ޕާކިން ސިސްޓަމްތައް ބެހެއްޓުމަށް 59.9 މިލިއަން ރުފިޔާ؛ ދައުލަތަށް ވީ ގެއްލުން: އޮޑިޓް

މާލެ އާއި ހުޅުމާލޭގައި އޮޓޮމެޓިކް ޕާކިން ސިސްޓަމްތައް ބެހެއްޓުމަށް ދައުލަތުގެ ބައިތުލްމާލުން ކުރި 59.35 މިލިއަން ރުފިޔާގެ ހޭދައިން ދައުލަތަށް ލިބުނީ ގެއްލުންކަމަށް އޮޑިޓަރ ޖެނެރަލް ނެރުއްވި ހައުސިން މިނިސްޓްރީގެ އޮޑިޓް ރިޕޯޓްގައި ބުނެފިއެވެ.

އޮޑިޓް ރިޕޯޓްގައި ބުނީ މާލެ އާއި ހުޅުމާލޭގައި 20 އޮޓޮމެޓިކް ޕާކިން ސިސްޓަމް ބެހެއްޓުމަށް ކުރިއަށް ގެންގޮސްފައިވާ މަޝްރޫޢުއަކީ އޭގެން ރައްޔިތުންނަށް ފަސޭހައެއް ނުލިބުނު ތަނުގައި ދައުލަތަށް ގެއްލުން ލިބުނު ކަމެއްގެ ގޮތުގައި ފާހަގަކުރެވިފައިވާކަމަށެވެ.

މި މަސައްކަތް އެންމެ ފުރަތަމަ 2016 ވަނަ އަހަރު ހަވާލުކުރީ 59.9 މިލިއަން ރުފިޔާގެ އަގަކަށް އެސްޓީއޯ އާއެވެ. ނަމަވެސް މަސައްކަތް އެކަށީގެންވާ ގޮތެއްގައި ކުރިއަށް ނުދާކަމަށް ބުނެ، އެސްޓީއޯ އާއެކު ވި އެއްބަސްވުން ވަނީ 2018 ވަނަ އަހަރުގެ ޖޫންމަހުގެ 26 ވަނަ ދުވަހު ބާތިލްކޮށްފައެވެ. އެއަށްފަހު ނުނިމިހުރި 14 ޕާކިން ސިސްޓަމް ބެހެއްޓުމަށް ބޭރުގެ ކުންފުންޏަކަށް 14.48 މިލިއަން ރުފިޔާގެ އަގަކަށް ހަވާލުކުރި ނަމަވެސް އެފަރާތަށް މަސައްކަތުގެ އަގުގެ ގޮތުގައި 6.2 މިލިއަން ރުފިޔާ ދޫކުރިއިރު، މަސައްކަތް ނިންމާފައިވާކަން ކަށަވަރުކުރެވެން ނެތްކަމަށް އޮޑިޓްގައި ވަނީ ފާހަގަކޮށްފައެވެ.

އޮޑިޓްގައި ވަނީ ޕާކިން ސިސްޓަމްތައް ގާއިމްކުރުމަށް އެޑްވާންސްގެ ގޮތުގައި ދޫކުރި ފައިސާގެ ތެރެއިން 1.45 މިލިއަން ރުފިޔާ ނުލިބިވާކަން ފާހަގަކޮށްފައެވެ.

ޕާކިން ސިސްޓަމްތަކާ ގުޅޭގޮތުން އޮޑިޓް ރިޕޯޓްގައި ވަނީ، މި މަޝްރޫޢުއަށް 59.9 މިލިއަން ރުފިޔާ ހަރަދުކޮށްފައިވާއިރު، މަޝްރޫޢުއިން އެއްވެސް މަންފާއެއް ލިބިފައި ނުވުމުން މިއީ ދައުލަތުގެ ފައިސާއަށް އިހުމާލުވުން ކަމުގައި ބެލެވޭތީ، މައްސަލަ ބަލައި އިހުމާލުވާ ފަރާތަކާމެދު ފިޔަވަޅު އަޅަންޖެހޭކަން ފާހަގަކޮށްފައެވެ. އަދި އޮޑިތަރ ޖެނެރަލް ވަނީ މިފަދަ މައްސަލަތައް ބެލުމަށް މިނިސްޓަރު ކަނޑައަޅާފައިވާ އިންތިޒާމުގެ ތެރެއިން މައްސަލަ ބަލައި އެކަމުގައި ކުރިއަށްދިއުމަށް އެދިފައެވެ.