ތެލުގެ އަގު އުފުލުމުން އެންމެ ބޮޑަށް އަސަރު ކުރާނީ އޭޝިޔާ ބައްރުގެ ޤައުމުތަކަށެވެ. އެގޮތުން އިންޑިޔާ، ޕާކިސްތާން، އިންޑޮނޭޝިޔާ، ބަންގްލަދޭޝްގެ އިތުރުން ޗައިނާއަށް މިކަމުގެ ސަބަބުން އަސަރު ކުރާނެއެވެ. ސަބަބަކީ މިޤައުމުތަކަކީ މެދުއިރުމަތީގެ ތެލަށް އެންމެ ބަރޯސާވާ ޤައުމުތަކެވެ.